ހުޅުމާލޭގައި އަލަށް ބިނާކުރާ މިސްކިތުގެ ބިންގާ ރައީސް އަޅުއްވައިދެއްވައިފި

ފަޟީލަތުއްޝައިޚު އިސްމާޢީލު މުޙައްމަދުގެ ދީލަތި އެހީގައި ހުޅުމާލޭގައި އަލަށް ބިނާކުރާ މިސްކިތުގެ ބިންގާ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އަޅުއްވައިދެއްވައިފިއެވެ.

މި މިސްކިތަކީ ރިސަރޗް ލައިބްރަރީއަކާއެކު ހުޅުމާލޭގައި އަމިއްލަ ފަރާތަކުން ބިނާކުރާ މިސްކިތެކެވެ.  "މަސްޖިދު އުންމުލްމުއުމިނީން ޢާއިޝާ ރަޟިޔަﷲ ޢަންހާ"ގެ ނަން ދީފައިވާ މި މިސްކިތުގެ ބިންގާ ރައީސް އަޅުއްވައިދެއްވީ އެކަމަށްޓަކާ ހުޅުމާލޭގައި ބޭއްވި ޚާއްސަ ރަސްމިއްޔާތެއްގައެވެ. މި މިސްކިތް ބިނާކުރަނީ ހުޅުމާލޭ ފޭސް 1ގެ ރެޑްވޭވް ކައިރި ވަގުތީ މިސްކިތް ހުރިތަނުގައެވެ.

 މަދީނާ އިންވެސްޓްމަންޓުގެ ފަރާތުން ބަލަހައްޓަމުންދާ މި މިސްކިތަކީ ކިޔަވާކުދިންނަށް، ރިސާރޗް ހެދުމާއި، ފޮތްކިޔަން ތިބެވޭ ގޮތަށް ފުރިހަމަ ލައިބްރަރީއަކާއެކު 2 ފަންގިފިލާއަށް ބިނާކުރެވޭ މިސްކިތެކެވެ. މި މިސްކިތަކީ ގާތްގަނޑަކަށް 2000 މީހުންގެ ޖާގައިގެ މިސްކިތެކެވެ. މި މިސްކިތަކީ އަންހެނުންނާއި ފިރިހެނުންނަށް ނަމާދު ކުރެވޭ ގޮތަށް ޤާއިމް ކުރަމުންދާ މިސްކިތެކެވެ. މި މިސްކިތަކީ ރިސާރޗް ލައިބްރަރީއަކާއެކު ހުޅުމާލޭގައި ޤާއިމު ކުރާ ފުރަތަމަ މިސްކިތެވެ. މި މިސްކިތް ނިސްބަތްކޮށްފައިވަނީ ކީރިތި ރަސޫލާގެ އަނބިކަނބަލުން އުންމުލްމުއުމިނީން ޢާއިޝަތުގެފާނަށެވެ. 

ސޯލާ ބޭނުން ކޮށްގެން ކަރަންޓު ދެވޭ ގޮތަށް ފަރުމާ ކުރާ މި މިސްކިތް އަންނަ އަހަރުގެ ރަމަޟާން މަހަށް ހުޅުވިގެން ދިއުމަކީ އަމާޒެއް ކަމަށް މިސްކިތް ބިނާ ކުރާ ފަރާތުން ބުނެފައި ވެއެވެ. ހުޅުމާލޭގައި ބޭއްވި މި ރަސްމިއްޔާތުގައި ރައީސުލް ޖުމްހޫރިއްޔާގެ ދެކަނބަލުންނާއި، މިސްކިތް ބިނާ ކުރައްވާ ފަޟީލަތުއްޝައިޚު އިސްމާޢީލު މުޙައްމަދު، އިސްލާމީ މަރުކަޒުގެ އިސް އިމާމް ފަޟީލަތުއްޝައިޚް މުޙައްމަދު ލަތީފް އަދި ދަޢުލަތުގެ ވަޒީރުން ވަނީ ބައިވެރިވެވަޑައިގެންފައެވެ.