ހަނިމާދޫއިން ބެންގަލޫރަށް ސީދާ ދަތުރުތައް ފަށަނީ

ހަނމާދޫ އިންޓަނޭޝަނަލް އެއާރޕޯޓުން އިންޑިއާގެ ބެންގަލޫރަށް ސީދާ ދަތުރުތައް ފެށުމަށް، ޤައުމީ އެއާރލައިން މޯލްޑިވިއަނުން ނިންމައިފިއެވެ. 

މޯލްޑިވިއަނުން ހާމަކޮށްފައިވާ ގޮތުގައި، މި ސެކްޓަރގެ ފުރަތަމަ ދަތުރު އޮންނާނީ މެއި މަހުގެ 15 ވަނަ ދުވަހެވެ. 

އެގޮތުން މިއީ އުތުރުގެ އަތޮޅުތަކުގެ ދިވެހީންނަށް އިންޑިއާއަށް ދަތުރުކުރުމަށް ލިބޭ ވަރަށް ބޮޑު ފަސޭހައަކަށްވެގެން ދާއިރު، މި ދަތުރުތަކުގެ ސަބަބުން އުތުރުގެ ރަށްތަކަށާއި ރިޒޯޓުތަކަށް އަންނަން ބޭނުންވާ އިންޑިއާގެ ފަތުރުވެރިންނަށް ވެސް މިއީ ލިބިގެންދާނެ ވަރަށް ބޮޑު ލުއިފަސޭހަ ކަމެކެވެ.

މިއަދުން ފެށިގެން މި ދަތުރުތަކުގެ ބުކިން ހެދުމަށް ހުޅުވާލާފައިވާއިރު، ހަނިމާދޫއާ ބެންގަލޫރާ ދެމެދު ހަފްތާއަކު ދެ ދަތުރު އެޅުމަށް މޯލްޑިވިއަނުން ވަނީ ނިންމާފައެވެ. އެއީ ކޮންމެ ހަފްތާއަކު އާދީއްތަ ދުވަހާއި ބުރާސްފަތި ދުވަހެކެވެ.

މި ދަތުރުތަކާ ގުޅިގެން މޯލްޑިވިއަންގެ މެނޭޖިންގ ޑިރެކްޓަރ އިބްރާހީމް އިޔާސް ވިދާޅުވީ، މިއީ ރާއްޖޭގެ އުތުރުގެ އަތޮޅުތަކާއި ބޭރުގެ އެކި ސިޓީތަކާއި ގުޅާލުމަށް މޯލްޑިއަނުން ކުރަމުންދާ މަސައްކަތުގެ ބައެއް ކަމަށެވެ. 

އިޔާސް މިހެން ވިދާޅުވިއިރު، އެ އެއާރލައިނުން މިހާރު ވެސް އަންނަނީ ހަނިމާދޫއިން އިންޑިއާގެ ޓްރިވެންޑްރަމްއަށް ދަތުރުތައް ބާއްވަމުންނެވެ. މި ދަތުރުތައް ވެސް ހަފްތާއަކު ދެ ދުވަހު އޮވެއެވެ. 

މޯލްޑިވިއަންގެ ޚިދުމަތް ފުޅާކޮށް ބައިނަލްއަޤްވާމީ ގިނަ މަންޒިލްތަކަށް އެ އެއާރލައިންގެ ދަތުރުތައް ފެށުމަކީ ސަރުކާރުގެ އަމާޒެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދާއި އެއްގޮތަށް ޤައުމީ އެއަރލައިނަށް ވައިޑް ބޮޑީ އެއަރ ކްރާފްޓެއް ގެނެސްފައިވަނީ މިއަހަރުގެ ޖަނަވަރީ މަހުގެ 6ވަނަ ދުވަހުއެވެ.

އަދި މޯލްޑިވިއަންގެ ވައިޑް-ބޮޑީ މަތިންދާ ބޯޓުގެ ދަތުރުތައް މިހާރު ޗައިނާގެ 3 މަންޒިލަކަށް ކުރަމުންދާއިރު، ޔޫރަޕާއި، ސައުތު އެފްރިކާއަށް މޯލްޑިވިއަންގެ ދަތުރުތައް ފެށުމުގެ މަސައްކަތް އެ އެއާރލައިނުން މިހާރު އަންނަނީ ކުރަމުންނެވެ.