މެރިޓައިމް ދާއިރާއިން އެމްއެސްއެސްއިން 2 ސްކޮލަރޝިޕް ފުރުސަތު ހުޅުވާލައިފި

ރާއްޖޭގެ މެރިޓައިމް ދާއިރާ ފުޅާކޮށް ތަރައްޤީކުރުމަށް ކުރެވެމުންދާ މަސައްކަތުގެ ދަށުން، މޯލްޑިވްސް ސްޓޭޓް ޝިޕިންގް (އެމްއެސްއެސް) އިން މެރިޓައިމް ދާއިރާއިން 2 ސްކޮލަރޝިޕް ފުރުސަތެއް ހުޅުވާލައިފިއެވެ. މި ފުރުސަތުތަކަކީ އެމްއެސްއެސްގެ ސްކޮލަރޝިޕް ޕްރޮގްރާމް 'ކަލާސީން' ގެ ދަށުން ހުޅުވާލާފައިވާ ފުރުސަތުތަކެކެވެ.

މި ސްކޮލަރޝިޕްތަކުގެ ދަށުން މެލޭޝިއާގައި ޑިޕްލޮމާ ފެންވަރުގެ ދެ ކޯހެއް  ކިޔެވުމުގެ ފުރުސަތު ލިބިގެންދާނެއެވެ. އެއީ ޑިޕްލޮމާ އިން މެރިން އިންޖިނިއަރިންގ އާއި ޑިޕްލޮމާ އިން ނޯޓިކަލް ސްޓަޑީސްގެ ކޯސްތަކެވެ. މި ކޯސްތަކުގެ މުއްދަތަކީ 3 އަހަރާއި 4 މަސް ދުވަސްކަމަށް އެމްއެސްއެސްއިން މަޢުލޫމާތު ދެއްވާފައިވެއެވެ.

މި ސްކޮލަރޝިޕްތަކަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި އޯ-ލެވެލް 5 މާއްދާއިން ފާސްވެފައިވުމާއި، ސިއްޙީ އެއްވެސް މައްސަލައެއް ނެތުމާއި، ލޮލުގެ ފެނުމުގައި އެއްވެސް މައްސަލައެއް ނެތުން ހިމެނެއެވެ. އަދި ކޯސް ފުރިހަމަކުރުމަށްފަހު އެމްއެސްއެސްގައި 18 މަސްދުވަހު މަސައްކަތްކުރަން ޖެހޭނެކަމަށްވެސް އެމްއެސްއެސްއިން ބަޔާންކޮށްފައިވެއެވެ.

މި ސްކޮލަރޝިޕްތަކަށް އެދި ހުށަހެޅުމުގެ ސުންގަޑިއަކީ މި މަހުގެ 21 ވަނަ ދުވަހެވެ. ޤައުމީ ޝިޕިންގް ކުންފުނި އެމްއެސްއެސް އުފެދުމަށްފަހު، ރާއްޖޭގެ ޝިޕިންގް ދާއިރާ ހަރުދަނާކުރުމަށް ގިނަ މަސައްކަތްތަކެއް ކުރަމުންދާކަން ފާހަގަކުރެވެއެވެ. މީގެ ތެރޭގައި މީހުން ބިނާކުރުމާއި، ކުންފުނީގެ ދަތުރުތައް އިތުރުކޮށް ވިޔަފާރި ފުޅާކުރުން ހިމެނެއެވެ.