ދުނިޔެ
ރަޝިޔާއިން ޔުކްރެއިނަށް ދެވުނު އެންމެ ބޮޑު ޑްރޯން ހަމަލާ: 267 ޑްރޯން ފޮނުވައިފި

ރަޝިޔާއިން ޔުކްރެއިނަށް ހަމަލާ ދިނުން ފޮޓޯޯ:އިންޓަނެޓް
ރަޝިޔާއިން ޔުކްރެއިނަށް ދެވުނު އެންމެ ބޮޑު ޑްރޯން ހަމަލާ އިއްޔެ ރޭ ދީފިއެވެ. ޔުކްރެއިނުގެ އެއަރ ފޯސްއިން މިއަދު ބުނެފައިވަނީ 2022 ވަނަ އަހަރުގެ ފެބްރުއަރީ މަހު ރަޝިޔާއިން ޔުކްރެއިނަށް ހަނގުރާމަ އިއުލާނު ކުރި ފަހުން، އެންމެ ގިނަ ޑްރޯން ބޭނުންކޮށްގެން ދެވުނު ހަމަލާ ކަމަށެވެ.
ޔުކްރެއިނުގެ އެއަރ ފޯސްގެ ތަރުޖަމާނު ޔޫރީ އިގްނަޓް ވިދާޅުވި ގޮތުގައި ހޮނިހިރު ދުވަހުން އާދީއްތަ ދުވަހަށް ވާ ރޭ ޔުކްރެއިނުގެ އުޑުގައި 267 ޑްރޯން ފެނިފައިވެއެވެ. މިއީ ހަނގުރާމަ ފެށުނު ފަހުން އެއްފަހަރާ ދެވުނު އެންމެ ބޮޑު ހަމަލާ ކަމަށް އޭނާ ވިދާޅުވިއެވެ.
މި ޑްރޯންތަކުގެ ތެރެއިން 138 ޑްރޯން ވަނީ ޔުކްރެއިނުގެ އެއަރ ޑިފެންސް ސިސްޓަމުން ވައްޓާލާފައެވެ. އަދި 119 ޑްރޯން ވަނީ އެއްވެސް ގެއްލުމެއް ނުދީ "ގެއްލިފައި" ކަމަށް އިގްނަޓް ފޭސްބުކުގައި ޕޯސްޓް ކުރެއްވިއެވެ. ބާކީ 10 ޑްރޯނަށް ވީ ގޮތެއް އޭނާ ވިދާޅުނުވިއެވެ. ނަމަވެސް ޔުކްރެއިނުގެ ހަތިޔާރުވެރި ބާރުތަކުން ޓެލެގްރާމްގައި ބުނެފައިވަނީ ކީވް ހިމެނޭ ގޮތަށް އެތައް ސަރަހައްދަކަށް ހަމަލާ ދެވިފައިވާ ކަމަށެވެ.
ހޮނިހިރު ދުވަހުގެ ރޭ ރަޝިޔާއިން ދިން މިސައިލް ހަމަލާއެއްގައި ޔުކްރެއިނުގެ މެދުތެރޭގައި އޮންނަ ކްރިވީ ރިގް ރަށުގައި އެކަކު މަރުވެ، ފަސް މީހުން ޒަޚަމްވެފައިވާ ކަމަށް އެ ސަރަހައްދުގެ އިސްވެރިން މިއަދު ބުނެފިއެވެ.
ރަޝިޔާއިން ކޮންމެ ދުވަހަކު ދޭ ހަމަލާތައް ހުއްޓުވުމަށް، ޔުކްރެއިނުން ވަނީ ރަޝިޔާގެ ސަޕްލައި ލައިންތަކަށް ހުރަސްއެޅުމަށް މަސައްކަތް ކޮށްފައެވެ. މީގެ ތެރޭގައި ރަޝިޔާގެ އަސްކަރީ ބޭސްތަކާއި ސިނާއީ މަރުކަޒުތަކަށް ސީދާ ހަމަލާ ދިނުން ހިމެނެއެވެ.
ރަޝިޔާގެ ދިފާއީ މިނިސްޓްރީން މިއަދު ބުނެފައިވަނީ ޔުކްރެއިނުން ރަޝިޔާއަށް ފޮނުވި 20 ޑްރޯން ވަނީ "ނައްތާލެވިފައި" ކަމަށެވެ.
ރަޝިޔާއިން ޔުކްރެއިނަށް ހަނގުރާމަ އިއުލާނު ކުރީ 2022 ވަނަ އަހަރުގެ ފެބްރުއަރީ 24 ވަނަ ދުވަހުއެވެ. ކްރެމްލިންއިން ބުނެފައިވަނީ މި ހަނގުރާމައިގެ މަޤްޞަދަކީ ނޭޓޯ ފުޅާވަމުން އަންނަ ނުރައްކަލުން ރަޝިޔާ ސަލާމަތްކުރުން ކަމަށެވެ.