އެސްޓީއޯއިން ރޯދައަށް ކާށި ގެނެސްފި

ބާޒާރުގައި ލިބުން ދަތިވެފައި ވަނިކޮށް، އެސްޓީއޯއިން ކާށި ޝިޕްމެންޓެއް ރާއްޖެ ގެނަސްފިއެވެ.

މިއީ ރަމަޟާންމަހަށް ބޭނުންވާ ކާބޯތަކެތީގެ ބާވަތްތައް ތަކެތި ބާޒާރުން ފަސޭހަކަމާއެކު ލިބޭނެ ގޮތް ހެދުމަށް، ސްޓޭޓް ޓްރޭޑިންގް އޯގަނައިޒޭޝަން، އެސްޓީއޯ އިން ކުރަމުންދާ މަސައްކަތުގެ ތެރެއިން ގެނެވުނު ޝިޕްމެންޓެކެވެ.

އެސްޓީއޯއިން ހާމަކޮށްފައިވާ ގޮތުގައި މި ގެނައި ކާށީގެ ޝިޕްމެންޓު ބާޒާރަށް ނެރުމަށް ހަމަޖެހިފައިވަނީ މާދަމާއެވެ. އަދި އެސްޓީއޯ ޕީޕަލްސް ޗޮއިސްއަށް މާދަމާ ކާށި ނެރޭއިރު، ކާއްޓެއް ވިއްކުމަށް ހަމަޖެހިފައިވަނީ 5 ރުފިޔާ އަށެވެ.

އެސްޓީއޯއިން ބާޒާރަށް ކާށީގެ ފުރަތަމަ ޝިޕްމެންޓު ނެރުނުއިރު، މި ވަގުތު ބާޒާރުގައި ކާށީގެ އަގު ހުރީ 10 ރުފިޔާ އާއި 15 ރުފިޔާއާއި ދެމެދުގައެވެ.

ކާށީގެ އިތުރުން، އެސްޓީއޯއިން ރާއްޖެ އެތެރެކުރި ލުނބޯ ވެސް މާދަމާއިން ފެށިގެން ބާޒާރަށް ނެރުމަށް ވަނީ ހަމަޖެހިފައެވެ.

މި ރަމަޟާންމަހަށް އަމާޒުކޮށް އެސްޓީއޯއިން ވަނީ ހަތަރު ކެޓަގަރީއަކަށް ކާބޯތަކެތީގެ ބާވަތްތައް ބަހާލާފައެވެ.

އެސްޓީއޯއިން ކާބޯތަކެތީގެ ބާވަތްތައް ބަހާލާފައިވާގޮތް:

• އަސާސީ ކާބޯތަކެތި:  ފިޔާ، ބިސް އަލުވި، ކާށި، ކަދުރު
• ތާޒާ ތަރުކާރީ އަދި މޭވާ: ލުނުމެދު، އިނގުރު، ލައިމް، ކެރެޓް، އޮރެންޖް، ކެބެޖް، މިރުސް، ފޭރު، ކަރާ، އަނބޫ، ޕެޝަންފުރުޓް، ކިއުކަންބާ
• ޕްރޮސެސްޑް ކާނާ : ނެސްލޭ ކުރީމް، ކޮކޯ ޕައުޑަރ، ބޭކެޓް ބީންސް، ގެރިކިރު ދަޅު
• ކެއްކުމަށް ބޭނުންކުރާތަކެތި:  ސަންފްލާވަރ އޮއިލް، ވެޖިޓަބަލް އޮއިލް، ބާސްމަތި ހަނޑޫ