އިޤުތިޞާދު ތަފާތު ދާއިރާތަކަށް ފުޅާކުރުމަކީ ބަދަލުވަމުންދާ ދުނިޔޭގެ އިޤުތިޞާދުގައި ދެމިތިބުމަށް ކޮންމެހެން ބޭނުންވާ ކަމެއް- ރައީސް

އިޤުތިޞާދު ތަފާތު ދާއިރާތަކަށް ފުޅާކުރުމަކީ ހަމައެކަނި މަޤުޞަދެއް ނޫން ކަމަށާއި އެއީ އަބަދުވެސް ބަދަލުވަމުންދާ ދުނިޔޭގެ އިޤުތިޞާދުގައި އަޅުގަނޑުމެން ދެމިތިބުމަށް ކޮންމެހެން ބޭނުންވާ ކަމެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

އދގެ އާއްމު މަޖިލީހުގެ ބައްދަލުވުމުގެ ކުރިން ކުރިއަށްދާ ސަމިޓް އޮފް ދަ ފިއުޗަރގެ ހަވާސާގެ ތެރެއިން ބޭއްވި ސިޑްސްގެ ބައްދަލުވުމެއްގަ ވާހަކަ ދައްކަވަމުން ރައީސް ވިދާޅުވީ  އިޤުތިޞާދު ތަފާތު ދާއިރާތަކަށް ފުޅާކުރުމަށް ސިޑްސް ޤައުމުތަކުން އުފެއްދުންތެރިކަމުގެ ޤާބިލުކަން އިތުރުކުރަންޖެހޭ ކަމަށެވެ.

ރައީސް ވިދާޅުވީ އިޤުތިޞާދުތައް ތަފާތު ދާއިރާތަކަށް ފުޅާކުރުމަށް މަސައްކަތްކުރުމުގައި ސިޑްސްގެ ލީޑަރުންގެ ޙައިސިއްޔަތުން އިސްނަގަންޖެހޭނެކަމަށެވެ. ރާއްޖެފަދަ ޤައުމުތައް ބަރޯސާވަނީ ހަނި އިޤުތިޞާދީ ބިންގަލަކަށް ކަން ފާހަގަ ކުރައްވާ ރަައީސް ވިދާޅުވީ ގިނަފަހަރަށް އެއީ ފަތުރުވެރިކަން ނުވަތަ މަސްވެރިކަމުގެ މައްޗަށްކަމަށެވެ. އެހެންކަމުން އިޤުތިޞާދު ސިންދަފާތުކުރުމަށް ގިނަ މަސައްކަތްތަކެއް ކުރަންޖެހޭކަމަށްވެސް ރައީސް ވިދާޅުވިއެވެ. ހަމައެއާއެކު އިޤުތިޞާދު ތަފާތު ދާއިރާތަކަށް ފުޅާކުރުމަށް، ފައިނޭންސް ބޭނުންވާ ކަންވެސް ރައީސްގެ ވާހަކަފުޅުގައި ފާހަގަ ކުރެއްވިއެވެ. 

ރައީސުލްޖުމްހޫރިއްޔާ ވިދާޅުވީ ސިޑްސްގެ ގައުމުތަކަކީ މާލީގޮތުން ފުދުންތެރި، އިޤުތިޞާދީގޮތުން ކުރިއަރާފައިވާ ޤައުމުތަކަކަށް ހަދަންޖެހޭ ކަމަށެވެ. އަދި އެ ބަދަލު ގެނައުމަށް މުޖްތަމަޢުގެ ބާރުވެރިކަން އިތުރުކޮށް، މުއައްސަސާތައް ހަރުދަނާކޮށް، އުފެއްދުންތެރިކަން އިތުރުކުރަންޖެހޭކަމަށް ރައީސުލްޖުމްހޫރިއްޔާ ވިދާޅުވިއެވެ.