ކުޅިވަރު
ގައުމީ ވޮލީބޯލް ޗެމްޕިއަންޝިޕް މިއަދު ފަށަނީ

ގައުމީ ފިރިހެން ވޮލީބޯޅަ މުބާރާތުގެ ތަށްޓާ އެކު ދިވެހި ސިފައިންގެ ކްލަބުން އުފާފާޅުކުރަނީ، ފޮޓޯ: އަބްދުﷲ އިޔާން/ އަދަދު
ހުލާސާ
ލީގު ބުރުގައި އެންމެ ފޯރިފަދަވާނެކަމަށް ބެލެވޭ، އެޗްޑީސީއާއި ޑީއެސްސީ ބައްދަލުކުރާ މެޗު ކުޅޭނީ އަންގާރަ ދުވަހުގެރޭ.
މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ 10 ޖެނުއަރީ 2025ވާ ހުކުރުދުވަހުގެ ރޭ.
މި ސީޒަންގެ ގައުމީ ވޮލީބޯލް ޗެމްޕިއަންޝިޕްގެ ފިރިހެން ޑިވިޝަންގެ މެޗުތައް މިއަދު ފަށާނެއެވެ. ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމްކުރާ މި މުބާރާތް ކުޅޭނީ ޒުވާނުންގެ މަރުކަޒުގެ އެތެރޭ ހޯލުގައެވެ.
ގައުމީ ވޮލީބޯލް ލީގުގެ ގަދަ ހަތަރު ޓީމަށް ފުރުސަތު ލިބޭ މި މުބާރާތުގައި މި ފަހަރު ވާދަކުރަނީ، ވޮލީ ލީގުގެ ޗެމްޕިއަންކަން ހޯދި ކްލަބް އެޗްޑީސީއާއި ދިވެހި ސިފައިންގެ ކްލަބް (ޑީއެސްސީ)އާއި ސްޕޯޓްސް ކްލަބް ސިޓީ އަދި ބްލޫޒް ފޯރ ވޮލީބޯލްއެވެ. މި މުބާރާތުން ފުރުސަތު ނުލިބުނީ ޕޮލިސް ކްލަބަށެވެ.
މި މުބާރާތުގައި ޓީމުތައް ލީގު އުސޫލަށް ކުޅެ، އެންމެ ގިނަ ޕޮއިންޓު ލިބޭ ޓީމަކަށް ސީދާ ފައިނަލުން ޖާގަ ލިބޭއިރު، ފައިނަލުގެ ދެވަނަ ޖާގަ ލިބޭނީ ލީގު ބުރުގެ ދެވަނަ އަދި ތިންވަނައަށްދާ ދެ ޓީމުގެ މެދުގައި ކުޅެވޭ ސެމީފައިނަލް މެޗަށްފަހުއެވެ.
މުބާރާތުގެ ފުރަތަމަ މެޗުގައި މިއަދު ކުޅޭނީ، މުބާރާތުގެ އެންމެ ފަހުގެ ޗެމްޕިއަން، ޑީއެސްސީއާއި ބްލުޒް ފޯރ ވޮލީބޯލްއެވެ. މި މެޗު ފަށާނީ މިއަދު ހަވީރު 16:30 ގައެވެ.
ލީގު ބުރުގައި އެންމެ ފޯރިފަދަވާނެކަމަށް ބެލެވޭ، އެޗްޑީސީއާއި ޑީއެސްސީ ބައްދަލުކުރާ މެޗު ކުޅޭނީ އަންގާރަ ދުވަހުގެރެއެވެ. އެއީ ލީގުގެ އެންމެ ފަހު މެޗު ވެސް މެއެވެ. ގައުމީ ލީގުގެ ތައްޓަށް ވާދަކޮށްފައި ވަނީވެސް މި ދެ ޓީމެވެ.
ގައުމީ މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ 10 ޖެނުއަރީ 2025ވާ ހުކުރުދުވަހުގެ ރެއެވެ.