ވިޔަފާރި / ޚަބަރު
މޯލްޑިވިއަނުން އެތެރޭގެ އުދުހުންތަކަށް އައު ކްލާހެއް ތަޢާރަފްކުރަނީ

މޯލްޑިވިއަން އެއާރލައިންގެ ކްރޫއިން ތަކެއް، ފޮޓޯ: މޯލްޑިވިއަން
ދިވެހިރާއްޖޭގެ ޤައުމީ އެއާރލައިން، މޯލްޑިވިއަނުން އެތެރޭގެ އުދުހުންތަކަށް އައު ކްލާހެއް ތަޢާރަފްކުރަން ނިންމައިފިއެވެ. އެގޮތުން މިއަންނަ އޭޕްރިލް މަހުގެ 13ވަނަ ދުވަހުން ފެށިގެން މޯލްޑިވިއަންގެ ޓިކެޓު ކްލާހަށް އިތުރުކުރަން ނިންމާފައިވަނީ ޕްރިމިއަމް އިކޮނޮމީއެވެ.
މޯލްޑިވިއަންއިން ހާމަކޮށްފައިވާ ގޮތުގައި، މި ޚިދުމަތާއެކު މޯލްޑިވިއަންގެ ފަސިންޖަރުންނަށް އިތުރު ލުއިތަކެއް ލިބިގެންދާނެއެވެ.
ޕްރިމިއަމް އިކޮނޮމީ ކްލާހުގައި ދަތުރުކުރާ ފަސިންޖަރުންނަށް ހިމަނާފައިވާ ޙާއްސަ ޚިދުމަތްތަކުގެ ތެރޭގައި ކޮންމެ ފަސިންޖަރަކަށް 25 ކިލޯގެ ބެގޭޖް އެލެވެންސާއި، އިތުރު ފީއަކާ ނުލައި ފުރާ ދުވަސް އެއް ފަހަރު ބަދަލުކުރެވޭނެ އިންތިޒާމް ހިމެނެއެވެ. ހަމަމިއާއެކު ފަސިންޖަރުންނަށް ހާއްސަ ސީޓުތަކެއް ހަމަޖައްސާފައިވާއިރު ފްލައިޓްގައި ލުއިކެއުމަކާއި ބުއިމެއް ލިބިގެންދާނެއެވެ.
މީގެ އިތުރުން ޕްރިމިއަމް އިކޮނޮމީ ކްލާހުގެ ފަސިންޖަރުންނަށް އެއާރޕޯޓު ބޭނުންކުރުމުގައި ވެސް ފަސޭހަ ގޮތްތަކެއް ހަމަޖައްސާފައިވާނެކަމަށް މޯލްޑިވިއަންއިން ވަނީ ހާމަކޮށްފައެވެ. އެގޮތުން ޗެކިން އަދި ބޯޑިންގައި އިސްކަން ލިބުމާއިއެކު މާލެ، ދަރަވަންދޫ އަދި އިފުރު އެއާޕޯޓުން ލައުންޖްގެ ހިދުމަތް ލިބިގެންދާނެއެވެ. އަދި މަންޒިލަށް ދެވުމުން އެންމެ ފުރަތަމަ ލިބޭ ދަބަސްތަކުގެ ތެރޭގައި މި ފަސިންޖަރުންގެ ދަބަސް ހިމެނިގެންދާނެކަމަށްވެސް އެއެއަރލައިނުން މައުލޫމާތުދެއެވެ.
މި ކްލާހުގެ ޓިކެޓުތައް މިހާރު މޯލްޑިވިއަނުން ވަނީ ވިއްކަން ފަށާފައެވެ. އެހެންކަމުން އެ އެއަރލައިންގެ ވެބްސައިޓާއި، މޯބައިލް އެޕްގެ އިތުރުން ބުކިންގ ޗެނަލްތައް މެދުވެރިކޮށް ފަސޭހައިން ޓިކެޓް ގަނެވޭނެކަމަށް މޯލްޑިވިއަނުން ހާމަކޮށްފައިވެއެވެ.