ރައީސްގެ ވަޢުދުފުޅާ އެއްގޮތަށް ފައިނުގައި އެއާޕޯޓު އަޅަން އެމްޓީސީސީއާ ހަވާލުކޮށްފި

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވަޢުދުފުޅާއި އެއްގޮތަށް ރ.ފައިނުގައި އެއަރޕޯޓް އެޅުމުގެ މަސައްކަތް އެމްޓީސީސީއާއި ހަވާލުކޮށްފިއެވެ.

ރ. ފައިނުގައި އެއާޕޯޓު އަޅަން އެމްޓީސީސީއާ އެކު އެގްރީމަންޓުގައި ސޮއި ކުރެވޭނެ ކަމަށް ރައީސް ޑރ. މުހައްމަދު މުޢިއްޒު އިއުލާން ކުރައްވާފައިވަނީ 23 ޖަނަވަރީ 2025ގައި ފައިނަށް ކުރެއްވި ރަސްމީ ދަތުރުފުޅުގައި ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުންނެވެެ. 

ފައިނުގައި އެއާޕޯޓު އެޅުމުން، އެ ސަރަަަހައްދުގެ ގިނަ ރަށްތަކަށް އިޤްތިޞާދީ ކުރިއެރުން ލިބޭނެ ކަމަށްވެސް ރައީސް ވިދާޅުވިއެވެ. އެމަނިކުފާނު ވިދާޅުވި ގޮތުގައި އެއާޕޯޓާ އެކު ގިނަ ރިސޯޓުތަކެއް އެ ސަރަޙައްދުގައި ހުޅުވި ވަޒީފާގެ ފުރުޞަތުތައް އިތުރުވެގެންދާނެކަމަށެވެ.

މި އެއްބަސްވުމާއި ގުޅިގެން އެމްއޭސީއެލުން ވިދާޅުވީ ދަތުރުފަތުރުގެ ވަސީލަތްތައް އިތުރުކުރުމާއި އިޤްތިޞާދީ ކުރިއެރުވުމަށް ރައީސް ޑރ. މުޙައްމަދު މުޢިއްޒު ގެންގުޅުއްވާ ވިސްނުންފުޅުގެ ދަށުން ފައިނުގައި އެއާޕޯޓު އެޅުމަށް އެމްޓީސީސީއާ އެކު ސޮއިކޮށްފައިވާ ކަމަށެވެ.

ރ. އަތޮޅުގައި މިވަގުތު އެއާޕޯޓެއް އޮންނަނީ އިފުރުގައި އެކަންޏެވެ. އަތޮޅުގެ ރަށްތައް އިފުރާ ދުރުވުމުގެ ސަބަބުން އިތުރު އެއާޕޯޓެއް ލިބިގެން ދިއުމަކީ އެ އަތޮޅުގެ ގިނަ ބައެއްގެ އުންމީދެކެވެ.