ކުޅިވަރު
އުނދަގޫ ހާލަތެއްގައި އޮތް ނަމަވެސް، ސިޓީ އިން އަހަރު ނިންމާލީ މޮޅަކާއެކު

މެންޗެސްޓަރ ސިޓީގެ ހާލަންޑާއި ސެވީނިއޯ، ފޮޓޯ: ގެޓީ އިމޭޖަސް
ހުލާސާ
ލީގުގެ އެންމެ ކުރީގައި އޮތް ލިވަޕޫލާ ދެމެދު މިހާރު 14 ޕޮއިންޓުގެ ފަރަގެއް އޮތްއިރު، ސިޓީއަށް ލީގުގެ ތަށި ދިފާއު ކުރެވޭނެ ފުރުސަތު މިހާރު އޮތީ ވަރަށް ހަނިވެފައި.
އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީއިން އެންމެ ފަހުން ކުޅުނު ފަސް މެޗުން ބަލިވެފައިވީ ނަމަވެސް، އެ ޓީމުގެ ކޯޗު، ޕެޕް ގާޑިއޯލާގެ 500 ވަނަ މެޗުގައި ލެސްޓަރ ސިޓީ 2-0 އިން ބަލިކޮށް، މޮޅަކާއެކު މި އަހަރުގެ ފަހު މެޗު ނިންމާލައިފިއެވެ.
ކިންގް ޕަވަރ ސްޓޭޑިއަމްގައި އާދީއްތަ ދުވަހުގެރޭ ކުޅުނު މެޗުގައި ސިޓީގެ ފުރަތަމަ ގޯލު ފުރަތަމަ ހާފުގައި ކާމިޔާބުކޮށްދިނީ ސެވީނިއޯއެވެ. އެއީ ޕެނަލްޓީ އޭރިޔާ ބޭރުން ފޮނުވާލި ބާރު ހަމަލާއެއް ދިފާއު ކުރަން އުޅުމުގެ ތެރޭގައި ލުސްޓަރ ސިޓީގެ ކީޕަރުގެ އަތުގައި ޖެހިފައި ނިކުތް ބޯޅަ، ވާތް ފަރާތުން ދުރު ކަނަށް ފޮނުވާލައިގެން ކާމިޔާބުކުރި ގޯލެކެވެ.
އެ ޓީމުގެ ދެވަނަ ގޯލު ދެވަނަ ހާފުގައި ކާމިޔާބުކޮށްދިނީ އަރލިން ހާލަންޑެވެ. ހާލަންޑު ބޮލުން ކާމިޔާބުކުރި މި ގޯލަކީ، ސެވީނިއޯ މަތިން ނަގައިދިން ރީތި ހުރަހެކެވެ.
ލެސްޓަރ ސިޓީއިން ވަރުގަދަކޮށް މެޗު ފަށައި، ރަގަޅު ހަމަލާތަކެއް ސިޓީގެ ގޯލަށް އަމާޒުކޮށް ފޮނުވާލާފައިވެއެވެ. އެގޮތުން ފަކުންޑޯ ބޮނަނޯޓޭ ފޮނުވާލި ބޯޅަ ދަނޑީގައި ޖެހުނުއިރު، ޖޭމީ ވާރޑީއަށް ލިބުނު ފުރުސަތު ބޭކާރުވީ އޮފްސައިޑް ވުމުންނެވެ.
ވާޑީއަށް ލިބުނު ވަން-އޮން-ވަން ފުރުސަތު، އޭނާ އޮފްސައިޑުގައި ހުރުމުގެ ސަބަބުން ބޭކާރުވިއިރު، ސިޓީގެ ކީޕަރ ސްޓެފަން އޯރޓޭގާ ވާރޑީއަށް ފައުލް ކޮށްފައި ވުމުން، އެއީ އޮފްސައިޑް ދިދަ ނުނެގިނަމަ، ސްޓެފަން އޯރޓެގާއަށް ރަތް ކާޑަކާއެކު ލެސްޓާއަށް ޕެނަލްޓީ ލިބޭނެ ކަހަލަ ހަމަލާއެކެވެ.
ލީގުގެ އެންމެ ކުރީގައި އޮތް ލިވަޕޫލާ ދެމެދު މިހާރު 14 ޕޮއިންޓުގެ ފަރަގެއް އޮތްއިރު، ސިޓީއަށް ލީގުގެ ތަށި ދިފާއު ކުރެވޭނެ ފުރުސަތު އޮތީ ވަރަށް ހަނިވެފައެވެ. ނަމަވެސް އެ ޓީމުން ވަނީ ލެސްޓަރ އާ ދެކޮޅަށް ހޯދި ތިން ޕޮއިންޓާއެކު ލީގުގެ ފަސް ވަނައަށް ޖެހިލައި، އެއް މެޗު މަދުން ކުޅެފައިވާ، ހަތަރު ވަނައިގައި އޮތް ޗެލްސީއާ ދެމެދު އޮތް ފަރަގު 4 ޕޮއިންޓަށް ހަނިކޮށްފައެވެ.
އަނެއްކޮޅުން އައު ކޯޗު، ރޫޑް ވެން ނިސްޓެލްރޯއީއާއެކު ލެސްޓަރ މިވަނީ އެ ޓީމު އެންމެ ފަހުން ކުޅުނު ހަތަރު މެޗުން ބަލިވެފައެވެ. އަދި އެ ޓީމު މިހާރު އޮތީ ރެލިގޭޝަން ޒޯންގައެވެ.