އަބޫދާބީގައި އައު އަހަރު ފާހަގަކުރަން 6 ގިނަސް ވޯލްޑް ރެކޯޑާއެކު ދުނިޔެ ހައިރާންކޮށްލައިފި

އެކުވެރި އަރެބް އެމިރޭޓްސްގެ ވެރިރަށް އަބޫދާބީން 2024 ވަނަ އަހަރު ވަދާއުކޮށް، 2025 ވަނަ އަހަރަށް މަރުޙަބާ ކިޔުމަށް ބޭއްވި ކުލަގަދަ ޙަފްލާގައި 6 ގިނަސް ވޯލްޑް ރެކޯޑު ހަދައި، މުޅި ދުނިޔެ ހައިރާންކޮށްލައިފިއެވެ.

އަލްވަތުބާގައި ހުންނަ ޝެއިޚް ޒާއިދު ފެސްޓިވަލްގައި ބޭއްވުނު މި ޙަފްލާގައި 50 މިނެޓުގެ ދިގު މިނުގައި ބޭއްވުނު ހަވާއެރުވުމުގެ ޝޯއަކީ މިހާތަނަށް ދުނިޔޭގައި ބޭއްވުނު އެންމެ ދިގު ބަޑިބޭހުގެ ޝޯ ކަމަށް ވަނީ ރެކޯޑު ކުރެވިފައެވެ. މީގެ އިތުރުން 6،000 ޑްރޯން ބޭނުންކޮށްގެން 20 މިނެޓަށްވުރެ ގިނަ ވަގުތު ދެމިގެންދިޔަ ޑްރޯން ޝޯއެއްވެސް ބޭއްވުނެވެ.

ޝެއިޚް ޒާއިދު ފެސްޓިވަލްގެ އިތުރުން އަބޫދާބީގެ އެކި ސަރަޙައްދު ތަކުގައިވެސް ހަވާއެރުވުމުގެ ޝޯތައް ބޭއްވުނެވެ. މީގެ ތެރޭގައި ޔާސް އައިލެންޑާއި ކޯނިޝް ހިމެނެއެވެ. ޔާސް އައިލެންޑުގައި ރޭގަނޑު 9:00 އާއި 12:00 ގައި ހަވާއެރުވުމުގެ ޝޯތައް ބޭއްވުނެވެ.

ޝެއިޚް ޒާއިދު ފެސްޓިވަލްގައި ހަވާއެރުވުމުގެ އިތުރުން ލޭޒަރ ޝޯތަކާއި، ސަގާފީ ޙަރަކާތްތަކާއި، ކޮންސަޓްތަކާއި އަދި ޢާއިލާތަކަށް އަމާޒުކޮށްގެން އެކި ކުޅިވަރުތައްވެސް ބޭއްވުނެވެ. މި ފެސްޓިވަލް ފެށުނީ 2024 ވަނަ އަހަރުގެ ނޮވެމްބަރު 1 ވަނަ ދުވަހުއެވެ. އަދި މި ފެސްޓިވަލް ނިމޭނީ 2025 ވަނަ އަހަރުގެ ފެބްރުއަރީ 28 ވަނަ ދުވަހުއެވެ.

އަބޫދާބީގެ އިތުރުން އެމިރޭޓްސްގެ އެހެން ސަރަޙައްދުތަކުގައިވެސް އައު އަހަރު ފާހަގަކުރުމުގެ ގޮތުން ހަވާއެރުވުމުގެ ޝޯތައް ބޭއްވުނެވެ. މީގެ ތެރޭގައި މަދީނާ ޒާއިދު ޕަބްލިކް ޕާކާއި، ޣައިޔާތީ، އަލްމުޣީރާ ބީޗް، އަދި އަލްއައިންގެ ހައްޒާ ބިން ޒާއިދު ސްޓޭޑިއަމް ހިމެނެއެވެ.