ގައުމީ ވޮލީ މުބާރާތް: ސިޓީ ކަޓުވާލައި ފައިނަލުން ޖާގަ ހޯދީ ޑީއެސްސީ

ގައުމީ ވޮލީބޯލް ޗެމްޕިއަންޝިޕްގެ ސެމީފައިނަލް މެޗު ކާމިޔާބުކޮށް، ފައިނަލުގެ ފަހު ޖާގަ، މުބާރާތުގެ އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބް (ޑީއެސްސީ) އިން ހޯދައިފިއެވެ.

މުބާރާތުގެ ފޯމުޓެ އެކުލަވާލާފައިވާ ގޮތުން، ލީގު ބުރުގެ އެއްވަނަ ޓީމު ސީދާ ފައިނަލަށް ދަތުރުކުރާއިރު، ފައިނަލަށްދާ ދެވަނަ ޓީމެއް ކަނޑައަޅަނީ، ލީގު ބުރުގެ ދެވަނަ އަދި ތިންވަނަ ޓީމުގެ މެދުގައި ކުޅޭ ސެމީފައިނަލް މެޗަކަށްފަހުއެވެ.

އެގޮތުން ސެމީފައިނަލްގައި ބުރާސްފަތި ދުވަހުގެރޭ ސްޕޯޓްސް ކްލަބް ސިޓީއާއި ޑީއެސްސީ ބައްދަލުކުރި މެޗު ޑީއެސްސީ އިން ކާމިޔާބުކުރީ ސީދާ ތިން ސެޓުންނެވެ. އެ ޓީމުން ސެޓުތައް ކާމިޔާބުކޮށްފައިވަނީ 25-22، 25-22 އަދި 25-15 ޕޮއިންޓުންނެވެ.

މުބާރާތުގެ ފައިނަލް މެޗު މިރޭ ކުޅުމަށް ހަމަޖެހިފައިވާއިރު، މި މެޗުގައި ޑީއެސްސީއިން ނިކުންނާނީ، ޤައުމީ ވޮލީބޯލް ލީގު ކާމިޔާބުކުރި ކްލަބް އެޗްޑީސީއާ ދެކޮޅަށެވެ. މެޗު ފަށާނީ މިރޭ 08:30 ގައެވެ.