ރެޑްބޮކްސް އިން ހުޅުމާލޭގައި އައު އޮފީހެއް ހުޅުވައިފި

ރާއްޖޭގައި ފުޅާ ދާއިރާއެއްގައި ޑެލިވަރީ އަދި ލޮޖިސްޓިކްސްގެ ޚިދުމަތް ފޯރުކޮށްދޭ ރެޑްބޮކްސް ކުންފުނިން ހުޅުމާލޭގައި އައު އޮފީހެއް ހުޅުވައިފިއެވެ. މި އޮފީސް ހުޅުވާފައިވަނީ ކުންފުނީގެ ޚިދުމަތް އިތުރަށް ފުޅާކުރުމުގެ މަޤްޞަދުގައެވެ.

ރެޑްބޮކްސްގެ ހުޅުމާލޭ އައު އޮފީސް ހުންނަނީ ބޮކަރުމާ ހިނގުމުގައެވެ. މި އައުޓްލެޓް ހުޅުވާލެވިފައިވަނީ ޚާއްޞަކޮށް ހުޅުމާލެ ފޭސް 1 އަދި 2 ގެ ރައްޔިތުންނަށް އަމާޒުކޮށްގެންނެވެ.

ހުޅުމާލޭގައި ރެޑްބޮކްސްގެ އައު އޮފީސް ހުޅުވުމުގެ ރަސްމިއްޔާތު

ރެޑްބޮކްސްގެ ފަރާތުން މަޢުލޫމާތު ދެއްވި ގޮތުގައި، މި ސަރަޙައްދަށް ދިމާވެފައި އޮތް އެންމެ ބޮޑު ދަތިކަމަކީ ޑެލިވަރީ ކުރަންޖެހޭ މުދާ އެދެވޭ ގޮތެއްގައި ޑެލިވަރީ ކުރެވޭނެ ނިޒާމެއް ހަމަޖެހިފައި ނެތުމެވެ. މި އައު އޮފީސް ހުޅުވުމާއެކު، މާލޭގައި ދެމުންދިޔަ ޚިދުމަތް އިތުރަށް ފުޅާވެގެންދާނެ ކަމަށް ބެލެވެއެވެ.

ރެޑްބޮކްސްގެ ހުޅުމާލެ އައުޓްލެޓް

ރެޑްބޮކްސްގެ ވެރިއެއް ވިދާޅުވި ގޮތުގައި، މި އައު އޮފީހުން މާލޭ އޮފީހުން ލިބޭ ހުރިހާ ޚިދުމަތެއް ލިބޭނެއެވެ. އަދި އަލީ އެކްސްޕްރެސްގެ ވަރަށް ގިނަ އޯޑަރ އަންނައިރު، ކަސްޓަމަރުންނަށް ޕާސަލް ރިސީވްކޮށް ފޯރުކޮށްދިނުމަށް ވަރަށް ބޮޑު ލުޔެއް ލިބިގެންދާނެ ކަމަށް އެ ފަރާތުން ފާހަގަކުރެއްވިއެވެ.

މި އައު އޮފީސް ހުޅުވުމާއެކު، ހުޅުމާލޭގެ ރައްޔިތުންނަށް ފަސޭހަކަމާއެކު ރެޑްބޮކްސްގެ ޚިދުމަތްތައް ލިބިގެންދާނެ ކަމަށް ބެލެވެއެވެ. އަދި މިއީ ކުންފުނީގެ ވިޔަފާރި އިތުރަށް ފުޅާވެގެންދާނެ ފިޔަވަޅެއް ކަމުގައިވެސް ފާހަގަކުރެވެއެވެ.