މުމްބާއި އިންޑިއަންސްގެ ރަސްމީ ފަތުރުވެރި މަންޒިލަކަށް ރާއްޖެ ހަމަޖައްސައިފި

އިންޑިއާގެ މުމްބާއިއަށް ނިސްބަތްވާ އެ ޤައުމުގެ މަޝްހޫރު ކްރިކެޓް ޓީމް، މުމްބާއި އިންޑިއަންސްއިން ކުރިއަށް އޮތް ސީޒަންގެ ރަސްމީ ފަތުރުވެރި މަންޒިލަކަށް ދިވެހިރާއްޖެ ހަމަޖައްސައިފިއެވެ. 

ދުނިޔޭގައި ދެވަނައަށް އެންމެ މަޝްހޫރު ކުޅިވަރު، އަދި އިންޑިއާގެ އެންމެ މަޝްހޫރު ކުޅިވަރުގެ ގަދަ ބާރަކާއެކީ ދިވެހިރާއްޖޭގެ ފަތުރުވެރިކަމުގެ ބްރޭންޑް، ވިޒިޓް މޯލްޑިވްސްއިން މި ހެދި ޕާޓްނާރޝިޕަކީ، އިންޑިއާގައި ދިވެހިރާއްޖޭގެ ފަތުރުވެރިކަން އިތުރަށް އިޝްތިހާރުކޮށް، އިންޑިއާއިން ރާއްޖެ އަންނަ ފަތުރުވެރިން މިހާރަށް ވުރެ އިތުރުކުރުމަށް ހުޅުވިގެންދާ މުހިންމު ދޮރެކެވެ.

ފަސް ފަހަރު އިންޑިއަން ޕްރިމިއަރ ލީގު ކާމިޔާބުކޮށްފައިވާ މުމްބާއީ އިންޑިއަންސްއަކީ އިންޑިއާގެ އެންމެ ކާމިޔާބު އަދި އެންމެ އަގުބޮޑު ޓީމު ވެސް މެއެވެ. 

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މެނޭޖިން ޑިރެކްޓަރ، އިބްރާޙިމް ޝިއުރީ ހާމަކޮށްފައިވާ ގޮތުގައި، މި އެއްބަސްވުމާއެކު ދިވެހިރާއްޖޭގެ ޓާގެޓަކީ މި އަހަރު އިންޑިއާއިން ދެ ލައްކަ ފަތުރުވެރިން ދިވެހިރާއްޖެ ގެނައުމެވެ. އަދި މުމްބާއި އިންޑިއަންސްއާއެކު ހެދުނު މި ޕާޓްނާރޝިޕަކީ ވަރަށް ބޮޑު ކާމިޔާބެއްކަމަށް ޝިއުރީ ވަނީ ސިފަކުރައްވާފައެވެ. 

ކުރިކެޓަކީ އިންޑިއާގެ އެތައް މިލިއަން ބައެއްގެ މެދުގައި އެންމެ މަޤުބޫލު ކުޅިވަރު. އަދި މިއީ ދިވެހިރާއްޖެ އާއި މުޅި ދުނިޔޭގެ ވެސް އެތައް ބަޔަކު ލޯބިކުރާ ކުޅިވަރެއް. އެހެންކަމުން އިންޑިއާގެ އެންމެ މަޤުބޫލު ކްރިކެޓު ޓީމާއެކު މި ހެދުނު ޕާޓްނާރޝިޕަކީ، އިންޑިއާގެ ގިނަ ބަޔަކު ޗުއްޓީ ހޭދަކޮށްލުމަށް ރާއްޖެ ގެނައުމަށް ބާރުއެޅިގެން ދާނެ ކަމެއްކަމަށް ދެކެން.  

އެމްއެމްޕީއާރުސީގެ މެނޭޖިން ޑިރެކްޓަރ، އިބްރާޙިމް ޝިއުރީ ވިދާޅުވިއެވެ.

މި އެއްބަސްވުމާ ގުޅިގެން މުމްބާއި އިންޑިއަންސްގެ ފަރާތުން ވާހަކަދެއްކި އޮފިޝަލެއް ބުނީ، ކްރިކެޓާއި ޗުއްޓީއަކީ މުޅި އުމުރަށް ދެމިގެންދާ ހަނދާންތަކާ ގުޅިފައިވާ ކަންތައްތައް ކަމަށެވެ. އަދި މި ޕާޓްނާރޝިޕާއެކު، މުޅި ދުނިޔޭގައި ތިބި މުމްބާއީ އިންޑިއަންސްގެ ސަޕޯޓަރުންނަށް ރާއްޖެ އިޝްތިހާރުވެގެން ދާނެކަމަށް އޭނާ ވަނީ ބުނެފައެވެ.

ރާއްޖޭގެ ފަތުރުވެރިކަން މާކެޓްކުރުމަށް އެމްއެމްޕީއާރުސީއިން ދަނީ ގިނަ މަސައްކަތްތަކެއްކުރަމުންނެވެ. އެގޮތުން މިމަހުގެ 13ވަނަ ދުވަހު އިނގިރޭސިވިލާތުގެ މަޝްހޫރު ފުޓްބޯޅަ ކްލަބް، ލިވަރޕޫލްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް ވިޒިޓް މޯލްޑިވްސް ވަނީ ހަމަޖައްސައިފައެވެ. މި ޕާޓްނާރޝިޕް ރަސްމީކޮށް އިފްތިތާހުކުރާނީ އަންނަ އޭޕްރީލްމަހުގެ 2 ވަނަ ދުވަހު ލިވަޕޫލް އެފްސީ އެވަޓަންއާ ދެކޮޅަށް ކުޅޭ މެޗުގައެވެ.