ޚަބަރު
މާލީ ދަތިކަމަކާ ހެދި ތެލަސީމިއާ ސެންޓަރުގެ އެއްވެސް ކަމެއް ނުހުއްޓޭނެކަމުގެ ޔާޤީންކަން ދެއްވައިފި

ރައީސުލްޖުމްހޫރިއްޔާ ތެލެސީމިއާ ސެންޓަރަށް ވަޑައިގެންނެވުން --
މާލީ އެއްވެސް ދަތިކަމަކާ ގުޅިގެން ތެލަސީމިއާ ސެންޓަރުގެ އެއްވެސް ޚިދުމަތަކަށް ކުރިޔަށް އޮތް ދުވަސްތަކުގައި ބުރޫއެއް ނާރާނެކަމުގެ ޔާޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ.
ރައީސުލްޖުމްހޫރިއްޔާ މިހެން ވިދާޅުވީ، ތެލެސީމިއާ ސެންޓަރުގެ ޚިދުމަތްތަކުގެ ފެންވަރު ދަށްކަމަށް ބުނެ އެ ތަނަށް ރޭ ބަޔަކު އެއްވެފައިވުމާ ގުޅިގެން، މިއަދު ތެލެސީމިއާ ސެންޓަރުގެ ހާލަތު ބައްލަވާ ލެއްވުމަށް އެ މަނިކުފާނު އެ ތަނަށް ވަޑައިގެންނެވުމަށްފަހު ދެއްވި ބަސްދީގަތުމެއްގައެވެ.
ރައީސުލްޖުމްހޫރިއްޔާ ވިދާޅުވީ، ތެލެސީމިއާ ސެންޓަރުގައި ހުރި ދަތިތައް ޙައްލު ކުރުމުގައި ފައިސާގެ ގޮތުން ދަތިނުވެ ކުރިޔަށް ގެންދެވޭނެ ގޮތުގެ އިރުޝާދު ދެއްވާފައިވާނެކަމަށާއި، އަދި އެކަންކަން ކޮށް ނިންމާނެ ވަކި މުއްދަތެއް ވެސް ހަމަޖައްސަވާފައިވާނެކަމަށެވެ.
ފައިސާގެ ގޮތުން ދަތިތަކެއް ދިމާވެގެން ކަމެއް ހައްލުނުވެ ނޯންނާނެކަން އަޅުގަނޑު ސީދާ ޔަޤީންކުރާނަން. ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.
ރައީސުލްޖުމްހޫރިއްޔާގެ މި ބައްދަލުކުރެއްވުމުގައި ތެލެސީމިއާ ސެންޓަރުގެ އިސްވެރިންނާ ބައްދަލުކުރައްވައި، އެ ތަނުގައި ހުރި މައްސަލަތައް ވަނީ ވަރަށް ރަނގަޅަށް އޮޅުންފިލުވާފައެވެ.
އެގޮތުން ތަން ހިންގުމުގައި ހުރި ބޮޑެތި މައްސަލަތަކަށް ބަލާލާއިރު، ތެލެސީމިއާ ސެންޓަރުގައި 2017 ވަނަ އަހަރުން ފެށިގެން ޑިރެކްޓަރ ޖެނެރަލެއް ނުހުންނަވާ ކަމަށާއި، ޚިދުމަތް ދިނުމަށް އެކަށޭނަ މިންވަރަށް ނަރުހުންނާއި، ޓެކްނިކަލް ބޭފުޅުން ނެތްކަމަށް ރައީސުލްޖުމްހުރިއްޔާ ވިދާޅުވިއެވެ. މީގެ އިތުރުން ތެލެސީމިއާ ސެންޓަރަށް ބޭނުންވާ އެކިކަހަލަ އާލާތްތައް ހޯދުމަށް ހުރި ދަތިތަކާ ގުޅިގެން މަޝްވަރާ ކުރެވުނުކަމަށް ވެސް ވިދާޅުވިއެވެ.
އެހެންކަމުން، މިކަންކަން ވަގުތުން ޙައްލު ކުރެވޭނެ ގޮތްތަކުގެ އިރުޝާދު ދެއްވާފައިވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ނެޝަނަލް ތެލަސީމިއާ ސެންޓަރަށާއި، ނެޝަނަލް ތެލަސީމިއާ ސެންޓަރު ބަދަލުކުރުމަށް މިހާރު ތައްޔާރުކުރެވެމުންދާ އިމާރާތް (އޮރެންޖް ހިޔާ)އަށް ރައީސުލްޖުމްހޫރިއްޔާ @MMuizzu ޒިޔާރަތްކުރެއްވުމަށްފަހު ދެއްވި އިންޓަރވިއު pic.twitter.com/6NYqycXx4C
— The President's Office (@presidencymv) March 23, 2025
ރައީސް ވިދާޅުވީ، ތެލެސީމިއާ ސެންޓަރުގެ މައްސަލަ މިހާ ގޯސްވެފައިވާކަން ކުރިން އެނގި ނުލައްވާ ކަމަށެވެ. ނަމަވެސް ސަރުކާރުގެ އެކި ފަރާތްތަކާ މި މައްސަލައިގައި ބައްދަލުކޮށްފައިވާކަން މިއަދު އެނގުނު ކަމަށާއި، އަދި އެކަމަށް މިހާތަނަށް ޙައްލެއް ލިބިފައިނުވާކަން ފާހަގަކުރެއްވިއެވެ.
އެހެންކަމުން ކުރިޔަށް އޮތް ދުވަސްތަކުގައި ތެލަސީމިއާ ކުދިންނަށް ދިމާވާ ހުރިހާ ދަތިތަކެއް ޙައްލު ކުރުމުގައި، ސީދާ އެ މަނިކުފާނުގެ ބެއްލެވުމުގެ ދަށުން ކުރިޔަށް ގެންދާނެކަމަށް ވަނީ ވިދާޅުވެފައެވެ.