ވިޔަފާރި / ޚަބަރު
ލިވަޕޫލްގެ ރަސްމީ ފަތުރުވެރިކަމުގެ މަންޒިލަކަށް ދިވެހިރާއްޖެ ހަމަޖައްސައިފި

ލިވަޕޫލްގެ އިއާން ރަޝް އާއި ރާއްޖޭގެ ޓުއަރިޒަމް މިނިސްޓަރ އަދި އެމްއެމްޕީއާރުސީގެ އެމްޑީ އާއި އެ ކޯޕަރޭޝަންގެ މުވައްޒަފުން---
ރާއްޖޭގެ ފަތުރުވެރިކަން ޕްރޮމޯޓުކުރުމުގެ ގޮތުން، އިނގިރޭސިވިލާތަށް ނިސްބަތްވާ ލިވަޕޫލް ފުޓްބޯލް ކްލަބުގެ ރަސްމީ ފަތުރުވެރިކަމުގެ މަންޒިލެއްގެ ގޮތުގައި ދިވެހިރާއްޖެ ހަމަޖައްސައިފިއެވެ.
ލިވަޕޫލުން ނެރުނު ރަސްމީ ބަޔާނެއްގައި ބުނީ، ދިވެހިރާއްޖޭގެ ޓުއަރިޒަމް ބްރޭންޑް، ވިޒިޓް މޯލްޑިވްސްއާއެކު އައިސްފައިވާ އެއްބަސްވުމާ ގުޅިގެން، ރާއްޖެއަކީ މަތީފަންތީގެ މަންޒިލެއްގެ ގޮތުގައާއި ރާއްޖޭގައި ފަތުރުވެރިންނަށް ހުރި ކަންތައްތަކާ ގުޅިގެން އެ ކްލަބުން އިޝްތިހާރުކުރާނެ ކަމަށެވެ.
ވިޒިޓް މޯލްޑިވްސް އާއި ލިވަޕޫލްއާ ދެމެދު މި އެފުދުނު ގާތް ގުޅުމާ ގުޅިގެން، ލިވަޕޫލްގެ ސަޕޯޓަރުންނަށް ވަނީ ރާއްޖޭގައި ފަސް ރޭ ހޭދަކުރެވޭނެ ލަކީޑްރޯއެއްވެސް ހުޅުވާލާފައެވެ. މި ލަކީޑްރޯގައި ފްލައިޓް ޓިކެޓާއި، ރާއްޖޭގައި ޗުއްޓީ ހޭދަ ކުރުމުގެ ހުރިހާ ޚަރަދެއް ހިމެނެއެވެ.
މީގެ އިތުރުން ލިވަޕޫލުން ބުނީ، ވިޒިޓް މޯލްޑިވްސްއާއެކު މި އުފެދުނު ގުޅުމާއެކު، ފައިސާއަށް ނުގަނޭ އެތައްކަމެއް ލިވަޕޫލްގެ ސަޕޯޓަރުންނަށް ފަހިވެގެންދާނެކަމަށެވެ.
އަދި ލިވަޕޫލަށް ދުނިޔޭގައި އޮތް މަޤުބޫލުކަމާއެކު، ދިވެހިރާއްޖެ އިތުރަށް މަޝްހޫރުވެގެންދާނެކަމަށް އެ ކްލަބުން ވަނީބުނެފައެވެ. އެގޮތުން 200 މިލިއަނަށް ވުރެ ގިނަ މީހުން ލިވަޕޫލްގެ ސޯޝަލް މީޑިއާ ޕްލެޓްފޯމްތަކުގައި ތިބޭއިރު، މިދިޔަ ސީޒަންގައި އެކަނި ވެސް 12 ބިލިއަން ވިއުޒް އަދި 1.5 ބިލިއަން މީހުން އެ ކްލަބުގެ ޕޯސްޓުތަކުގައި އެންގޭޖުވެފައިވާކަމަށް އެ ކްލަބުން ހާމަކޮށްފައިވެއެވެ.
މި އެއްބަސްވުމާ ގުޅިގެން އެމްއެމްޕީއާރުސީއިން ބުނީ، ލިވަޕޫލާއި ވިޒިޓް މޯލްޑިވްސްގެ ގުޅުން ރަސްމީކޮށް އިޢުލާންކުރާނީ އެ ކްލަބާއި އެވަޓަން އެޕްރީލް ދެވަނަ ދުވަހު ކުޅޭ މެޗުގައި ކަމަށާއި، އެ މެޗުގައި އެންފީލްޑް ސްޓޭޑިއަމްގެ ލެޑް ބޯޑުތަކުގައި މި ޕާޓްނާޝިޕާއި ރާއްޖޭގެ މަންޒަރުތައް ދައްކާލާނެ ކަމަށެވެ.
މީގެ އިތުރުން، މި އެއްބަސްވުމާއެކު، އިތުރު އެއް ލައްކަ ފަތުރުވެރިން ރާއްޖެ އަންނާނެކަމަށް އެމްއެމްޕީއާރުސީއިން އަންދާޒާކުރެއެވެ. އަދި އޭރުން އާމްދަނީއަށް އިތުރު 100 މިލިއަން ޑޮލަރު ވަންނާނެކަމަށް ވެސް އެ ކޯޕަރޭޝަނުން އަންދާޒާ ކުރެއެވެ.
އެމްއެމްޕީއާރުސީއިން އިތުރަށް ބުނީ، ޕްރިމިއަރ ލީގުގައި ލިވަޕޫލުން އެންފީލްޑްގައި ކުޅޭ މެޗުތަކުގައި ވިޒިޓް މޯލްޑިވްސް އިޝްތިހާރުކުރާނެކަމަށެވެ. އަދި ސްޓޭޑިއަމްގެ އެކި ސަރަހައްދުތަކުގައި ރާއްޖޭގެ ޓޫރިޒަމް ބްރޭންޑިން ޖަހައި، އެ ކްލަބުގެ ރަސްމީ ޕަބްލިކޭޝަންތަކުގައި ވެސް ރާއްޖެ ޕްރޮމޯޓު ކުރާނެކަމަށެވެ.
މި ޕާޓްނާޝިޕާއެކު އަޅުގަނޑުމެންގެ އަމާޒަކީ ހުވަފެންތައް ހަގީގަތަކަށް ވާ މަންޒިލެއްގެ ގޮތުގައި ރާއްޖެ ތަޖުރިބާ ކުރުމަށް އެތައް މިލިއަން ސަޕޯޓަރުންނަށް ހިތްވަރު ދިނުން.
އެމްއެމްޕީއާރުސީގެ ސީއީއޯ އިބްރާހިމް ޝިއުރީ ވިދާޅުވިއެވެ.
އެމްއެމްޕީއާރުސީން ބުނީ، ލިވަޕޫލްގެ އޯޑިއަންސްގެ ތެރެއިން އެންމެ ދެ ޕަސެންޓް މީހުން ރާއްޖެއަށް ޒިޔާރާތް ކުރިޔަސް އަމާޒަށް ވާސިލް ވެވޭނެކަމަށެވެ.