Ads by Exprox

ޚަބަރު

ބިމުގެ މައްސަލައަށް ޙައްލެއް ހޯދުމަށް މަޑުއްވަރީ އާއި މީދޫގެ އިޙްތިޞާޞް އިތުރުކޮށްފި

ބިމުގެ މައްސަލައަށް ޙައްލެއް ހޯދުމަށް މަޑުއްވަރީ އާއި މީދޫގެ އިޙްތިޞާޞް އިތުރުކޮށްފި

ރައީސުލްޖުމްހޫރިއްޔާ މަޑުއްވަރީ ރައްޔިތުންނާ ބައްދަލުކުެއްވުން، ފޮޓޯ: ރައީސް އޮފީސް

މިފްތާޙް މުޙައްމަދު

މިފްތާޙް މުޙައްމަދު

22 ޖެނުއަރީ 2025، 08:29

22 ޖެނުއަރީ 2025، 08:29

ހުލާސާ

ރައީސުލްޖުމްހޫރިއްޔާ ނިންމެވީ ރ. މަޑުއްވަރީގެ އިޚްތިޞާޞްގައި އުފުލަންދޫ، އަދި ރ. މީދޫގެ އިޚްތިޞާޞްގައި ތާވަތާ ހިމެނުމަށް.

ރ. މަޑުއްވަރީ އާއި އެ އަތޮޅު މީދޫއަށް ކުރިމަތިވެފައިވާ ބިމުގެ މައްސަލައަށް ޙައްލެއް ހޯދުމުގެ ގޮތުން، އެ ދެ ރަށުގެ އިޙްތިޞާޞް އިތުރުކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައި، އެކަން އިޢުލާންކުރައްވައިފިއެވެ. އެ މަނިކުފާނު މިކަން އިޢުލާންކުރެއްވީ ރ. އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ޒިޔާރަތުގެ ތެރެއިން، މަޑުއްވަރީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

މި ދެ ރަށުގައި ބިމުގެ ދަތިކަން ދިމާވެފައިވާއިރު، ފަޅުގައި ވެސް ޖާގަ ނެތުމުން، ބިން ހިއްކަން ނިންމިކަމުގައިވީނަމަވެސް، މިކަމަށް އޮތީ ނިސްބަތުން ކުޑަ ޖާގައެކެވެ. 

އެހެންނަމަވެސް، މަޑުއްވަރީގެ ބިން ހިއްކުމުގެ މަޝްރޫޢު މި އަހަރުގެ ބަޖެޓުގައި ހިމަނައި،  އެ މަޝްރޫޢުގެ ޢަމަލީ މަސައްކަތް މި އަހަރު ފައްޓަވާނޭކަމަށް ރައީސުލްޖުމްހޫރިއްޔާ ވަނީ ވިދާޅުވިއެވެ. އަދި މި މަޝްރޫޢުގެ ތެރެއިން، ކުރިން އެ ރަށުގައި ހަދާފައިވާ ބަނދަރު ބެކްފިލްނުކޮށް ހުރުމުން އެކަން ކުރުމާއި، ގިރާ ސަރަޙައްދު ހިމާޔަތްކުރުމާއި، ބަނދަރުގެ ބޭރު ތޮށި ވެހިކަލަށް ވަދެވޭ ގޮތަށް ހެދުމުގެ މަސައްކަތް ކުރައްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

އަދި އެ މަނިކުފާނު ވިދާޅުވީ، ރަށުގައި އިޤްތިޞާދީ މަސައްކަތްތައް ކުރާ ތަންތަން ރަށުން ބޭރަށް ބަދަލުކުރުމަކީ، ޢާންމު ސިއްޙަތަށްވެސް އޮތް އެންމެ ރަނގަޅު ޙައްލުކަމަށާއި، އެކަމުން ރަށުގައި ބިން އިތުރުކުރުމަށް ވެސް މަގުފަހިވެގެންދާނެކަމަށެވެ. އެގޮތުން، ރ. މަޑުއްވަރީގެ އިޚްތިޞާޞްގައި އުފުލަންދޫ، އަދި ރ. މީދޫގެ އިޚްތިޞާޞްގައި ތާވަތާ ހިމެނުއްވުމަށް ނިންމަވާފައިވާކަން ރައީސުލްޖުމްހޫރިއްޔާ އިޢުލާންކުރެއްވިއެވެ.

އަދި މިކަމާ ގުޅިގެން ޤާނޫނީ ގޮތުން ކުރަންޖެހޭ ކަންކަން ނިމުމުން، މީހުން ދިރިއުޅޭ ސަރަހައްދެއްގައި ހުންނަން ނުޖެހޭ ހުރިހާ ތަނެއް އެރަށްތަކަށް ބަދަލުކުރެއްވުމަށް ރައީސުލްޖުމްހޫރިއްޔާ އެދިވަޑައިގަތެވެ. 

މީގެ އިތުރުން، މި މަހުގެ ތެރޭގައި ހައުސިންގ މަޝްރޫޢު ހިންގައިދޭނޭ ފަރާތެއް ހޯދުމަށް އިޢުލާން ކުރާނީ އެ ރަށް ވެސް ހިމެނޭހެން ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

މި ލިޔުން ކިޔާލުމުން

Ads by MSS