މޫސުމަށް އަންނަ ބަދަލުތަކަށް ބައިނަލްއަޤްވާމީ ފެންވަރުގައި ދެމެހެއްޓެނިވި ހައްލުތަކެއް ހޯދަންޖެހޭ- ރައީސް

މޫސުމަށް އަންނަ ބަދަލުތަކުގެ ސަބަބުން ކަނޑުގެ ލޮނުގަނޑު އުސްވުމުގެ މައްސަލައަށް ބައިނަލްއަޤްވާމީ ފެންވަރުގައި ދެމެހެއްޓެނިވި އަވަސް ހައްލުތަކެއް ހޯދަންޖެހޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

މިހާރު ކުރިއަށްދާ އދ.ގެ އާއްމު މަޖިލީހުގެ ހަވާސާގެ ތެރެއިން ބޭއްވި މަތީ ފަންތީގެ ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ދިވެހިރާއްޖެ ފަދަ މޫސުމަށް އަންނަ ބަދަލުތަކުގެ ސަބަބުން ނުރައްކާތެރި ކާރިސާތަކާ ކުރިމަތިލާންޖެހޭ ޤައުމުތަކަށް އެހީތެރިވުމަށް ގެއްލުމާއި ގެއްލުންތަކަށް ބަދަލުދިނުމުގައި މާލީ އެހީ ފަސޭހައިން ލިބޭނެ ގޮތްތަކެއް ހުންނަންޖެހޭކަމަށެވެ. އަދި މޫސުމަށް އަންނަ ބަދަލުތަކަށް ހޭނުމަށް ކުރާ ހޭދައާއި މޫސުމަށް އަންނަ ބަދަލުތަކުން ރައްކާތެރިވުމަށް ކުރާ ހޭދައިގެ ފަރަޤު ކުޑަކުރަންޖެހޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ވިދާޅުވީ މިދިޔަ 5 އަހަރު ތެރޭގައި މޫސުމީ ކާރިސާތަކުގެ ސަބަބުން ކުދި ޖަޒީރާ ޤައުމުތަކަށް 153 ބިލިއަން ޑޮލަރުގެ ގެއްލުމާއި ކުރިމަތިލާންޖެހިފައިވާކަމަށެވެ. ނަމަވެސް އެކަންކަމުން އަރައިގަތުމަށް އުފައްދާފައިވާ ލޮސް އެންޑް ޑެމޭޖް ފަންޑަށް ދޭން ޤައުމުތަކުން ވައުދުވެފައިވާ 661 މިލިއަން ޑޮލަރަކީ އެކަށީގެންވާ އަދަދެއް ނޫންކަން ފާހަގަކުރައްވައި، ރައީސުލްޖުމްހޫރިއްޔާ ވަނީ އެމަސައްކަތަށް މިހާރަށްވުރެ ބޮޑު އެއްބާރުލުމެއް ދެއްވުމަށް ބައިނަލްއަޤްވާމީ މުޖްތަމަޢަށް ގޮވާލައްވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި ނާޒުުކު ގޮނޑުދޮށުގެ މުޖުތަމަޢުތަކާއި ތިރި ރަށްތަކުގެ ޤައުމުތަކުގެ ހާލަތާ އެކަށޭނަ ޤާބިލުކަން އިތުރުކުރުމުގެ މުހިންމުކަމާއި، އަދި ޓެކްނޮލޮޖީގެ ޤާބިލުކަން އިތުރުކުރުމުގައި އަމިއްލަ ފަރާތްތަކުގެ ދައުރުގެ މައްޗައް އަލިއަޅުއްވާލެއްވިއެވެ.

ރައީސް ވިދާޅުވީ، ތަރައްޤީގެ ދާއިރާތަކަށް ބޭނުންކުރެވިދާނެ ފައިސާ، ރާއްޖޭގެ މޫސުމަށް އަންނަ ބަދަލުތަކާ ކުރިމަތިލުމަށް ޚަރަދުކުރަން ޖެހިފައިވާކަމެވެ.