ވިޔަފާރި / ޚަބަރު
ހޯލްސޭލްކޮށް ވިޔަފާރިވެރިންނަށް ކާށި ދޫކުރުމަށް އެސްޓީއޯއިން ނިންމައިފި
ކާށި---
ހުލާސާ
ހޯލްސޭލްކޮށް ކާށި ބޭނުންވާ ފަރާތްތަކުްނ އެސްޓީއޯއަށް ގުޅައި، ބުކް ކުރުމަށް ވަނީ އިއުލާންކޮށްފައި.
ބާޒާރުގައި ކާށީގެ އަގު އިންތިހާއަށް މައްޗަށް ގޮސްފައިވުމާ ގުޅިގެން، ކާށީގެ އަގު ކޮންޓްރޯލް ކުރުމުގެ ގޮތުން ހޯލްސޭލްކޮށް ވިޔަފާރިވެރިންނަށް ދޫކުރުމަށް ރާއްޖެއިން ބޭރުން ކާށި ގެނެސްދިނުމަށް އެސްޓީއޯއިން ނިންމައިފިއެވެ.
އެސްޓީއޯއިން ހާމަކޮށްފައިވާ ގޮތުގައި މިހާރު ބާޒާރުގައި ކާށީގެ އަގު އުޅެނީ 40 ރުފިޔާ އާއި 60 ރުފިޔާއާ ދެމެދުގައެވެ. އަދި އެ ކުންފުނިން ޕީޕަލްސް ޗޮއިސް މެދުވެރިކޮށް ކިލޯއެއް 20 ރުފިޔާގެ ރޭޓުން ސީދާ އާންމުންނަށް ވިއްކަން ފަށާފައިވީނަމަވެސް، ކާށީގެ ޑިމާންޑު ދަށަށް ގޮސްފައި ނުވާކަން ފާހަގަ ކުރެވިފައިވާކަމަށް ވަނީ ހާމަކޮށްފައެވެ.
އެހެންކަމުން ބާޒާރުގެ އަގުތައް ތިރިކުރުމަށްޓަކައި ވިޔަފާރިވެރިންނަށް ބޭނުންވާ މިންވަރަށް ކާށި އިމްޕޯޓްކޮށްދިނުމަށް ނިންމައި، ކާށީގެ ސްޓޮކް ބުކްކުރުމުގެ ފުރުޞަތު މިހާރު ވަނީ ހޯލްސޭލަރުންނަށް ހުޅުވާލާފައެވެ. އަދި މިއީ ރާއްޖޭގެ ޑިމާންޑާ އެއްވަރަށް ކާށި ސަޕްލައި ކުރުމަށް ނިންމިނިންމުމެއްކަމަށް އެސްޓީއޯއިން ވަނީ ހާމަކޮށްފައެވެ.
އެގޮތުން ކާށީގެ ސްޓޮކް ހޯއްދެވުމަށް ޝައުޤުވެރިވާ ހޯލްސޭލް ވިޔަފާރިވެރިންނަށް، އެސްޓީއޯ ޕީޕަލްސް ޗޮއިސްގެ 3012575 ނަންބަރަށް ގުޅުއްވުމުގެ އިތުރުން 7291124 އަށް ވައިބަރ މެސެޖް ކޮށްގެންވެސް ބުކްކުރެވިދާނެކަމަށް އެސްޓީއޯއިން ވަނީ ހާމަކޮށްފައެވެ. އަދި ބުކިން ލިބޭ މިންވަރަށް ބަލައި، ކޮންމެ 10 ދުވަހަކުން ކާށީގެ ޝިޕްމެންޓް ގެންނާނެކަމަށް އެ ކުންފުނިން ވަނީ ހާމަކޮށްފައެވެ.
ހޯލްސޭލްކޮށް ކާށި ބުކްކުރެވޭނެ ގޮތުގެ މަޢުލޫމާތު
މީގެ އިތުރުން އެސްޓީއޯއިން ބުނީ، ހޯލްސޭލަރުންނަށް އެކަށޭނަ އަގެއްގައި އެސްޓީއޯގެ ގުދަނާހަމައަށް ކާށީގެ ސްޓޮކް ގެނެސްދޭނެ ކަމަށެވެ. އަދި މުދަލަށް ފައިސާ ދައްކަންޖެހޭނީ ދިވެހި ރުފިޔާއިންކަމަށާއި، ޝިޕްމަންޓް އައުމުންކަމަށް ވެސް ހާމަކޮށްފައިވެއެވެ.
އެސްޓީއޯއިން މީގެ ކުރިންވެސް ވަނީ އަސާސީ ތަކެތި ލިބުމުގައި ކުރިމަތިވާ މިފަދަ ދަތި ހާލަތްތަކުގައި މެދުވެރިއެއްގެ ދައުރު އަދާކޮށްފައެވެ. މީގެ ތެރޭގައި 2023-2024 ވަނަ އަހަރު ދުނިޔޭގެ ބާޒާރުގައި ދިމާވި ފިޔާގެ ދަތިކަން ޙައްލުކުރުމަށް އެހީތެރިވެދިނުން ފާހަގަކުރެވެއެވެ. އަދި އެ ކުންފުނީގެ މިހާރުގެ އަމާޒަކީ ހޯލްސޭލަރުންނަށް ފަސޭހަކަމާއެކު ކާށި އެތެރެކޮށްދީ، އެކަށީގެންވާ އަގެއްގައި އާންމު ރައްޔިތުންނަށް ކާށި ލިބޭނެ މަގު ތަނަވަސްކޮށްދިނުންކަމަށް ވަނީ ހާމަކޮށްފައެވެ.
