އުއްމީދު ގެއްލުވާނުލާ މަސައްކަތްކުރާނެ ކަމަށް ގާޑިއޯލާ ބުނެފި

އުއްމީދު ގެއްލުވާނުލާ ޓީމު ހަމަޔަކަށް އެޅުވުމަށް މަސައްކަތް ކުރާނެ ކަމަށް، ޕްރިމިއަރ ލީގުގެ ޗެމްޕިއަކަން މެންޗެސްޓަރ ސިޓީއާއެކު ހަ ފަހަރު ހޯދާފައިވާ، އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން މި ބުނީ، އެ ޓީމަށް ނަތީޖާ ނުނެރެވި، ޓީމުގެ ފޯމް އެއްކޮށް ގެއްލިފައިވާތީ އެ ހާލަތާ މެދު އޭނާގެ ވިސްނުން ހުރި ގޮތް އޮޅުންފިލުވާދިނުމުގެ ގޮތުންނެވެ. 

ފާއިތުވި ހަތް ސީޒަނުގައި ހަ ފަހަރު ޗެމްޕިއަންކަން ހޯދާފައިވާ ސިޓީއަށް ފާއިތުވި 13 މެޗުން ކާމިޔާބު ކުރެވިފައި ވަނީ އެންމެ މެޗެކެވެ. 

މިހާރު ސިޓީ ނެރެމުންދާ ނަތީޖާތަކާ ގުޅިގެން، ގާޑިއޯލާ ވަނީ ވަރަށް ބޮޑު ޕްރެޝަރަކަށް ވެއްޓިފައެވެ. ނަމަވެސް އޭނާ ނިންމާފައިވަނީ، ޓީމުގެ ހާލަތު ކުޅުންތެރިންގެ ބޮލުގައި ނާޅުވައި، ކަންކަން ރަގަޅު ކުރުމަށް މަސައްކަތް ކުރުމަށެވެ. 

މި ވަގުތަކީ ޓީމުގެ ނަތީޖާތައް ބަދަލު ކުރަން މުހިންމު ވަގުތަކަށް ވީނަމަވެސް، ޓީމުގެ ފޯމު އަލުން އަނބުރާ ހޯދުމަކީ އޭނާ އަށާއި ޓީމަށް ކުރިމަތިވެފައި އޮތް އެންމެ ބޮޑު އިމްތިހާނުކަމަށް، މިއަދު ލެސްޓާ ސިޓީއާ ދެކޮޅަށް ކުޅޭ މެޗުގެ ކުރިން ގާޑިއޯލާ ބުނެފައި ވެއެވެ.

ގާޑިއޯލާ އިތުރަށް ފާހަގަކޮށްފައިވާ ގޮތުގައި، ޓީމު މި ހާލަތަށް ވެއްޓުނީ މުހިންމު ކުޅުންތެރިން ތަކަކަށް އަނިޔާވުމާ ގުޅިގެންނެވެ. އަދި އޭނާ ބުނީ، އެއްވެސް ޓީމަކަށް އެއް ފޯމެއްގައި އަބަދު ނުކުޅެވޭނެ ކަމަށެވެ.

އެގޮތުން، އެންމެ ފަހުން ބެލަން ޑިއޯރ ކާމިޔާބު ކުރި ރޮޑްރީގެ ކަކުލަށް ލިބުނު އަނިޔާއަކާ ގުޅިގެން އޭނާއަށް ސީޒަން ނިމުނު އިރު، އާންމު ގޮތެއްގައި ޓީމުގައި ގަވާއިދުން ކުޅެމުން ދިޔަ ރޫބެން ދިއާޒް، ޖޯން ސްޓޯންސް، އެޑަސަން، ކައިލް ވޯކަރ، ޖެކް ގްރިއަލިޝް އަދި މެތިއުޒް ނުނޭޒްއަށް އަނިޔާއާ ގުޅިގެން އެ ޓީމު އެންމެ ފަހުން ކުޅުނު އެވަޓަން މެޗު ވެސް ވަނީ ގެއްލިފައެވެ.