ދުނިޔެ
އުތުރު ކޮރެއާގައި ވަރިވާ ދެމަފިރިންނަށް ހަމަހުގެ ޖަލު ހުކުމެއް

ނޯތު ކޮރެއާގައި ވަރިވާ ދެމަފިރިންނަށް ހަމަހުގެ ޖަލު ހުކުމެއް ފޮޓޯ:އިންޓަނެޓް
އުތުރު ކޮރެއާގެ ލީޑަރ ކިމް ޖޮންގް އުން ވަނީ ވަރިވާ ފިރިހެނުންނާއި އަންހެނުންނަށް 6 މަސްދުވަހުގެ މުއްދަތަށް ޖަލަށްލާ މަޖުބޫރު މަސައްކަތުގެ ކޭމްޕްތަކަށް ފޮނުވުމަށް އަމުރުކޮށްފައެވެ. މީގެ އިތުރުން، އަންހެނުންނަށް އިތުރު އަދަބު ކަނޑައެޅުމުގެ ފުރުސަތު އޮތް ކަމަށް ވެސް ބެލެވެއެވެ.
ކިމް ޖޮންގް އުންގެ ނަޒަރުގައި، ކައިވެނި ރޫޅާލުމަކީ ސޯޝަލިސްޓް އައިޑިއޮލޮޖީއާ ޚިލާފު ޚިޔާލުތަކެއް ހުރިކަން ދައްކުވައިދޭ ކަމެކެވެ. އެހެންކަމުން، އެކަމަށް އަދަބު ދިނުމަކީ މުހިންމު ކަމެއް ކަމުގައި އޭނާ ދެކެއެވެ. މި އައު ޤާނޫނަކީ ކުރިން އޮތް ޤާނޫނަށް ވުރެ މާ ހަރުކަށި ޤާނޫނެކެވެ. ކުރީގެ ޤާނޫނުގެ ދަށުން އަދަބު ދެވެނީ ހަމައެކަނި ވަރިވުމަށް އެދޭ ފަރާތަށެވެ.
ރޭޑިއޯ ފްރީ އޭޝިއާ (އާރްއެފްއޭ) އިން ރިޕޯޓުކޮށްފައިވާ ގޮތުގައި، މި އައު ޤަވާޢިދުގެ ދަށުން ވަރިވާ ދެމަފިރިންނަށް ވެސް ޖަލު ޙުކުމް އިއްވޭނެއެވެ. ރިޔަންގަންގް ޕްރޮވިންސްގެ ރައްޔިތެއްގެ ބަހުން، ކިމްޖޮންގްސުކް ކައުންޓީ ޕީޕަލްސް ކޯޓުން 12 މީހަކަށް ވަރީގެ ޙުކުމް އިއްވުމަށްފަހު، އެ މީހުން ވަގުތުން ކައުންޓީގެ މަޖުބޫރު މަސައްކަތުގެ ކޭމްޕަށް ފޮނުވާލެވުނެވެ.
އެ ރައްޔިތު އިތުރަށް ބުނެފައިވަނީ، މި މަހުން ފެށިގެން ވަރިވާ ހުރިހާ ދެމަފިރިން މަޖުބޫރު މަސައްކަތުގެ ކޭމްޕްތަކަށް ފޮނުވޭނެ ކަމަށެވެ. ކޮރެއާގެ ސަގާފަތުގައި ވަރިވުމަކީ ހަމައެކަނި ސޯޝަލިޒަމާ ދެކޮޅު ކަމެއް ނޫނެވެ. އުތުރާއި ދެކުނުގެ ވިސްނުމާ ގުޅިފައިވާ ކޮންފިއުޝަން އަގީދާއާ ވެސް ފުށުއަރާ ކަމެއްގެ ގޮތުގައި ބެލެވެއެވެ.
އާރްއެފްއޭ އިން ރިޕޯޓުކޮށްފައިވާ ގޮތުގައި، ކޮވިޑް-19 ގެ ސަބަބުން ލޮކްޑައުންގެ ހާލަތުގައި ދެމަފިރިންގެ މެދުގައި މާލީ ގޮތުން ދަތިތަކެއް ކުރިމަތިވުމާ ގުޅިގެން ވަރީގެ ނިސްބަތް އިތުރުވެފައިވެއެވެ. ނަމަވެސް މިކަމާ ގުޅޭ ސީދާ ތަފާސްހިސާބުތަކެއް ލިބެން ނެތެވެ. މިހާރު ރައްޔިތުންނަށް ޢާންމުކޮށް މަލާމާތްކުރުމާއި ކޮރެއާ ވަރކާސް ޕާޓީން ބޭރުކުރުމުގެ އިންޒާރު ދެވުނު ނަމަވެސް، ވަރީގެ ނިސްބަތް މާބޮޑަށް ދަށްވެފައެއް ނުވާކަން ފާހަގަކުރެވެއެވެ.