ކުވެއިތުގެ ޤައުމީ ދުވަހާއި މިނިވަން ދުވަހުގެ ތަހުނިޔާ ރައީސުލްޖުމްހޫރިއްޔާ ފޮނުއްވައިފި

ކުވައިތުގެ ޤައުމީ ދުވަހާއި މިނިވަންދުވަހުގެ ތަހުނިޔާ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފޮނުއްވައިފިއެވެ.

ސޯޝަލް މީޑީއާގައި ކުރެއްވި ތަހުނިޔާގެ ޕޯސްޓެއްގައި ރައީސް ވިދާޅުވެފައި ވަނީ ކުވެއިތުން އެ ޤައުމުގެ ޤައުމީ ދުވަސް އަދި މިނިވަންކަމުގެ ދުވަސް ފާހަގަކުރާ މި ދަނޑިވަޅުގައި، ކުވެއިތުގެ އަމީރު، އަލްއަމީރު ޝެއިޚް މިޝްޢަލް އަލް-އަޙްމަދު އަލް-ޖާބިރު އަލް-ޞަބާޙަށާއި، ބޮޑުވަޒީރު އަލްއަމީރު ޝެއިޚް އަޙްމަދު ޢަބްދުﷲ އަލް-އަޙްމަދު އަލް-ޞަބާޙަށާއި، ސަރުކާރަށާއި އަދި ކޮންމެ ކުވެއިތު ރައްޔިތަކަށް ތަހުނިޔާއާއި ހެޔޮ އެދުންތައް ފޮނުއްވާ ކަމަށެވެ.

ކުވައިތުގެ ޤައުމީ ދުވަހުގެ ގޮތުގައި ފާހަގަކުރަނީ ފެބުރުވަރީ 25 ވަނަ ދުވަހެވެ. އަދި އެ ޤައުމުގެ މިނިވަން ދުވަހުގެ ގޮތުގައި ފާހަގަ ކުރަނީ ފެބުރުވަރީ 26 ވަނަ ދުވަހެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ވަނީ ކުވައިތުގެ އަމީރާއި ބޮޑުވަޒީރަށް ވަކިވަކިން ސިޓީފުޅެއް ފޮނުއްވާފައެވެ. މި ސިޓީ ފުޅުގައި ދިވެހިރާއްޖެއާއި ކުވައިތާ ދެމެދުގައި އޮތް ޒަމާންވީ ގާތް ރަހުމަތްތެރިކަމުގެ ގުޅުމަކީ، އިސްލާމީ ޢަޤީދާއާއި، އެއްބައިވަންތަ ކަމުގެ މައްޗަށް ބިނާވެފައިވާ ގުޅުމެއްކަން ފާހަގަކުރެއްވިއެވެ. އަދި ކުރިއަށް އޮތް އަހަރުތަކުގައިވެސް ދެޤައުމުގެ ރައްޔިތުންގެ ލާބައާއި މަންފާއަށްޓަކައި ދެޤައުމުގެ ގުޅުން އިތުރަށް ބަދަހިވެގެންދާނެކަމުގެ ޔަޤީންކަން އެބައޮތްކަމުގައި ރައީސުލްޖުމްހޫރިއްޔާ ވިދާޅުވިއެވެ.

ކުވައިތުގެ ޤައުމީ ދުވަސް ފާހަގަކުރަނީ 1950 ވަނަ އަހަރު ކުވައިތުގެ ކުރީގެ އަމީރު ޝައިޚް ޢަބްދުالله އަލް ސަލީމް އަލްސަބާޙް، ރަސްކަމަށް އިސްވެވަޑައިގަތުމުގެ ހަނދާން އައުކުރުމުގެ ގޮތުންނެވެ. ފެބްރުއަރީ މަހުގެ 26 ވަނަ ދުވަހަކީ 1991 ވަނަ އަހަރު، ކުވައިތަށް އަލުން މިނިވަންކަން ލިބުނު ދުވަހެވެ.