ޖެފް ބެޒޯސްގެ ބްލޫ އޮރިޖިންގެ ރޮކެޓް ދަތުރު ފަސްކޮށްފި

ދުނިޔޭގެ އެންމެ މުއްސަނދި މީހުންގެ ތެރޭގައި ހިމެނޭ އެމެޒޯންގެ ބާނީ ޖެފް ބެޒޯސްގެ ބްލޫ އޮރިޖިން ކުންފުނިން ފްލޮރިޑާއިން ދަތުރެއް ފެށުމަށް ހަމަޖެހިފައިވާ "ނިއު ގްލެން" ރޮކެޓުގެ ދަތުރު ފަސްކޮށްފިއެވެ. މި ދަތުރު ފަސްކުރަން ޖެހުނީ ރޮކެޓުގެ ސަބްސިސްޓަމެއްގައި މައްސަލައެއް ދިމާވުމާ ގުޅިގެންނެވެ.

ބްލޫ އޮރިޖިންގެ މި ރޮކެޓަކީ އަލުން ބޭނުންކުރެވޭ ރޮކެޓެކެވެ. މި ރޮކެޓު ދަތުރަށް ފުރުމަށް ތާވަލުކޮށްފައިވަނިކޮށް، އެކި ފަހަރު މަތިން ލަސްކުރަން ޖެހުނެވެ. ޖެފް ބެޒޯސްގެ އަމާޒަކީ އޭނާގެ ކުންފުނި އިލޮން މަސްކްގެ ސްޕޭސްއެކްސްއާ ވާދަކުރެވޭ ފެންވަރަށް ގެންދިއުމެވެ.

"ނިއު ގްލެން" ރޮކެޓުގެ ނަން ކިޔާފައިވަނީ ދުނިޔެ ބުރުޖަހާލި ފުރަތަމަ އެމެރިކާ މީހާ ކަމުގައިވާ ޖޯން ގްލެންގެ ނަމުންނެވެ. މި ރޮކެޓު ދަތުރު ފެށުމުން، އެޓްލާންޓިކް ކަނޑުގައި ހަދާފައިވާ ޕްލެޓްފޯމެއްގައި ޖައްސާގޮތަށް ވަނީ ފަރުމާކޮށްފައެވެ. މި ޕްލެޓްފޯމުގެ ނަން ކިޔާފައިވަނީ ޖެފް ބެޒޯސްގެ މަންމަގެ ނަމުންނެވެ.

މި ރޮކެޓުގެ ދަތުރު އަލުން ތާވަލުކުރާނެ ދުވަހެއް އަދި އިޢުލާނުކޮށްފައެއް ނުވެއެވެ. ނަމަވެސް ބްލޫ އޮރިޖިންއިން ބުނެފައިވަނީ ރޮކެޓުގެ މައްސަލަ ހައްލުކުރުމަށްފަހު އަވަހަށް ދަތުރު ފެށޭތޯ މަސައްކަތްކުރާނެ ކަމަށެވެ.