ޚަބަރު
ތުރުކީވިލާތުގެ ގޮވާތަކެތި އުފައްދާ ފެކްޓްރީގައި ހިނގި ހާދިސާއާ ގުޅިގެން ރައީސް މުޢިއްޒު ތަޢުޒިޔާ ފޮނުއްވައިފި

ރައީސް މުއިއްޒު އަދި ރައީސް އުރްދުޣާން. ފޮޓޯ: ރައީސް އޮފީސް
ތުރުކީވިލާތުގެ ބަލިކެސިރު ޕްރޮވިންސްގެ ގޮވާތަކެތި އުފައްދާ ފެކްޓަރީގައި ހިނގި ހާދިސާއާއި ގުޅިގެން ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތުރުކީގެ ރައީސް ރަޖަބް ޠައްޔިބް އުރްދުޣާން އަށް ތަޢުޒިޔާގެ މެސެޖެއް ފޮނުއްވައިފިއެވެ.
ރައީސް ޑރ މުޢިއްޒު ވަނީ ބަލިކެސިރު ޕްރޮވިންސްގައި ހުރި ގޮވާތަކެތި އުފައްދާ ފެކްޓަރީއެއްގައި ހިނގި ގޮވުމުގެ ހާދިސާގައި 12 މީހުން މަރުވެ، އަދި އެހެން ބަޔަކަށް އަނިޔާވެފައިވާ ކަމުގެ ހިތާމަވެރި ޚަބަރާއި ގުޅިގެން ހިތާމަކުރައްވާ ކަމަށް ވިދާޅުވެފައެވެ.
ރައީސުލްޖުމްހޫރިއްޔާ ޑރ މުއިއްޒުގެ މެސެޖުގައި، ތުރުކީވިލާތުގެ ސަރުކާރަށާއި ރައްޔިތުންނަށް، ޚާއްޞަކޮށް މަރުވި މީހުންގެ ޢާއިލާތަކަށާއި އަނިޔާވި ފަރާތްތަކަށް ތަޢުޒިޔާ ދަންނަވާފައިވެއެވެ.
ރައީސް މުޢިއްޒުގެ މެސެޖު ނިންމަވާލައްވާފައިވަނީ ދިވެހި ސަރުކާރާއި ރައްޔިތުން، މިހިތާމަވެރި ދަނޑިވަޅުގައި ތުރުކީވިލާތުގެ ރައްޔިތުންނާއި އެކު ތިބިކަމަށް ވިދާޅުވެ، މި ހިތާމަވެރި ހާދިސާއިން އަސަރުކުރި އެންމެހައި ފަރާތްތަކަށް އަވަސް ޝިފާއަކަށް އެދިވަޑައިގަންނަވާ ކަމަށް ވިދާޅުވެއެވެ.