ގައުމީ ވޮލީބޯލް ޗެމްޕިއަންޝިޕް: ސްޕޯޓްސް ކްލަބް ސިޓީއިން މުބާރާތުގެ އެންމެ ފަހުގެ ޗެމްޕިއަނުން ބަލިކޮށްފި

ގައުމީ ވޮލީބޯލް ޗެމްޕިއަންޝިޕްގައި ސްޕޯޓްސް ކްލަބް ސިޓީއިން، މުބާރާތް އެންމެ ފަހުން ކާމިޔާބުކޮށްފައިވާ ދިވެހި ސިފައިންގެ ކްލަބް (ޑީއެސްސީ) ސީދާ ތިން ސެޓުން ބަލިކޮށްފިއެވެ. 

ޒުވާނުންގެ މަރުކަޒުގެ އެތެރޭ ހޯލުގައި ކުރިޔަށްދާ މި މުބާރާތުގެ ލީގު ބުރުގައި އެންމެ ގިނަ ޕޮއިންޓު ހޯދާ ޓީމު ސީދާ ފައިނަލަށް ދަތުރުކުރާގޮތަށް ހަމަޖެހިފައިވާއިރު، މި މެޗު ޑީއެސްސީއަށް ގެއްލުމަކީ އެ ފުރުސަތު ހޯދުމަށް އެ ޓީމަށް އޮތް ބޮޑު ގޮންޖެހުމަކަށް ވާނެއެވެ.

ފައިނަލުގެ ދެވަނަ ޖާގަ ލިބޭނީ، ލީގު ބުރުގައި ދެވަނަ އަދި ތިންވައަށްދާ ތީމުގެ މެދުގައި ކުޅޭ ސެމީފައިނަލް މެޗުން މޮޅުވާ ޓީމަކަށެވެ.

ހޯމަ ދުވަހުގެރޭ ސްޕޯޓްސް ކްލަބް ސިޓީއިން ޑީއެސްސީ ބަލިކުރީ، ތިން ސެޓު ވެސް 19-25 ޕޮއިންޓުން ކާމިޔާބުކޮށްގެންނެވެ.

މެޗުގެ މޮޅު ކުޅުންތެރިއަކަށް ހޮވުނީ ސްޕޯޓްސް ކްލަބް ސިޓީގެ ޖާޒީ ނަންބަރު 10ކެވެ. 

މި ދެ ޓީމު ގައުމީ ވޮލީބޯލް ލީގުގައި ބައްދަލުކުރި މެޗުގެ ނަތީޖާ ނިކުމެފައިވަނީ ސީދާ އިދިކޮޅަށެވެ. އެ މެޗު ތިން ސެޓުން ކާމިޔާބުކުރީ ޑީއެސްސީއެވެ.

ހޯމަ ދުވަހު ކުޅުނު އަނެއް މެޗުގައި ބައްދަލުކޮށްފައިވަނީ ކްލަބް އެޗްޑީސީ އާއި ބްލޫޒް ފޯރ ވޮލީބޯލްއެވެ. އެ މެޗު ތިން ސެޓުން ކާމިޔާބުކުރީ އެޗްޑީސީއެވެ.

މި މެޗުގައި ބްލޫޒް ފޯރ ވޮލީބޯލް އިން ރަގަޅަށް ކުޅުނު ނަމަވެސް، އެ ޓީމަށް އެއްވެސް ސެޓެއް ކާމިޔާބުކުރެވިފައެއް ނުވެއެވެ.

އެޗްޑީސީއިން މެޗުގެ ސެޓުތައް ގެންދިޔައީ 25-21، 25-17 އަދި 25-21 ޕޮއިންޓުންނެވެ. 

މެޗުގެ މޮޅު ކުޅުންތެރިއަކަށް ހޮވުނީ އެޗްޑީސީގެ ޖާޒީ ނަންބަރު 4، އަލީ ނިމާލްއެވެ.

މުބާރާތުގެ ލީގު ބުރުގެ ފަހު މެޗުތަށް މިއަދު ކުޅުމަށް ހަމަޖެހިފައިވާއިރު، ފުރަތަމަ މެޗުގައި ބައްދަލުކުރާނީ ބްލޫޒް ފޯރ ވޮލީބޯލް އާއި ސްޕޯޓްސް ކްލަބް ސިޓީއެވެ. އަދި ދެވަނަ މެޗުގައި ބައްދަލުކުރާނީ ޑީއެސްސީ އާއި އެޗްޑީސީއެވެ.