ކޮޕް28 ސަމިޓަށްފަހު ރާއްޖޭގައި އިއާދަކުރަނިވި ހަކަތަ އުފައްދާ މިންވަރުން 17 މެގަވޮޓް އިތުރުކޮށްފި

އިއާދަކުރަނިވި ހަކަތައާ ގުޅޭ ގޮތުން ކޮޕް28 ސަމިޓުގައި ރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައެޅުއްވި އުއްމީދީ އަމާޒަށްފަހު، މިހާތަނަށް ރާއްޖެއިން އެ ހަކަތަ އުފައްދާ މިންވަރު 17 މެގަވޮޓް އިތުރުކޮށްފައިވާކަމަށް، މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ، ޠާރިޤު އިބްރާޙިމް ވިދާޅުވެއްޖެއެވެ.

މިނިސްޓަރ ޠާރިޤު މިހެން ވިދާޅުވީ، އަބޫދާބީގައި މިހާރު ކުރިޔަށްދާ އިންޓަނޭޝަނަލް ރިނިއުބަލް އެނާޖީ އެޖެންސީ (އިރީނާ)ގެ 15ވަނަ ސެޝަންގައި ވާހަކަފުޅުދައްކަވަމުންނެވެ.

މިނިސްޓަރުގެ ވާހަކަފުޅުގައި ފާހަގަކޮށްފައިވާ ގޮތުގައި، ފާއިތުވި އަހަރެއްހާ ދުވަހުގެ ތެރޭގައި ރާއްޖޭގައި އިއާދަކުރަނިވި ހަކަތަ އުފައްދާ މިންވަރު ވަނީ 53 މެގަވޮޓުން 70 މެގަވޮޓަށް އިތުރުކުރެވިފައެވެ.  

2023 ވަނަ އަހަރުގެ ޑިސެންބަރުގައި އޮތް ކޮޕް ސަމިޓުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، އެ މަނިކުފާނުގެ އަމާޒަކީ 2028 ވަނަ އަހަރު އަންނަންވާއިރަށް ރާއްޖޭގައި ބޭނުންކުރާ ހަކަތައިގެ %33 އިއާދަކުރަނިވި ހަކަތައަށް ބަދަލުކުރުމެވެ. 

މިކަން ހާސިލްކުރުމަށް، ރާއްޖޭގައި އިއާދަކުރަނިވި ހަކަތަ އުފައްދާ މިންވަރު އަދި 170 މެގަވޮޓު އިތުރުކުރަން ޖެހެއެވެ.

މޫސުމީ ބަދަލުތަކަކީ ރާއްޖެފަދަ ކުދި ގައުމުތަކަށް އޮތް ބޮޑު ގޮންޖެހުމަކަށް ވީހިނދު، މިނިސްޓަރުގެ ވާހަކަފުޅުގައި ވަނީ 1.5 ޑިގްރީ ގޯލަށް ވާސިލްވުމަށް ކުރަންޖެހޭ ކަންކަމަށް އިސްކަމެއްދިނުމަށް ގޮވާލައްވާފައެވެ. އެ ގޯލުގައި ބުނާ ގޮތުން، ދުނިޔޭގެ އެންމެން އެކުވެގެން އިންސާނުންނާއި އަދި ދުނިޔޭގެ މުސްތަޤްބަލު ރައްކާތެރިކުރަން މިހާރުން މިހާރަށް މަސައްކަތްކުރަން ޖެހެއެވެ.

މިނިސްޓަރ ޠާރިޤުގެ އިތުރުން، މި އެސެންބްލީގައި ވަނީ ދިވެހިރާއްޖެއިން އަބޫދާބީއަށް ކަނޑައަޅާފައި ހުންނަ ސަފީރު، މުޙައްމަދު ޙުސެއިން ޝަރީފާއި، ޑިރެކްޓަރ ޖެނެރަލް އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ، އަލްފާޟިލް އަޙުމަދު ޢަލީ ބައިވެރިވެވަޑައިގެންފައެވެ.