އަބަދުވެސް ފަލަސްޠީނަށް އެއްބާރުލުން ދިނުމަށްޓަކައި ރާއްޖޭން ކުރެވެން އޮތް ހުރިހާކަމެއް ކުރާނަން- ރައީސް

މީގެ ކުރިންވެސް، މިހާރުވެސް އަދި ކުރިއަށް އޮތްތަނުގައިވެސް ފަލަސްޠީނަށް އެއްބާރުލުން ދިނުމަށްޓަކައި ރާއްޖޭން ކުރެވެން އޮތް ހުރިހާކަމެއް ކުރާނެކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މިހެން ވިދާޅުވީ އދ.ގެ އާންމު މަޖިލީހުގެ 79ވަނަ ސެޝަންގެ ހަވާސާގެ ތެރެއިން ފަލަސްޠީނުގެ ރައީސް ޑރ.މަޙުމޫދު ޢައްބާސްއާ ބައްދަލުކުރައްވާ ވާހަކަ ދައްކަވަމުންނެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިިދާޅުވީ ދިވެހިރާއްޖޭން އަބަދުވެސް ފަލަސްޠީނާއެކު ތިބޭނެކަމުގެ ޔަގީންކަން ދެއްވާފައެވެ. އަދި ޔަހޫދީ ފައުޖުތަކުން ފަލަސްތީނުގެ ޣައްޒާގައި ހިންގަމުންދާ ޤަތުލުއާންމު ހުއްޓުވުމުގައި ބައިނަލްއަގުވާމީ އެހީތެރިކަމަށްވެސް އެމަނިކުފާނު ގޮވާލެއްވިއެވެ. ރައީސުލްޖުމްހޫރިއްޔާ ވިދާޅުވީ ގަތުލުއާންމު ހުއްޓާލުމަށް ގޮވާލައްވަނީ އަޅުގަނޑުމެންނަކީވެސް އިންސާނުންނަށް ވާތީ ކަމަށެވެ. މިކަމަށްޓަކައި ދުނިޔޭގެ އެއްބާރުލުމާއި އެހީތެރިކަން ދިނުމަށް ރައީސް ވަނީ ގޮވާލައްވާފައެވެ. 

ރައީސް ޑރ މުޢިއްޒު ވަނީ ފަލަސްޠީނަށް ރާއްޖެއިން ވެދެވެން އޮތް ހުރިހާ ގޮތަކުން ވެސް ފަސްނުޖެހި އެހީތެރިކަން އަބަދުވެސް ލިބޭނެކަން ކަށަވަރުކޮށްދެއްވާފައެވެ. ފަލަސްޠީނުގެ ރައްޔިތުންނަށްވެސް ލިބެންވާ ހުރިހާ ޙައްޤުތަކެއް ލިބިދިނުމަށް ގޮވާލާ، އަދި ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް ބައިނަލްއަޤްމާވީގޮތުން މަސައްކަތް ކުރައްވާނެކަމަށްވެސް ރައީސް ވިދާޅުވިއެވެ.

މި ބައްދަލު ކުރެއްވުމުގައި ފަލަސްޠީނުގެ ރައީސް ޑރ.މަޙްމޫދު ޢައްބާސް ވިދާޅުވީ ރާއްޖެއިން އަބަދުވެސް ދެއްވި އެއްބާރުލުމަށް ޝުކުރު އަދާކުރައްވާކަމަށެވެ. އަދި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފަލަސްޠީނުގެ ޙައްޤުގައި ވަކާލާތުކުރައްވައި ބައިނަލްއަޤްވާމީ ދުނިޔޭގައި ވަކާލާތުކުރައްވާކުރެއްވުން އަގުވަޒަން ކުރައްވާކަން ޑރ.މަޙްމޫދު ޢައްބާސް ފާހަގަކުރެއްވިއެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ ފަލަސްޠީނުގެ ނަސްލު ނައްތާލުމަށް އިސްރާއީލުން ހިންގަމުންދާ ޤަތުލުޢާންމު ހުއްޓުވައި، ފަލަސްޠީނަށް މިނިވަންކަން ދިނުމަށް ގޮވައިލައްވާފައެވެ. ރައީސުލްޖުމްހޫރިއްޔާގެ މި ގޮވައިލެއްވުމާ ގުޅިގެން ފަލަސްޠީނުގެ ރައީސް ޑރ.މަޙްމޫދު އައްބާސްވަނީ ތައުރީފުކުރައްވައި ޝުކުރުއަދާކުރައްވާފައެވެ.

ފަލަސްޠީނުގެ މައްސަލާގައި ވަގުތުން ވަގުތަށް ޢަމަލީ ފިޔަވަޅު އެޅުމަށް ރައީސް އަނެއްކާވެސް މިގޮވާލެއްވީ އދ.ގެ އާންމު މަޖިލީހުގެ 79ވަނަ ސެޝަންގެ ހަވާސާގެ ތެރެއިން ފަލަސްޠީނުގެ ރައީސް ޑރ.މަޙްމޫދު ޢައްބާސްއާ ބައްދަލުކުރެއްވުމުގެ ތެރެއިންނެވެ.