ކްލަބް އެޗްޑީސީގެ އުއްމީދަތަކަށް ހުރަސްއަޅައި ޑީއެސްސީއިން ގައުމީ ތަށި ދިފާއުކޮށްފި

 ވޮލީބޯލް ސީޒަންގެ ހުރިހާ ތައްޓެއް ހޯދުމުގެ އަޒުމުގައި ރޭ ކުޅުނު ގައުމީ ވޮލީބޯލް މުބާރާތުގެ ފައިނަލަށް ނިކުތް ކްލަބް އެޗްޑީސީއަށް އެކަން ހާސިލްވިޔަ ނުދީ، ދިވެހި ސިފައިންގެ ކްލަބް (ޑީއެސްސީ) އިން ގައުމީ ތަށި ދިފާއުކޮށްފިއެވެ.

މި ސީޒަންގެ ފުރަތަމަ ދެ މުބާރާތް ކަމުގައިވާ އެސޯސިއޭޝަން ކަޕާއި ގައުމީ ލީގު ކާމިޔާބުކުރުމަށްފަހު، ގައުމީ މުބާރާތުގެ ލީގު ބުރުން އެއްވަނަ ހޯދާ ފައިނަލަށް ދަތުރުކުރުމުން، އްޗެޑީސީ އިން ސީޒަންގެ ތިން ތަށި ހޯދާނެކަމަށް ވަރަށް ބޮޑަށް ގަބޫލުކުރެވުނެވެ. އެ ޓީމު ފެނުނީ އެހާވެސް ވަރުގަދަ ކޮށެވެ.

އަދި ގައުމީ މުބާރާތުގެ ލީގު ބުރުގައި ވެސް އެޗްޑީސީ އިން ވަނީ ޑީއެސްސީ 3-2 ސެޓުން ބަލިކޮށްފައެވެ. މީގެ އިތުރުން ލީގު ބުރުގައި ސްޕޯޓްސް ކްލަބް ސިޓީ އަތުން ޑީއެސްސީ ބަލިވުމަކީ ވެސް، އެޗްޑީސީކޮޅަށް ގައުމީ ތަށި ބުރަވާނެކަމަށް ބެލެވުނު ސަބަބެކެވެ.

މި އަޒުމުގައި އެޗްޑީސީއިން ފައިނަލް މެޗު ފެށީ ރަނގަޅަށެވެ. އަދި މެޗުގެ ފުރަތަމަ ސެޓު 25-17 ޕޮއިންޓުން ކާމިޔާބުކުރީ ވެސް އެ ޓީމެވެ.

ހާލަތު ބަދަލުވާން ފެށީ މެޗުގެ ދެވަނަ ސެޓަށް ފަހުއެވެ. އެ ސެޓުން ފެށިގެން ޑީއެސްސީއިން ވަނީ އެ ޓީމުގެ ކުޅުން ރަގަޅުކޮށް، ދެން ކުޅުނު ތިން ސެޓު ކާމިޔާބުކޮށްފައެވެ. އެ ސެޓުތައް ޑީއެސްސީއިން ކާމިޔާބުކުރީ، 21-25، 16-25 އަދި 23-25 ޕޮއިންޓުންނެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ ޑީއެސްސީގެ ހުސެއިން ރަޒާންއެވެ.

މުބާރާތުގެ މޮޅު ކުޅުންތެރިންނަށް ހޮވުނީ ޑީއެސްސީގެ ހުސައިން ރަޒާން އާއި އެ ޓީމުގެ ސެޓަރު ހުސައިން ޝާހިދުގެ އިތުރުން އެޗްޑީސީގެ އިސްމާޢީލް ސާޖިދު (ކުޑަކާއްޓޭ) އެވެ.

މުބާރާތުގެ 19 އަހަރުން ދަށުގެ އެންމެ މޮޅު ކުޅުންތެރިއަކަށް ހޮވުނީ ބްލޫސް ފޯރ ވޮލީބޯލްގެ އަޙްމަދު އިލްހާމް އަލީއެވެ. އަދި މުބާރާތުގެ އެންމެ މޮޅު ބިދޭސީ ކުޅުންތެރިއަކަށް ސިފައިންގެ ކުލަބުގެ މުޙައްމަދު ހަމަދު  ހޮވުނުއިރު އެންމެ މޮޅު ކޯޗަކީ އެ ޓީމުގެ މުމްތާޒްއެވެ.

ވޮލީ ސީޒަންގެ ތިން ތަށި އެއް ސީޒަނެއްގައި މިހާތަނަށް ކާމިޔާބުކޮށްފައިވަނީ ޑީއެސްސީ އާއި ސްޕޯޓްސް ކްލަބް ސިޓީއެވެ. ޑީއެސްސީއިން އެކަން 2010 ވަނަ އަހަރު ހާސިލްކުރިއިރު، ސިޓީއިން އެ ކާމިޔާބީ ހާސިލްކުރީ 2022 ގައެވެ.