2025 "ޕްލެނެޓަރީ އެލައިންމަންޓް" : ގިނަ ޕްލެނެޓްތަކެއް އެއްތަނަކަށް އެއްވަނީ

2025 ވަނަ އަހަރު ފެށުމާއެކު އުޑުމަތީގައި ފެންނަން ފެށި މީޓިއަރ ޝަވަރުގެ އިތުރުން، އަންނަ 21 ޖެނުއަރީގައި އުޑުމަތީގައި ފެންނާނެ އިތުރު ޚާއްޞަ މަންޒަރަކަށް ތައްޔާރުވުމަށް ތަރިތައް ދިރާސާކުރާ ފަރާތްތަކުން އިލްތިމާސްކޮށްފިއެވެ.

ސްޓާވޯކް.ސްޕޭސްއިން މަޢުލޫމާތު ދީފައިވާ ގޮތުގައި، 21 ޖެނުއަރީގައި އިރުގެ އެއް ފަރާތެއްގައި ގިނަ އަދަދެއްގެ ޕްލެނެޓްތައް އެއްތަނަކަށް އެއްވާނެއެވެ. މިއީ "ޕްލެނެޓަރީ އެލައިންމަންޓް" ގެ ނަމުން މަޝްހޫރު މަންޒަރެކެވެ.

މި މަންޒަރުގައި މާސް، ޖުޕިޓަރ، ޔުރޭނަސް، ނެޕްޓިއުން، ވީނަސް އަދި ސެޓަރން ހިމެނޭނެއެވެ. މީގެ ތެރެއިން މާސް، ޖުޕިޓަރ، ވީނަސް އަދި ސެޓަރން ލޯމައްޗަށް ފެންނާނެއެވެ. އެހެންނަމަވެސް ނެޕްޓިއުން އަދި ޔުރޭނަސް ފެންނާނީ ވަރުގަދަ ބައިނޯކިއުލާއެއް ނުވަތަ ޓެލެސްކޯޕެއް މެދުވެރިކޮށެވެ.

މި މަންޒަރު އެންމެ ރީތިކޮށް ފެންނާނީ އުސް ޢިމާރާތްތަކާއި ފަރުބަދަތަކުގެ ހުރަސް ނެތް ހުޅުވިފައިވާ ސަރަޙައްދުތަކުންނެވެ. އަދި ދުނިޔޭގެ ގިނަ ހިސާބުތަކުން މި މަންޒަރު އެންމެ ރަނގަޅަށް ފެންނާނީ 21 ޖެނުއަރީގައި ކަމަށްވީ ނަމަވެސް، ވަކި ސަރަޙައްދުތަކުގައި އެންމެ ރަނގަޅަށް ފެންނަ ވަގުތު ތަފާތުވެދާނެއެވެ.

މި އަހަރުގެ ތެރޭގައި މިފަދަ އިތުރު މަންޒަރުތައް ފެނިގެންދާނެ ކަމަށް ތަރިތައް ދިރާސާކުރާ ފަރާތްތަކުން ބުނެއެވެ. އޭގެ ތެރޭގައި 28 ފެބްރުއަރީ، 15 އޭޕްރީލް އަދި 11 އޯގަސްޓްގައި ފެންނާނެ ޕްލެނެޓްތަކުގެ ޚާއްޞަ މަންޒަރުތައް ހިމެނެއެވެ.