ޚަބަރު
ފިޝަރީޒް ކޮންޕްލެކްސްއާއެކު އިހަވަންދޫގައި 150 ވަޒީފާ އުފެދޭނެ: ރައީސުލްޖުމްހުރިއްޔާ

ރައީސުލްޖުމްހޫރިއްޔާ، ހއ. އިހަވަންދޫގައި ކޯލްޑް ސްޓޯރޭޖު ފެސިލިޓީ ތަރައްޤީ ކުރުމުގެ މަޝްރޫޢު ފެށުމުގެ ރަސްމިއްޔާތުގައި ބައިވެރިވެވަޑައިގަތުން، ފޮޓޯ: ރައީސް އޮފީސް
ހުލާސާ
މިއީ 474 މިލިއަން ރުފިޔާގެ ޕްރޮޖެކްޓެއް.
މި މަޝްރޫޢުގެ ދަށުން 1000 ޓަނުގެ ކޯލްޑް ސްޓޯރޭޖަކާއި 50 ޓަނުގެ ބްރައިން ފްރީޒިން ފެސިލިޓީއެއް ތަރައްޤީކުރާނެ.
އިހަވަންދޫގައި ބުދަ ދުވަހު ބިންގާ އެޅިގެންދިޔަ ފިޝަރީޒް ކޮންޕްލެކްސްގެ އޮޕަރޭޝަނާއެކު އެ ތަނުގައި 150 ވަޒީފާ އުފެދިގެންދާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަންދާޒާކުރައްވައިފިއެވެ.
މިކަމަށް އިޝާރާތްކުރައްވަމުން، އިހަވަންދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވީ، އިހަވަންދޫއަކީ މަސްވެރި ރަށެއް ކަމަށާއި، އަދި އެ ރަށުގައި ޤައިމްކުރާ ފިޝަރީޒް ކޮމްޕްލެކްސްގެ މަޝްރޫޢު ވެގެންދާނީ މަސްވެރިކަމުގެ ސިނާއަތުގެ ކުރިމަގަށް އެޅޭ މުހިންމު ފިޔަވަޅެއް ކަމަށެވެ.
މި ރަށަކީ، މަސްވެރިކަމުގެ މުހިންމު ރަށަކަށްވާއިރުގައި، ޖުމްލަކޮށް، މުޅި ރާއްޖޭގެ މަސްވެރިކަންވެސް ތަރައްޤީކުރުމަށް އަޅުގަނޑު ވީ ވަޢުދުގެ ތެރެއިން، މި ރަށުގައި ކަންތައްތަކެއް ކުރަން ވަޢުދުވިން. މިއަދު މި ބިންގާއެޅިގެންދިޔަ ފިޝަރީޒް ކޮމްޕްލެކްސް މަޝްރޫޢަކީ، މި ދެންނެވި ގޮތަށް، އަޅުގަނޑުމެން ފަށާ މަޝްރޫޢެއް.
ރައީސުލްޖުމްހޫރިއްޔާ ވިދާޅުވިއެވެ.
މި މަޝްރޫޢުގެ ދަށުން 1000 ޓަނުގެ ކޯލްޑް ސްޓޯރޭޖަކާއި 50 ޓަނުގެ ބްރައިން ފްރީޒިން ފެސިލިޓީއެއް ތަރައްޤީކުރުމަށް ވަނީ ހަމަޖެހިފައެވެ. އަދި އޮފީސް އިމާރަތަކާއި އިންޖީނުގެއާއި ވެހިކަލް ވަރކްޝޮޕުގެ އިތުރުން ގުދަނެއް އެޅުމަށްވެސް ހަމަޖެހިފައިވެއެވެ.
މީގެ އިތުރުން، މި ކޮމްޕްލެކްސްއާއެކު، ފުންމިނުގައި 7 މީޓަރު އަދި ދިގު މިނުގައި 1000 މީޓަރު ހުންނަ މަގަތު ފާލަމަކާއި، މަސްކިރޭނެ 3 ޕޮއިންޓުގެ އިތުރުން، ޖެޓީއާއެކު 4.5 މީޓަރު ފުންމިނުގެ ބަނދަރެއް ވެސް ޤާއިމްކުރައްވާނެކަމަށް އެ މަނިކުފާނު ވިދާޅުވިއެވެ.
މި ކޮމްޕްލެކްސްގެ ޖުމްލަ އަގަކީ، 416 މިލިއަން ރުފިޔާ. މިއީ، އިސްލާމިކް ޑިވެލޮޕްމަންޓް ބޭންކުގެ އެހީތެރިކަން ލިބިގެން، ކުރިއަށް ގެންދެވޭ މަޝްރޫޢެއް. ބަނދަރުގެ އަގަކީ، 58 މިލިއަން ރުފިޔާ. އެހެންވީމާ، ޖުމްލަ 474 މިލިއަން ރުފިޔާ، އިރާދަކުރެއްވިއްޔާ ތިޔަބޭފުޅުންގެ ކުރިއެރުމާއި ތަރައްޤީއަށްޓަކައި އަޅުގަނޑުމެން ޚަރަދުކުރާނަން، މި މަޝްރޫޢުގެ ދަށުން.
މަޝްރޫޢުއާ ގުޅޭ އިތުރު މަޢުލޫމާތު ޙިއްސާކުރައްވަމުން ރައީސުލްޖުމްހުރިއްޔާ ވިދާޅުވިއެވެ.
އެ ރަށުގައި މި މަޝްރޫޢު ފައްޓަވާ ދެއްވުމުގެ ބިންގާ އަޅުއްވައިދެއްވީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހއ އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މި މަޝްރޫޢުގެ ބިންގާ އެޅުއްވީ، މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމްއެވެ.
ވަޒީރު މި މަޝްރޫޢު ސިފަކުރައްވަނީ އެ ސަރަޙައްދުގެ މަސްވެރިންނަށް ލިބިގެންދާނެ ބޮޑު މާލީ ލުޔެއްގެ ގޮތުގައެވެ. އެގޮތުން މި މަޝްރޫޢާއެކު، އެ ސަރަޙައްދުގެ ދޯނިތައް މަސްކިރުމަށް ފެލިވަރަށް ކުރަންޖެހޭ ދިގު ދަތުރަށް ނިމުމެއް އަންނާނެކަމަށާއި، މިއީ މަސްވެރިން ތެލަށްކުރާ ޚަރަދު ކުޑަކުރެވޭނެކަމެއް ކަމަށް، ޕީއެސްއެމްއަށް ދެއްވި އިންޓަވިއުއެއްގައި ވަޒީރު ވިދާޅުވިއެވެ.