ވިޔަފާރި / ޚަބަރު
ރަމަޟާން މަހު ކަރަންޓު ބޭނުންކުރާ މިންވަރު އިތުރުވަނީ ކޮން ގަޑިތަކެއްގައި؟

ރަމަޟާން މަހު ފުރަތަމަ 7 ދުވަހު ކަރަންޓު ބޭނުންކުރެވިފައިވާ ގޮތް ފޮޓޯ:ސްޓޭލްކޯ
ރަމަޟާން މަހުގެ ފުރަތަމަ ހަފްތާގައި މާލެ އާއި ހުޅުމާލޭގައި ކަރަންޓު ބޭނުންކުރެވިފައިވާ ގޮތް ދިރާސާކުރުމަށްފަހު، ވަކި ގަޑިތަކެއްގައި ކަރަންޓު ބޭނުންކުރާ މިންވަރު އިތުރުވާކަން ސްޓެލްކޯއިން ހާމަކޮށްފިއެވެ. ސްޓެލްކޯއިން ހާމަކޮށްފައިވާ ޗާޓުން ދައްކާގޮތުގައި ކަރަންޓު ބޭނުން ކުރާ މިންވަރު އެންމެ މަތީ ހެނދުނު 9 އިން މެންދުރު 1 އާ ހަމައަށް، އަދި މެންދުރު 1 އިން ހަވީރު 5 އާ ހަމައަށެވެ.
ހެނދުނު 9 އިން މެންދުރު 1 އާ ހަމައަށް ކަރަންޓު ބޭނުންކުރާ މިންވަރު އިތުރުވަނީ މިއީ އޮފީސް ގަޑިއަށްވެފައި، ހޫނުވެސް ގަދަވަމުންދާ ވަގުތަކަށްވާތީ ކަމަށް ސްޓެލްކޯއިން ވަނީ ބުނެފައެވެ. އަދި މެންދުރު 1 އިން ހަވީރު 5 އާ ހަމައަށް ކަރަންޓު ބޭނުންކުރާ މިންވަރު އިތުރުވަނީ ހޫނުގަދަވުމުގެ އިތުރުން، ރަމަޟާން މަހަށްވެފައި މިއީ ބަދިގޭގެ އެޕްލަޔަންސްތައް ގިނައިން ބޭނުންކުރާ ވަގުތަކަށްވާތީއެވެ.
މީގެ އިތުރުން، ރޭގަނޑު 7 އިން ދަންވަރު 12 އާ ހަމައަށްވެސް ކަރަންޓު ބޭނުންކުރާ މިންވަރު މެންދުރުގެ ލޯޑާ އެއްވަރެއްގައި ހުންނަކަން ފާހަގަ ކޮށްފައިވެއެވެ. ނަމަވެސް ރޭގަނޑު 12 އިން ހެނދުނު 6 އާ ހަމައަށް، އަދި ހަވީރު 5 އިން ރޭގަނޑު 7 އާ ހަމައަށް ކަރަންޓު ބޭނުންކުރާ މިންވަރު ދަށްވެއެވެ.
މި ހޯދުންތަކުގެ އަލީގައި، ކަރަންޓު ބޭނުންކުރާ މިންވަރު އިތުރުވާ ގަޑިތަކުގައި ކަރަންޓު އިޤްތިޞާދުކުރުމަށް ޚާއްޞަ ސަމާލުކަމެއް ދިނުމަށް ސްޓެލްކޯއިން އިލްތިމާސްކުރެއެވެ. މިކަމުގެ ސަބަބުން ކަރަންޓުގެ ޚަރަދު ކުޑަކުރުމަށާއި ތިމާވެށި ހިމާޔަތްކުރުމަށް އެހީތެރިވެދާނެއެވެ.