ގައުމީ ވޮލީބޯލް ޗެމްޕިއަންޝިޕްގެ ފައިނަލުގެ ސީދާ ޖާގަ އެޗްޑީސީއިން ހޯދައިފި

ގައުމީ ވޮލީބޯލް ޗެމްޕިއަންޝިޕްގެ ފައިނަލުގެ ސީދާ ޖާގަ ކްލަބް އެޗްޑީސީއިން ހޯދައިފިއެވެ. އެ ކްލަބުން ލީގު ބުރުގެ އެއްވަނަ ހޯދީ ކުޅުނު ތިން މެޗުން 7 ޕޮއިންޓު ހޯދައިގެންނެވެ.

މުބާރާތް ރޭވިފައިވާ ގޮތުން، ލީގު ބުރުގެ އެއްވަނައަށް ދާ ޓީމު ދަތުރުކުރާނީ ސީދާ ފައިނަލަށެވެ. އަދި ފައިނަލުގައި ކުޅޭ ދެވަނަ ޓީމު ކަނޑައަޅަނީ، ލީގު ބުރުގެ ދެވަނައަށާއި ތިންވަނައަށްދާ ޓީމުގެ މެދުގައި ކުޅޭ ސެމީފައިނަލް މެޗަކަށްފަހުއެވެ.

އެގޮތުން، ސެމީ ފައިނަލް މެޗުގައި ބައްދަލުކުރާނީ، ލީގު ބުރުގެ ދެވަނައަށް ދިޔަ ސްޕޯޓްސް ކްލަބް ސިޓީ އާއި ތިންވަނައަށް ދިޔަ ދިވެހި ސިފައިންގެ ކްލަބް (ޑީއެސްސީ)އެވެ. ލީގު ބުރުން ސްޕޯޓްސް ކްލަބް ސިޓީއަށް 6 ޕޮއިންޓު ލިބިފައިވާއިރު ޑީއެސްސީއަށް ލިބިފައިވަނީ 5 ޕޮއިންޓެވެ.

އެޗްޑީސީއިން ފައިނަލަށް ކުރި ދަތުރުގައި އެ ޓީމު ވަނީ ސްޕޯޓްސް ކްލަބް ސިޓީއާއި، ބްލޫޒް ފޯރ ވޮލީބޯލްއާ ދެކޮޅަށް ކުޅުނު މެޗުތަކުން މޮޅުވެފައެވެ. ނަމަވެސް ޑީއެސްސީއާ އަންގާރަ ދުވަހުގެރޭ ބައްދަލުކުރި މެޗުގައި އެ ޓީމުން ކުރިމަތިލާންޖެހުނީ ނާކާމިޔާބާއެވެ. އެއީ އެ ކްލަބު މި ސީޒަނުގައި ބަލިވި ފުރަތަމަ މެޗެވެ. 

ލީގު ބުރުގެ ފަހު މެޗުގައި ޑީއެސްސީއިން އެޗްޑީސީ ބަލިކުރީ ފަހަތުން އަރައި 3-2 ސެޓުންނެވެ. މި މެޗުގެ ފުރަތަމަ ދެ ސެޓު ފަސޭހަކޮށް އެޗްޑީސީއަށް ކާމިޔާބު ކުރެވުނު ނަމަވެސް، ޑީއެސްސީއިން ވަނީ ފަހު ސެޓުތަކުގައި ކުޅުން ރަގަޅުކޮށްފައެވެ.

އެޗްޑީސީއިން މެޗުގެ ފުރަތަމަ ދެ ސެޓު 25-13 އަދި 25-21 ޕޮއިންޓުން ކާމިޔާބުކުރިއިރު، ޑީއެސްސީއިން ފަހު ތިން ސެޓު ކާމިޔާބުކުރީ 25-21، 30-18 އަދި 15-12 ޕޮއިންޓުންނެވެ. މެޗުގެ 4ވަނަ ސެޓުގައި މެޗު ނިންމާލުމަށް ގިނަ އެޑްވަންޓޭޖުތަކެއް އެޗްޑީސީއަށް ލިބުނު ނަމަވެސް، އެ ފުރުސަތުތަކުގެ ބޭނުން އެ ޓީމަށް ކުރެވިފައެއް ނުވެއެވެ.

މި މުބާރާތުގައި އަންގާރަ ދުވަހުގެ ހަވީރު ބައްދަލުކޮށްފައިވަނީ ސްޕޯޓްސް ކްލަބް ސިޓީއާއި ބްލޫޒް ފޯރ ވޮލީބޯލްއެވެ. އެ މެޗު ސީދާ ތިން ސެޓުން ކާމިޔާބުކުރީ ސްޕޯޓްސް ކްލަބް ސިޓީއެވެ.

މުބާރާތުގެ ސެމީ ފައިނަލް މެޗު ކުޅުމަށް ހަމަޖެހިފައިވަނީ މާދަމާ ރެއެވެ.