ގދ. ގަމުގައި 5 ދާއިރާއަކުން އިންވެސްޓުކުރުމުގެ ފުރުޞަތު ހުޅުވާލައިފި

ހުވަދުއަތޮޅު ދެކުނުބުރީ ގައްދޫގެ އިޚްތިޞާޞްގައި ހިމެނޭ ގަމުގައި އިންވެސްޓުކުރުމުގެ ފުރުޞަތު ހުޅުވާލައިފިއެވެ. މި ފުރުޞަތު ހުޅުވާލާފައިވަނީ ގދ. ގައްދޫ ކައުންސިލުންނެވެ.

ގައްދޫ ކައުންސިލުން މަޢުލޫމާތު ދެއްވާފައިވާ ގޮތުގައި، ގަމުގައި ވަކި ދާއިރާތަކަކުން މަޝްރޫޢުތައް ތަރައްޤީކޮށް ހިންގުމަށް ޝައުޤުވެރިވާ ފަރާތްތަކަށް މި ފުރުޞަތު ހުޅުވާލެވިފައިވެއެވެ. މި ފުރުޞަތު ރާއްޖެއާއި ރާއްޖެއިން ބޭރުގެ ފަރާތްތަކަށްވެސް ލިބިގެންދާނެކަމަށް ކައުންސިލުން ވިދާޅުވެފައިވެއެވެ.

އިންވެސްޓްމަންޓް ތަރައްޤީކުރުމަށް ހުޅުވާލެވިފައިވަނީ 5 ދާއިރާއެކެވެ. އެއީ:
1. ފަތުރުވެރިކަމާއި ގުޅުންހުރި ކަންކަން
2. ދަނޑުވެރިކަމާއި ގުޅުންހުރި ކަންކަން
3. މަސްވެރިކަމާއި ގުޅުންހުރި ކަންކަން
4. ޕްރޮޑަކްޝަން އަދި މެނުފެކްޗަރިންގ އާއި ގުޅުންހުރި ކަންކަން
5. ރިސާޗްއާ ގުޅުންހުރި ކަންކަން

ގައްދޫ ކައުންސިލުން އިތުރަށް މަޢުލޫމާތު ދެއްވާފައިވާ ގޮތުގައި، ޝޯޓްލިސްޓްކުރެވޭ އެންމެ ރަނގަޅު ހުށަހެޅުންތައް ހުށަހަޅާފައިވާ ފަރާތްތަކުގެ ހުށަހެޅުންތަކަށް ރިޢާޔަތްކޮށް އެފަރާތްތަކަށް ބިޑު ހުށަހެޅުމަށް ފުރުޞަތު ދެވިގެންދާނެއެވެ.

އިންވެސްޓްމަންޓްތައް ހިންގުމަށް ޝައުޤުވެރިވާ ފަރާތްތަކުން އަންނަ އެޕްރީލް މަހުގެ 30 ވަނަ ދުވަހު ކައުންސިލުން ބަންދުވުމުގެ ކުރިން ފޯމު ހުށަހަޅަންވާނެކަމަށް ކައުންސިލުން ވިދާޅުވެފައިވެއެވެ.

ފާހަގަކޮށްލެވޭ ކަމަކީ، މިދިޔަ އަހަރުގެ ޖޫން މަހުގެ 4 ވަނަ ދުވަހު ގައްދޫ ކައުންސިލުން ވަނީ ގަމުގެ ލޭންޑް ޔޫސްޕްލޭން ހެދުމާއި ވިޔަފާރި އުޞޫލުން އެރަށް ބެލެހެއްޓުމަށްޓަކައި އެކަމަށް އެދޭ ފަރާތްތަކަށް އެ ފުރުޞަތު ހުޅުވާލާފައެވެ. އަދި ވިޔަފާރި އުޞޫލުން ގަން ބެލެހެއްޓުމަށް ދޫކޮށްފައިވަނީ  05 އަހަރު ދުވަހުގެ މުއްދަތަކަށެވެ.

ހުވަދުއަތޮޅު ދެކުނުބުރީ ގަން، ގައްދޫ ކައުންސިލްގެ އިޚްތިޞާސްތެރޭގައި ހިމެނުއްވުމަކީ  ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ.