އެއްވެސްކަމެއް ދާއިމަށް ދެމިއެއް ނޯންނާނެ: ގާޑިއޯލާ

އެއްވެސް ކަމަކީ ދާއިމަށް ދެމިގެންދާނެކަމެއް ނޫންކަމަށް، ޗެމްޕިއަސް ލީގުގެ ޕްލޭ-އޮފްގައި ރެއާލް މެޑްރިޑާ ދެކޮޅަށް ކުޅުނު ދެވަނަ ލެގުން ރޭ ބަލިވުމަށްފަހު، މެންޗެސްޓަރ ސިޓީގެ ކޯޗު، ޕެޕް ގާޑިއޯލާ ބުނެފިއެވެ.

ގާޑިއޯލާއާއެކު ސިޓީން ވަނީ ގިނަ ކާމިޔާބީތަކެއް ހޯދާފައެވެ. އޭގެ ތެރޭގައި ޕްރިމިއަރ ލީގުގެ 6 ތައްޓާއި، 2023 ގައި ކާމިޔާބުކުރި ޗެމްޕިއަންސް ލީގު ވެސް ހިމެނެއެވެ.

ނަމަވެސް، ކާމިޔާބުން ފުރިގެން ދިޔަ ދުވަސްތަކަކަށްފަހު ސިޓީއާއި ގާޑިއޯލާއަށް މިހާރު އޮތީ އުނދަގޫ ދުވަސްތަކަކާ ކުރިމަތިލާން ޖެހިފައެވެ. އިނގިރޭސި ޕްރިމިއަރ ލީގު ދެން ސިޓީއަށް ކާމިޔާބު ކުރެވޭނެ ކަމުގެ އެއްވެސް އުއްމީދެއް ނެތް އިރު، ރެއާލުން މިވަނީ މުބާރާތުގެ ކުރީކޮޅު އެ ޓީމު ޗެމްޕިއަންސް ލީގުން ވެސް ކަޓުވާލާފައެވެ.

"އެއްވެސްކަމެއް ދާއިމަށް ދެމިގެން ނުދާނެ. އަހަރެމެންނަށް ދެން ޖެހޭނީ ފިޔަވަޅަކަށްފަހު ފިޔަވަޅެއް އަޅައި، މިއަދުން ފެށިގެން ކަންކަން ބަދަލުކުރުމަށް މަސައްކަތްކުރަން." ގާޑިއޯލާ ބުންޏެވެ.

އަދި ޕްރިމިއަރ ލީގުގައި ބާކީ 13 މެޗު ކުޅެން އޮތް އިރު، މި އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމަށް ވެސް ބުރަ މަސައްކަތްތަކެއް ކުރަންޖެހިފައިވާކަމަށް ގާޑިއޯލާ ބުންޏެވެ.

ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި ހަނިގޮތަކަށް ސިޓީ ކައިރިން ރެއާލަށް މޮޅުވެވުނު ނަމަވެސް، ދެވަނަ ލެގުގައި ރެއާލް ފެނުނީ މާ ތަފާތުކޮށެވެ. އަދި ރޭ އެމްބައްޕޭގެ ފަރާތުން ފެނުނު މޮޅު ކުޅުމުން، މެޗު ކާމިޔާބުކުރުމަށް އިތުރު ގޮންޖެހުމަކަށްވިކަމަށް ގާޑިއޯލާ ފާހަގަކުރިއެވެ.

އަދި މި މެޗުގައި ހާލަންޑު ބޭނުން ނުކުރީ އަނިޔާގައި ހުރުމުން ކަމަށް ވެސް ގާޑިއޯލާ ބުނެފައިވެއެވެ. 

އިނގިރޭސި ލީގުގައި ސިޓީ މިވަގުތު އޮތީ ހަތަރު ވަނައިގައެވެ. އަދި ލީގުގެ އެއްވަނައިގައި އޮތް ލިވަޕޫލްއާ 18 ޕޮއިންޓުގެ ފަރަގެއް އޮތް އިރު، ތިންވަނައިގައި އޮތް ނޮޓިންހަމް ފޮރެސްޓާ އޮތީ 3 ޕޮއިންޓުގެ ފަރަގެކެވެ.