ކުޅިވަރު
ޕްރިމިއަރ ލީގުގެ އެންމެ ގިނަ ގޯލުޖަހާފައިވާ ކުޅުންތެރިންގެ ލިސްޓުން ލަމްޕާޑް ފަހަތަށް ޖައްސާލައި، ސަލާޙް ކުރިޔަށް ޖެހިލައިފި
ލަމްޕާޑް (ކ)، ސަލާޙް (މ) އަދި އަގުއެރޯ (ވ)
ހުލާސާ
މި ސީޒަނުގައި މިހާތަނަށް 21 ގޯލު ހަމަކޮށްފި.
އިތުރު 6 ގޯލާއެކު ސާޖިއޯ އަގުއެރޯއާ ހަމަކުރެވޭނެ.
އިންގްލިޝް ޕްރިމިއަރ ލީގުގައި މިހާތަނަށް އެންމެ ގިނަ ގޯލުޖަހާފައިވާ ލިސްޓުން، ޗެލްސީގެ ލެޖެންޑު، ފްރޭންކް ލަމްޕާޑް ފަހަތަށް ޖައްސާލުމަށްފަހު، އެ ލިސްޓުގެ 6ވަނައަށް ލިވަޕޫލްގެ މުޙައްމަދު ސަލާޙް ޖެހިލައިފިއެވެ.
ޕްރިމިއަރ ލީގުގައި ލަމްޕާޑް 177 ގޯލު ކާމިޔާބުކޮށްފައިވާއިރު، ލިވަޕޫލުން ހޮނިހިރު ދުވަހުގެރޭ ބޯނެމައުތު 2-0 އިން ބަލިކުރި މެޗުގައި ސަލާޙް ވަނީ އޭނާގެ 177ވަނަ ގޯލާއި 178ވަނަ ގޯލު ކާމިޔާބުކޮށްފައެވެ.
މި ލިސްޓުގެ ފަސްވަނައަށް ޖެހިލުމަށް ދެން އޭނާއަށް ބޭނުންވަނީ އެންމެ 6 ގޯލެވެ. އެ މަޤާމުގައި މިހާރު އޮތީ މެންޗެސްޓަރ ސިޓީއަށް ކުޅުނު ސާޖިއޯ އަގުއޭރޯއެވެ. އޭނާއަކީ އެ ލިސްޓުގައި އޮތް އެންމެ ގިނަ ގޯލުޖަހާފައިވާ ބިދޭސީ ކުޅުންތެރިޔާ ވެސް މެއެވެ.
މި ސީޒަން ފެށިއިރު ސަލާޙް އޮތީ 157 ގޯލާއެކު މި ލިސްޓުގެ 11ވަނައިގައެވެ. އަދި އޭގެ ފަހުން އޭނާ މިވަނީ ޖާމެއިން ޑެފޯ (162 ގޯލު)، ރޮބީ ފައުލަރ (163 ގޯލު)، ތިއެރީ އޮންރީ (175 ގޯލު) އަދި އެންމެ ފަހުން ލަންޕާޑް ފަހަތަށް ޖައްސާލާފައެވެ.
އިންގްލިޝް ޕްރިމިއަރ ލީގުގައި އެންމެ ގިނައިން ގޯލު ޖަހާފައިވާ ކުޅުންތެރިން:
| އެލަން ޝިއެރަރ | 260 |
| ހެރީ ކޭން | 213 |
| ވޭން ރޫނީ | 208 |
| އެންޑްރޫ ކޯލް | 187 |
| ސާޖިއޯ އަގުއެރޯ | 184 |
| މުޙައްމަދު ސަލާޙް | 178 |
| ފްރޭންކް ލަމްޕާޑް | 177 |
| ތިއެރީ ހެންރީ | 175 |
| ރޮބީ ފައުލަރ | 163 |
| ޖަމެއިން ޑެފޯ | 162 |
މި ސީޒަނުގެ މިހާތަނަށް ސަލާޙް 21 ގޯލު ކާމިޔާބުކޮށްފައިވާއިރު، އޭނާގެ މިހާރުގެ ގޯލު ޖެހުމުގެ ރޭޓަށް ބަލާނަމަ، ސީޒަން ނިމުމުގެ ކުރިން ފަސްވަނައިގައި އޮތް އަގުއެރޯ އާއި 187 ގޯލާއެކު ހަތަރުވަނައިގައި އޮތް އެންޑްރޫ ކޯލް ފަހަތަށް ޖައްސާލާނެކަމަށް ޤަބޫލުކުރެވެއެވެ.
އަނެއްކޮޅުން، ސަލާޙް ލިވަޕޫލްއާއެކު ހަދާފައިވާ ކޮންޓްރެކްޓު މި ސީޒަނުގެ ނިޔަލަށް ހަމަވުމާއި، އެ ކޮންޓްރެކްޓުގެ މުއްދަތު އިތުރުކުރުމުގައި އަދި ކުރިއެރުމެއް ލިބިފައި ނުވާތީ، މި ލިސްޓުގެ އެންމެ ކުރީގައި އޮތް ވޭން ރޫނީ (208 ގޯލު) އާއި ހެރީ ކޭން (213 ގޯލު) އާއި އެލަން ޝިއެރާ (260 ގޯލު)އާ އެއްވަރަށް ގޯލު ހަމައެއް ނުކުރެވޭނެއެވެ. ނަމަވެސް ސަލާޙް ލިވަޕޫލްގައި އިތުރަށް މަޑުކުރަން ނިންމައިފިނަމަ އެއީ ނޫންކަން އޭނާ މި އަންނަނީ ސާބިތުކޮށްދެމުންނެވެ.
