ޖަޕާނުގެ ފޮރިންގ މިނިސްޓަރާއި އިތުރު 8 މީހަކު ރަޝިއާއަށް އެތެރެވުން މަނާކޮށްފި

ޖަޕާނުގެ ފޮރިންގ މިނިސްޓަރު ޓަކޭޝީ އިވައި އާއި އެ ޤައުމުގެ އިތުރު 8 މީހަކު ރަޝިއާއަށް އެތެރެވުން މަނާކޮށްފިއެވެ.

ރަޝިއާ އިން މި ފިޔަވަޅު އަޅާފައިވަނީ، ޔޫކްރެއިނާއި ދެކޮޅަށް ހިންގާ ހަނގުރާމައާ ގުޅިގެން ޖަޕާނުން ރަޝިޔާއަށް ދަތިކުރުމުގެ ގޮތުން އަޅާފައިވާ ފިޔަވަޅުތަކަށް ޖަވާބު ދިނުމުގެ ގޮތުންނެވެ.

ރަޝިއާގެ ފޮރިންގ މިނިސްޓްރީ އިން މިއަދު ވަނީ މިކަމާއި ގުޅޭގޮތުން ބަޔާނެއް ނެރިފައެވެ. މި ބަޔާނުގައި އެ މިނިސްޓްރީ އިން ބުނީ ޖަޕާނުގެ ސަރުކާރުން ރަޝިޔާއާ ދެކޮޅަށް އަޅާފައިވާ ފިޔަވަޅުތަކަށް ޖަވާބު ދިނުމުގެ ގޮތުން މި ފިޔަވަޅު އަޅާފައިވާ ކަމަށެވެ. އެގޮތުން، ޖަޕާނުގެ ޚާރިޖީ ވަޒީރު ޓަކޭޝީ އިވާއީ އާއި ކާރު އުފައްދާ ކުންފުނި އިސުޒޫ (7202.ޓީ)ގެ ރައީސް އަދި ރެޕްރެޒެންޓޭޓިވް ޑިރެކްޓަރު، ޝިންސުކޭ މިނާމީ އާއި ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ)ގެ ސީނިއާ ނައިބު ރައީސް ޝޯހެއި ހާރާ ރަޝިޔާއަށް އެތެރެވުން މަނާކުރެވުނު މީހުންގެ ތެރޭގައި ހިމެނެއެވެ.

ރަޝިއާ އިން ވަނީ މިދިޔަ އަަހަރުގެ ޖުލައި މަހުގައި ވެސް ޖަޕާނުގެ 13 މީހެއްގެ ނަން އާންމުކޮށް، އެ  ޤައުމަށް އެތެރެވުން މަނާކޮށްފަ އެވެ. އޭގެ ތެރޭގައި، މަޝްހޫރު ޓޮޔޯޓާގެ ޗެއާމަން ވެސް ހިމެނޭކަމަށް އެ ޤައުމުގެ މީޑީއާތަކުން ބުނެއެވެ. މީގެ އިތުރުން، ރަޝިއާގެ ފޮރިންގ މިނިސްޓްރީ  އިން ބުނެފައިވަނީ ޖަޕާނުގެ ސަރުކާރުން ރަޝިޔާއާ ދެކޮޅަށް އަޅާފައިވާ ފިޔަވަޅުތަކަކީ ރަޝިޔާގެ އިޤްތިސާދަށް ގެއްލުން ދިނުމަށް އަމާޒުކޮށްފައިވާ ފިޔަވަޅުތަކެއް ކަމަށެވެ. އަދި މި ފިޔަވަޅުތަކުގެ ސަބަބުން ދެ ގައުމުގެ ދެމެދުގައި އޮތް ގުޅުމަށް ނޭދެވޭ އަސަރުކުރާނެ ކަމަށް ވެސް ބުނެފައިވެއެވެ.

މިކަމާއި ގުޅޭގޮތުން ޖަޕާނުން އަދި އެއްވެސް ބަޔާނެއް ނެރިފައި ނުވާއިރު، މި ފިޔަވަޅުގެ ސަބަބުން ދެ ގައުމުގެ ދެމެދުގައި އޮތް ގުޅުން އިތުރަށް ގޯސްވެ، ދިގު މުއްދަތަކަށް ދެމިގެންދާނެ ކަމަށް ބައިނަލްއަގްވާމީ ސިޔާސީ މާހިރުން ލަފާކުރެއެވެ.