ކެނދިކުޅުދޫގައި ކޮމިއުނިޓީ ބޭސްޑް ޓޫރިޒަމް ތަޢާރަފުކޮށް ބިން ދޫކުރަން ނިންމައިފި

ނ. ކެނދިކުޅުދޫގައި ކޮމިއުނިޓީ ބޭސްޑް ޓޫރިޒަމް ކޮންސެޕްޓް ތަޢާރަފުކޮށް، ފަތުރުވެރިކަމަށް ބިން ދޫކުރުމަށް އެރަށު ކައުންސިލުން ނިންމައިފިއެވެ. މިކަމާ ގުޅިގެން މިހާރު ވަނީ ބިންދޫކުރުމުގެ އުސޫލަށް ޚިޔާލު ހުށައެޅުމަށް ހުޅުވާލައިފައެވެ.

ކެނދިކުޅުދޫ ކައުންސިލުން މަޢުލޫމާތު ދެއްވިގޮތުގައި، މި ނިންމުމަކީ ކެނދިކުޅުދޫގެ ޒުވާން ވިޔަފާރިވެރިންނާއި، އަލަށް ވިޔަފާރީގެ ތެރެއަށް ވަނުމުގެ ޝައުޤުވެރިކަން ހުރި ފަރާތްތަކަށް ފުރުޞަތު ހޯދައިދިނުމުގެ ގޮތުން އެޅޭ ފިޔަވަޅެކެވެ. ބިން ހޯދުމަށް އެދި ހުށަހަޅަންވާނީ ކައުންސިލުން ބީލަމުގެ އުސޫލުން ބިން ދޫކުރުމަށް އިޢުލާންކުރުމުން، އިޢުލާންގައި ބަޔާންކޮށްފައިވާ ގޮތަށެވެ.

ކައުންސިލުން އިތުރަށް ހާމަކުރެއްވި ގޮތުގައި، ބިން ކުއްޔަށް ހިފާ ފަރާތަކީ ކެނދިކުޅުދޫ ރަށްވެއްސެއްކަމުގައިވުމާއެކު، ކެނދިކުޅުދޫގައި ރަޖިސްޓްރީކޮށްފައިވާ ވިޔަފާރީއެއް ނުވަތަ ކެނދިކުޅުދޫ ރަށްވެއްސަކު އެ ވިޔަފާރީއެއްގެ 50 އިންސައްތައަށްވުރެ މަދުނޫން އަދަދަކަށް ރައުސުމާލުގައި ހިއްސާވާ ވިޔަފާރީއެއް ކަމުގައިވާންޖެހޭނެއެވެ. ދޫކުރާ ކޮންމެ ބިމެއްގެ ބޮޑުމިނަކީ 1200 އަކަފޫޓެވެ.

ލޯކަލް ޓުއަރިޒަމަށް ކެނދިކުޅުދޫ ފައްކާކުރުމުގެ ގޮތުން، ކެނދިކުޅުދޫ ބްރޭންޑިންގ "ދި މެންގްރޫވް އައިލެންޑް" ގެ ނަމުގައި ރަށް ޕްރޮމޯޓްކޮށް މާކެޓްކުރަން ރަށު ކައުންސިލުން ވަނީ ފަށާފައެވެ. ކެނދިކުޅުދޫއަށް މިހާރު ވަނީ ޓުއަރިސްޓުންނަށް ހޯމްސްޓޭ ކުރުމުގެ ހުއްދަ ލިބިފައެވެ. އަދި އެރަށުގައި ލަގްޒަރީ ގެސްޓް ވިލާތަކެއް އަޅައި ހިންގުމަށްވެސް ވަނީ ހަވާލުކޮށްފައެވެ.

ގުދުރަތީގޮތުން މުއްސަނދި ކެނދިކުޅުދޫއަކީ 207 ހެކްޓަރުގެ ބޮޑުމިނުގެ ރަށެކެވެ. މި ރަށުގައި ގުދުރަތީގޮތުން އުފެދިފައިވާ 9 ކުޅި އެބައޮތެވެ. މީގެ ތެރޭގައި 400 ފޫޓުން ފެށިގެން 3000 ފޫޓާ ދެމެދުގެ ދިގުމިންހުރި 3 ކުޅިއެއް ހިމެނެއެވެ. މި ކުޅިތަކުގައި ކަނޑޫފަލާއި، އާންމުކޮށް ނުފެންނަ ގިނަ ދޫނިސޫފާސޫތްޕާއި، މަސްމަހާމެއްސާއި، އެކި ބާވަތުގެ ގަސްގަހާގެހި ހިމެނެއެވެ.