ރާއްޖެ-ޗައިނާ މިނިވަން ވިޔަފާރީގެ އެއްބަސްވުމުގެ ސަބަބުން މަސްވެރި ސިނާއަތް ސިންދަފާތުކުރުމަށް މަގުފަހިވާނެ

ދިވެހިރާއްޖެ އާއި ޗައިނާ ދެމެދު ވެފައިވާ މިނިވަން ވިޔަފާރީގެ އެއްބަސްވުމަށް 1 ޖެނުއަރީ 2025 އިން ފެށިގެން އަމަލުކުރަން ފަށާފައިވާއިރު، މި އެއްބަސްވުމުގެ ސަބަބުން މަސްވެރި ސިނާއަތް ކުރިއަރުވައި ސިންދަފާތު ކުރުމަށް ގިނަގުނަ ފުރުސަތުތަކެއް ހުޅުވިގެން ދާނެ ކަމަށް، މިނިސްޓްރީ އޮފް ފިޝަރީޒް އެންޑް އޯޝަން ރިޒޯސަސްއިން ހާމަކޮށްފިއެވެ.

އެ މިނިސްޓްރީ އިން ނެރުނު ނޫސް ބަޔާނެއްގައިވާ ގޮތުން، މި އެއްބަސްވުމާއެކު މަސްވެރިކަމުން ޖީޑީޕީއަށް ހިއްސާކުރާ މިންވަރު އިތުރުވެގެންދާނެއެވެ. އަދި މިކަމުގެ ސަބަބުން ސީދާ މަސްވެރިޔާގެ ދިރިއުޅުމުގެ ފެންވަރު ރަގަޅު ވެގެން ދާނެއެވެ.

މީގެ އިތުރުން ސުން ޓެކުހުގައި ދުނިޔޭގެ އެންމެ ބޮޑު މާކެޓު ކަމުގައިވާ ޗައިނާއަށް އެކްސްޕޯޓު ކުރެވުމުގެ ފުރުސަތު ހުޅުވިގެން ދިއުމާއެކު ރާއްޖޭގެ އިގްތިސާދަށް ކުރިއެރުން އަންނާނެއެވެ. މިކަމުގެ ސަބަބުން ދިވެހި މަސްވެރިކަމުގެ އުފެއްދުންތަކާއި އެހެނިހެން މުދާ ރާއްޖޭގައި ޕްރޮސެސްކޮށް، އެކްސްޕޯޓްކުރުމަށް މަގުފަހިވެފައިވާތީ، އެކްސްޕޯޓް އިތުރުކުރެވުމުން ބޭރު ފައިސާ ލިބުމުގެ ފުރުސަތު އިތުރުވާނެކަމަށް އިކޮނޮމިކް މިނިސްޓްރީއިން ފާހަގަ ކުރެއެވެ. އަދި ރާއްޖޭގައި އުފެއްދުންތެރިކަން އިތުރުކުރުމަށާއި ޕްރޮސެސިން ދާއިރާ ފުޅާކުރުމަށް މަގުފަހިވެގެންދާނެކަން ވެސް ވަނީ ފާހަގަކޮށްފައެވެ.

އަދި އިގްތިސާދީ ދާއިރާ އާއި ތަރައްގީގެ އެކިއެކި ދާއިރާތަކަށް ޗައިނާގެ އެހީތެރިކަމާއި އެއްބާރުލުން ހޯދުމަށް މަގުފަހިވެގެންދާނެކަމަށް ވެސް އިކޮނޮމިކް މިނިސްޓްރީ އިން ވަނީ ފާހަގަކޮށްފައެވެ.

ރާއްޖެ އާއި ޗައިނާ އާއި ދެމެދު ވެވުނު މި އެއްބަސްވުމުގެ މަގުސަދަކީ ރާއްޖެއިން ޗައިނާއަށް މަސް އެކްސްޕޯޓު ކުރާ މިންވަރު އިތުރު ކުރުމާއި، ވިޔަފާރީގެ ހުރަސްތައް ނައްތާލުމުގެ އިތުރުން، ރާއްޖެ އާއި ޗައިނާގެ ވިޔަފާރިތަކަށް މަސްވެރިކަމާ ގުޅިގެން ވިޔަފާރީގެ އައި ފުރުސަތުތައް ތަނަވަސްކޮށްދިނުމެވެ.