އިޤުތިޞާދީ ކުރިއެރުމާއި އިޖްތިމާއީ ހަމަހަމަކަމުގައި ޒަމާނީ ޓެކްނޮލޮޖީއާއި އީޖާދީ ވިސްނުންތަކުގެ ދައުރު ބޮޑުކުރާނަން - ރައީސް

ސަރުކާރުގެ ތަސައްވުރަކީ އިޤުތިޞާދީ ކުރިއެރުމާއި އިޖްތިމާޢީ ހަމަހަމަކަމުގައި ޒަމާނީ ޓެކްނޮލޮޖީއާއި އީޖާދީ ވިސްނުންތަކުގެ ދައުރު ބޮޑުކުރުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

އ.ދގައި މިރޭ ފެށިގެން ކުރިއަށްދާ "ސަމިޓް އޮފް ދަ ފިއުޗާ"ގައި ތަޤްރީރު ކުރައްވަމުން ރައީސް ވިދާޅުވީ، ދިވެހި ޒުވާނުން ބޭނުންވާ ޒަމާނީ ޓެކްނޮލޮޖީތައް ފަސޭހައިން ލިބޭނެ އިންތިޒާމްތައް ހަމަޖެއްސުމަށް ބޭނުންވާ ޑިޖިޓަލް އިންފްރާސްޓްރަކްޗަރ ޤާއިމްކުރުމަށް ސަރުކާރުން އިންވެސްޓްކުރަމުންދާކަމަށެވެ. އިޤުތިޞާދީ ކުރިއެރުމާއި އިޖްތިމާޢީ ހަމަހަމަކަމުގައި ޒަމާނީ ޓެކްނޮލޮޖީއާއި އީޖާދީ ވިސްނުންތަކުގެ ދައުރު ބޮޑުކުރުމުން ޒުވާނުން ބޭނުންވާ ގޮތަށް އެމީހުންގެ މުސްތަޤްބަލު ބައްޓަންކުރުމުގެ ބާރު ލިބިގެންދާނެކަމަށްވެސް ރައީސް ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި މަލްޓިލެޓަރަލް ނިޒާމަކީ ހަމައެކަނި ކަނޑައެޅިފައި އޮންނަ ކޮންސެޕްޓެއްގެ ބަދަލުގައި އެއީ ދުނިޔެއަށް ކުރިމަތިވެފައިވާ އެކި މައްސަލަތަކުގައި ޢަމަލީގޮތުން މަސައްކަތްކުރެވޭ ނިޒާމަކަށް ވާންޖެހޭކަމުގައި ވިދާޅުވިއެވެ. އެމަނިކުފާނު ވަނީ މަލްޓިލެޓަރަލް ނިޒާމު އިތުރަށް ހަރުދަނާކޮށް އެދެވޭ ނަތީޖާ ނެރެވޭނެ 3 ގޮތެއް ފާހަގަ ކުރައްވާފައެވެ.

ރައީސް ވިދާޅުވިގޮތުގައި އަދުގެ ޖީލުތަކުން ބޭނުންވަނީ ވާހަކަތަކަށް އަމަލީ ސިފަ ގެނެސްދޭ ނިޒާމަކާއި، ކުރިމަތިވާ ކޮންމެ ގޮންޖެހުމަކަށް ހިތްވަރާއެކު ކުރިމަތިލާނެ ލީޑަރުންތަކެއްކަމުގައެވެ. އެއާއެކު މާދަމާ ދުނިޔެ ލީޑުކުރަން ތިބި ބަޔަކީ އަދުގެ ޒުވާނުން ކަމަށާއި ރާއްޖޭގެ ތަސައްވުރަކީ ޑިޖިޓަލް އިނޮވޭޝަންގެ ތެރެއިން ޒުވާނުންނަށް އިޤުތިޞާދީ ފުރުޞަތުތަކާއި އިޖުތިމާޢީ ހަމަހަމަކަން ޤާއިމްކޮށްދިނުން ކަމަށް ރައީސް ވިދާޅުވި އެވެ.

ރައީސް އިތުރަށް ވިދާޅުވީ މޫސުމީ ހާސްކަމަކީ ވަރަށް ބޮޑު ކަންބޮޑުމެއްކަމަށެވެ. ދިރާސާތަކުން ދައްކާ ގޮތުގައި އަދުގެ ޒުވާނުންގެ ގާތްގަނޑަކަށް 62 އިންސައްތަ މީހުންނަށް މިކަމުގެ އަސަރު ކުރާކަމަށްވެސް ރައީސް ވިދާޅުވިއެވެ.

ރައީސް ތިންވަނަ ކަމަކަށް ފާހަގަ ކުރެއްވީ، ރަނގަޅު ނަތީޖާތަކެއް ނެރުމަށް މާލީ ވަޞީލަތްތަކުގެ މުހިންމުކަމެވެ. އަދި އެމަނިކުފާނު ވަނީ ދެމެހެއްޓެނިވި ތަރައްޤީއަށާއި މޫސުމަށް އަންނަ ބަދަލުތަކަށް ހޭނުމާއި މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަކުރުމަށް ބޭނުންވާ މާލީ ކަންކަމުގެ ބޭނުންތެރިކަން ފާހަގަކުރައްވައި އަދި ހުރިހާ ފަރާތްތަކަށް ބޭނުންހިފޭފަދަ މާލީ ނިޒާމެއް ބޭއްވުމަށް ގޮވާލައްވާފައެވެ.

ރައީސްގެ ތަޤުރީރުގައި ވަނީ ޣައްޒާގައި ހިނގަމުންދާ ޤަތުލުއާންމަށްވެސް އަލިއަޅުއްވާލާފައެވެ. އެގޮތުން ރައީސް ވިދާޅުވީ ކުރިމަގުގެ ޖީލުން އެދެނީ ފަލަސްޠީނުގެ ނަސްލު ނައްތާލުމަށް އިޒްރޭލުން ޣައްޒާގައި ކުރިއަށްގެންދާ ޤަތުލުއާންމު ހުއްޓުވުމުގެ ހިތްވަރު ހުރި ޖީލެއް ކަމަށެވެ. އެހެންކަމުން ޣައްޒާއާ ދެކޮޅަށް ކުރަމުންދާ ނަސްލު ނައްތާލުމުގެ ހަނގުރާމަ ހުއްޓާލުމަށާއި އެމީހުންގެ އިންސާނީ ކަރާމާތް ނަގާލަމުންދާ މީހުންނާ މެދު ފިޔަޅު އެޅުމަށާއި ފަލަސްޠީނަށް އދ.ގެ ފުރިހަމަ މެންބަރުކަން ދިނުމަށް ގޮވާލެއްވިއެވެ.