ރަމަޟާން މަހާއި ޢީދުގެ އުފާވެރިކަން ސަރުކާރުން ރައްޔިތުންނަށް ފުރިހަމައަށް ހޯއްދަވައިދެއްވައިފި

ރަމަޟާން މަހަށް އުފަލާއެކު މަރުޙަބާ ކިޔައި، ޢީދުގެ އުފާވެރިކަން ފޯރިއާއެކު ފާހަގަކުރުމުގެ ނަސީބު މިއަހަރުވެސް ދިވެހި ރައްޔިތުންނަށް ލިބިގެންދިޔައެވެ. ރޯދައިގެ ބަރަކާތްތެރިކަމާއި ޢީދުގެ އުފާވެރިކަން ރައްޔިތުންނާ ހަމައަށް ގެނެސްދިނުމަށް ސަރުކާރުން ކުރެއްވި މަސައްކަތްތަކަކީ ހަމަ ޙަޤީޤަތުގައިވެސް ފާހަގަކޮށްލެވޭ ކަންތައްތަކެކެވެ.

ކޮންްމެ ގޭބިސީއަކަށް 48 ދަޅުގެ މަސްދަޅު ކޭހެއް

ރަމަޟާން މަހުގެ ކުރިން ކޮންމެ ގޭބިސީއަކަށް 48 ދަޅުގެ މަސްކޭހެއް ހަދިޔާކުރުމަކީ ރައްޔިތުންގެ ހިތްތަކަށް ފިނިކަމާއި އުފާވެރިކަން ގެނެސްދިން ކަމެކެވެ. މި ދަރުމަވެރި ޢަމަލުން ، ގޭބިސީތަކަށް ބޮޑު ލުޔެއް ލިބިގެންދިޔައެވެ. މިއީ ރައްޔިތުންނަށް ވަރަށް ބޮޑު އެހީތެރިކަމެއް ލިބިގެންދިޔަ ކަމެކެވެ. ޚާއްޞަކޮށް މިފަދަ އިޤްތިޞާދީ ގޮތުން ދަތި ދުވަސްވަރެއްގައި މި ހަދިޔާގެ އަގު ވަޒަންނުކުރެވޭހާ ބޮޑެވެ. މި ހަދިޔާ ބެހުމުގައި ސަރުކާރުން އެންމެ ފުރަތަމަ އިސްކަންދެއްވީ ރަށްރަށުގައި ދިރިއުޅޭ ރައްޔިތުންނަށެވެ. މިއީ ރަށްރަށުގެ ރައްޔިތުންނަށް ދެއްވި ޚާއްޞަ ސަމާލުކަމެކެވެ.

މި ހަދިޔާގެ އަގު ވަޒަންކުރުމަށްޓަކައި، މިހާރުގެ ބާޒާރުގެ އަގުތަކަށް ބަލާލުން މުހިންމެވެ. މިވަގުތު އެންމެ އާދައިގެ ތެޔޮ މަސްދަޅު ކޭހެއް ލިބެން ހުރީ 560 ރުފިޔާއަށެވެ. މިއީ މަސްދަޅެއް 16 ރުފިޔާގެ ރޭޓުންނެވެ. މި ހިސާބަށް ބަލާއިރު، 82،000 ގޭބިސީއަށް މަސްދަޅު ކޭސް ދޫކުރުމަށް ގާތްގަނޑަކަށް 46 މިލިއަން ރުފިޔާ ޚަރަދުވެގެންދާނެއެވެ. 

މި ހަދިޔާއާ ގުޅޭގޮތުން ރައްޔިތުންގެ ޝުޢޫރުތައް ހުރި ގޮތް ދެނެގަތުމަށްޓަކައި، އަޅުގަނޑުމެން ބައެއް ފަރާތްތަކާ ވާހަކަދެއްކީމެވެ. އޭގެ ތެރެއިން 46 އަހަރުގެ އެކަނިވެރި މައެއް ކަމުގައިވާ ފާރިޝާ ސަޢީދު ވިދާޅުވީ،

މިހާ ދަތިކޮށް އުޅޭއިރު މަސްދަޅުކޭހަކީ ހަމަ ވަރަށް ރަނގަޅު ހަދިޔާއެއް، ސަރުކާރުން މިކަން މިގޮތަށް ކުރުމުން ވަރަށް އުފާވޭ، އެންމެ ގިނައިން ރޯދަމަހު ބޭނުންކުރާ އެއްޗަކީ މިއީ

 

މިއީ ގިނަ ރައްޔިތުންގެ ހިތުގައި އުފެދުނު ޝުޢޫރުކަން ޔަޤީނެވެ.

ބާޒާރުގެ ތަކެތީގެ އަގު އުފުލުނަނުދީ ހިފެހެއްޓުން

ރަމަޟާން މަހު ބާޒާރުގައި ތަކެތީގެ އަގު އުފުލަނުދީ ހިފެހެއްޓުމަށް ސަރުކާރުން ގިނަ މަސައްކަތްތަކެއް ކުރިއެވެ. އެސްޓީއޯއިން ފިޔާ، ލުނބޯ، ބިސް އަދި އަލުވީގެ އަގުތައް ވަރަށް ބޮޑަށް ދަށްކޮށް، ރައްޔިތުންނަށް އަތްފޯރާ އަގުގައި މި ތަކެތި މެދުނުކެންޑި ލިބޭނެ މަގު ތަނަވަސްކޮށްދިނެވެ. މިސާލަކަށް، ބާޒާރުގައި 360-400 ރުފިޔާއަށް ވިއްކަމުންދިޔަ ފިޔާ ކޭހެއް އެސްޓީއޯއިން ވިއްކީ 310 ރުފިޔާއަށެވެ. މިފަދަ ފިޔަވަޅުތަކުން ރައްޔިތުންނަށް ރޯދަމަހު ބޭނުންވާ ކާބޯތަކެތި ހޯދުމަށް ވަރަށް ބޮޑު ލުޔެއް ލިބިގެންދިޔައެވެ.

 
މި ތަކެތި އިމްޕޯޓްކުރުމުގެ މައިގަނޑު ބޭނުމަކީ ރޯދަމަހު މި ތަކެތީގެ އަގު އެކަށީގެންވާ މިންވަރެއްގައި ހިފެހެއްޓުމާއި ރަމަޟާން މަހު ކާބޯތަކެއްޗަށް ޑިމާންޑް އިތުރުވާތީ މި ފަދަ އަސާސީ ތަކެތި އަގު ހެޔޮކޮށް ފޯރުކޮށްދިނުން

އެސްޓީއޯ

މީގެ އިތުރުން އިކޮނޮމިކް މިނިސްޓްރީން ވަނީ އަސާސީ ބާވަތްތަކަކީ ކޮބައިކަން ދެނެގަނެ، އެ ތަކެތީގެ ލިސްޓެއް އެކުލަވާލާ،  141 ބާވަތެއް ހިމެނޭ އެ ލިސްޓުގައި 32 އައިޓަމްއަކީ ކްރިޓިކަލް އައިޓަމްގެ ގޮތުގައި ކަނޑައަޅާފައެވެ.
އޭގެ ތެރޭގައި އާއްމުކޮށް ގޭބިސީގައި ކޮންމެހެން ބޭނުންކުރާ ތަކެތި ހިމަނާފައިވިއެވެ. އެގޮތުން ލިސްޓްގައި ހިމެނެނީ ގޭބިސީތަކުގައި ކެއުމަށާއި، ކާތަކެތި ތައްޔާރުކުރުމަށް ބޭނުންކުރާ 93 އައިޓަމަކާއި، މޭވާ އަދި ތަރުކާރީގެ ބާވަތްތަކުގެ 38 އައިތަމް ގެ އިތުރުން ކަނޑުމަހުގެ 10 ވައްތަރރެކެވެ.

ރައީސް ޑރ. މުޢިއްޒު ވިދާޅުވީ، ކަބޯތަކެތީގެ އަގުތައް ރައްޔިތުންނަށް ހެޔޮ އަގެއްގައި ލިބޭނެ އިންތިޒާމުތައް ހަމަޖެއްސުމަށްޓަކައި ދުރު ރާސްތާ ޕްލޭންތަކެއްވެސް ސަރުކާރުގައި އެބަހުރި ކަމަށެވެ.

ކުރިއަށް އޮތް މުސްތަޤްބަލުގައި މެދު ރާސްތާ އަދި ދުރު ރާސްތާގެ ޕްލޭންއަކީ ރާއްޖޭގައި އުފެއްދޭ ހުރިހާ ބާވަތެއް ރާއްޖޭގައި އުފެއްދޭގޮތް ގާއިމްކޮށް، ފުޑު ސެކިއުރިޓީ ޔަޤީންކުރުން، އޭރު އަގުވެސް ދަށްވެގެންދާނެ، އަދި ކޮއަންޓިޓީވެސް ޔަޤީންވެގެންދާނެ
  

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައްޔިތުންނަށް އަތްފޯރާ އަގުގައި މި ތަކެތި ލިބޭނެ މަގު ތަނަވަސްކޮށްދިނުމަކީ ރޯދަމަހުގެ ޚަރަދުތަކަށް ލުޔެއް ހޯދައިދިން ޙިކުމަތްތެރި ފިޔަވަޅެކެވެ.

ފަހު 10 އެއް ބަންދު ދުވަސްތަކެއް ގޮތުގައި ނިންމެވުން

ރަމަޟާން މަހުގެ ފަހު ދިހައެއް ސަރުކާރު ބަންދުކުރުމުން ރައްޔިތުންނަށް އަޅުކަންތަކުގައި މަޝްޣޫލުވެ އުޅުމަށް ފުރިހަމަ ފުރުޞަތު ލިބުނެވެ. މި ނިންމުމަކީ ދީނީ ކަންކަމަށް ސަރުކާރުން ދެއްވާ އަހައްމިއްޔަތުކަމުގެ ހެއްކެކެވެ. ރަމަޟާން މަހުގެ ފަހު ދިހައިގެ ސަވާބާއި ބަރަކާތް ހޯދުމަށް ރައްޔިތުންނަށް މަގުފަހިވެގެންދިޔައެވެ.

ވަރަށް އުފާވޭ ރައީސް މިގޮތަށް ނިންމެވުމުން ، ތިން ހަތަރު ކުދިން ބަލާ ސްކޫލް ދޮށަށް ގޮސް ، އޮފީއަށް ދިއުމާ މިފަދަ ކަންކަމަށް ވަގުތު ހުސްކުރާއިރު އަޅުކަމަށް ދެވޭ ވަގުތު ވަރަށް ކުޑަ، މިއީ ވަރަށް ފުރިހަމަ ނިންމެވުމެއް

އަލީ އަސްޤަރް ، 37 އަހަރު

ފިތުރު ޒަކާތް ހަމަހަމައަށް ބަހަން ފެށުން

ފިޠުރު ޒަކާތުގެ ގޮތުގައި މިހާތަނަށް ލިބުނު އެންމެ ގިނަ އަދަދެއްގެ ފައިސާ އެއްކުރެވި، ޙައްޤުވެރިންނަށް ހަމަހަމަކަމާއެކު ބެހިގެންދިޔަކަމީ އިސްލާމީ އަޚުއްވަތްތެރިކަމުގެ ރީތި ނަމޫނާއެކެވެ. މި އަހަރުގެ ފިތުރު ޒަކާތުގެ ގޮތުގައި 13.3 މިލިއަން ރުފިޔާ ލިބުނުކަމީ ދިވެހިންގެ ހިތްތަކުގައި އޮތް ހެޔޮކަމާއި ދީންވެރިކަމުގެ ހެއްކެކެވެ. މީގެ ކުރިން ޒަކާތް ބަހަނީ، އެ ރަށަކަށް ޒަކާތުގެ ގޮތުގައި ލިބޭ ހުރިހާ ފައިސާއެއް، ރަށުގައި ތިބި ފަގީރުންގެ މެދުގަ އެވެ.

އެކަމަކު މިއަހަރު ވުޒާރާއިން ނިންމީ ހުރިހާ ފަގީރުންނަށް ވެސް އެއް ވަރަކަށް ފައިސާ ލިބޭ ގޮތަށެވެ. ވަޒީރު ގޮތުގައި މީގެ މައިގަނޑު ބޭނުމަކީ ޒަކާތުގެ މަގްސަދުގެ ތެރޭގައި ހިމެނޭ އިޖްތިމާއީ އަދާލަތު ގާއިމުކުރުމެވެ.ކޮންމެ ފަގީރަކަށް 4,500 ރުފިޔާ ލިބުނުއިރު، 500,000 ރުފިޔާ ފަލަސްޠީނުގެ ޣައްޒާގެ ކުޑަކުދިންގެ ކާބޯތަކެއްޗަށް ހަދިޔާކުރެވުނުކަމީ އުފާވެރި ޚަބަރެކެވެ.

އީދުއަލިން ރާއްޖެ ދިއްލާލުން

ސަރުކާރުން ޢީދު އަލިން ރާއްޖެ ދިއްލާލުމުގެ ބޭނުމަކީ ޢީދު ވަންތަކަމުގެ އިހުސާސް ކުރެވި ރައްޔިތުންނަށް އެކަމުން އުފާލިބުމެވެ. މާލެ އާއި ރާއްޖޭގެ އެކި ކަންކޮޅުތަކުގައި އުޅޭ ރައްޔިތުންނަށް މިއުފަލުގައި ބައިވެރިވުމުގެ ފުރުސަތުލިބުނެވެ.ޢީދު ފާހަގަކުރުމަށް ގިނަ ރަށްތަކެއް ޢީދު އަލިން ދިއްލާލައި، ރައްޔިތުންނަށް ޢީދުގެ އުފަލުގައި ބައިވެރިވުމުގެ އިޙްސާސްތައް ގެނެސްދެވުނެވެ. "ޢީދު އަލި" ހަރަކާތުގެ ދަށުން 36 ރަށެއް ދިއްލުމަށް މަސައްކަތް ކުރެވުނުކަމީ ޢީދުގެ އުފާވެރިކަން ރާއްޖޭގެ ކަންކޮޅުތަކަށް ފަތުރުވާލުމަށް ކުރެވުނު މަތިވެރި މަސައްކަތެކެވެ.
 
"ޢީދު ހަވީރު" ގެ ނަމުގައި ޚާއްޞަ ކުޅިވަރުތަކެއް

މާލެ އާއި ހުޅުމާލޭގައި "ޢީދު ހަވީރު" ގެ ނަމުގައި ޚާއްޞަ ކުޅިވަރުތަކެއް ރޭވި، ކުދި ބޮޑު އެންމެންނަށް ޢީދުގެ އުފަލުގައި ފުރިހަމައަށް ބައިވެރިވެވުނެވެ. ސަރުކާރުގެ މުއައްސަސާތަކާއި ސަރުކާރު ހިއްސާވާ ކުންފުނިތަކުން މާލޭގައި ބޭއްވި "ޢީދު ހަވީރަށް" ވަނީ ވަރަށް ބޮޑު ތަރުހީބެއް ލިބިފައެވެ. މި ހަވީރުގައި އެތައް ސަތޭކަ ކުދިންނެއް ބައިވެރިވެފައިވާއިރު މި ހަރަކާތް ވެގެންގޮސްފައިވަނީ އެކުދިންގެ މޫނު މައްޗަށް ހިނިތުންވުން ގެނުވި އަދި ހިތްތަކަށް އުފާވެރިކަން ގެނުވި ބޮޑު ޢާއިލީ ހަރަކާތަކަށެވެ.
މި ހަރަކާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުންނާއި، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފްގެ ދެކަނބަލުންގެ އިތުރުން ދައުލަތުގެ ބައެއް ވަޒީރުންވެސް ވަނީ ބައިވެރިވެވަޑައިގެންފައެވެ.
ހުޅުމާލޭގައި ބޭއްވުނު ޑްރޯން ޝޯއާއި ހަވާއެރުވުމުގެ ކުލަގަދަ ހަރަކާތްތަކުން ކުޑަކުދިންނާއި ބޮޑެތި މީހުންގެ މޫނުމަތީގައި ހިނިތުންވުން ކުރެހިގެންދިޔައެވެ.

މި ހުރިހާ ފިޔަވަޅުތަކަކީވެސް ރައްޔިތުންގެ ދިރިއުޅުމަށް ލުއިފަސޭހަކަން ގެނެސްދިނުމަށާއި، ރަމަޟާން މަހާއި ޢީދުގެ އުފާވެރިކަން ފުރިހަމަ ގޮތުގައި އިހުސާސްކުރުމަށް މަގުފަހިކޮށްދިން އަގުހުރި މަސައްކަތްތަކެކެވެ. މި ފިޔަވަޅުތަކުގެ ސަބަބުން ރައްޔިތުންގެ މެދުގައި ސަރުކާރާ މެދު އޮތް އިތުބާރު އާލާވެ، ސަރުކާރުގެ މަސައްކަތްތަކަށް ރައްޔިތުންގެ ހިތްވަރާއި ތަރުހީބު ލިބިގެންދިޔައެވެ.

މި އަހަރުގެ ރަމަޟާން މަހާއި ޢީދަކީ ސަރުކާރުގެ ޙިކުމަތްތެރި ސިޔާސަތުތަކާއި ވިސްނުންތެރި ފިޔަވަޅުތަކުގެ ސަބަބުން ރައްޔިތުންނަށް އުފާވެރިކަމާއި ހިތްހަމަޖެހުން ގެނެސްދިން ދުވަސްވަރެކެވެ. ކުރިއަށް އޮތް ތަނުގައިވެސް މިފަދަ ރައްޔިތުން އެދޭ ގޮތަށް ޚިދުމަތްތައް ފޯރުކޮށްދިނުމަށް ސަރުކާރުން މަސައްކަތްކުރާނެ ކަމަށް ރައްޔިތުން އުންމީދުކުރެއެވެ. މި ހުރިހާ ކަމަކުން ދައްކުވައިދެނީ ރައްޔިތުންގެ ލާބައާއި މަންފާއަށް މަސައްކަތްކުރާ، ރައްޔިތުންގެ އުފަލާއި ހިތްހަމަޖެހުމަށް އިސްކަންދޭ ސަރުކާރެއްގެ އަގުހުރި މަސައްކަތްތަކެވެ.ފަހުގެ ތާރީޚެއްގައި މިހާ ކުލަގަދަކޮށް ކުޑަކުދިންނާއެކު މިފަދަ ޢާއިލީ ހަވީރެއް ބޭއްވި މީ ފުރަތަފަހަރެވެ.މުސްލިމުންނަށް އަންނަ ދެ ޢީދު ކަމުގައިވާ އަޟްޙާ ޢީދާއި ފިޠުރު ޢީދު ކުލަގަދަކޮށް ފާހަގަކުރެއްވުމަށް ރައީސުލްޖުމްހޫރިއްޔާ ނިންމެވުމުން އާންމުގެ ވަރަށް ބޮޑު ތަރުހީބެއް ދަނީ ލިބެމުންނެވެ.

ވަރަށް ސާފުކޮށް އިސްލާމް ދީނުގަ އޮންނަކަމެއް އަޅުގަނޑުމެނަށް އޮތީ މުނާސަބަތެއްގެ ގޮތުގައި އުފާފާޅުކުރަން ދެ ޢީދުކަން ، އެހެންވީމަ ދެއީދު 100 ޕަރސަންޓް އިސްލާމީ ޤައުމެއްގައި ، ސަރުކާރުން އިސްނަގައިން ރައްޔިތުންނަށް އެންމެ ފުރިހަމަ ފުރުސަތު ދޭންޖެހޭނެ ކަމަށް އަޅުގަނޑު ދެކެނީ އުފާ ފާޅުކުރަން ، އެހެންވީމަ އީދުގަ ދިއްލުންތައް ދިއްލާ  އެއުފާވެރިކަން ކުޑަކުދިންނަށް ހާއްސަކޮށް އިސްލާމް ދީނަށް ލޯބި ކުރުމަށްޓަކައި ދިނުމަށް އަޅުގަނޑު ނިންމިކަމެއް ، އަޅުގަނޑު ކުރީގަ މޭޔަރަކަށް ހުރި އިރު މާލޭގަ ފެށީ ، އަޅުގަނޑު ވައުދުވިން މުޅި ރާއްޖެއަށް ފުޅާ ކުރާނަމޭ، އެގޮތުން ފުރަތަމަ އަހަރު ވެރިކަން ކުރާ ރަށްތަކުގަ ، މިއަހަރު އިތުރު ރަށްތަކުގަ އެކަން ކުރެވިގެން އެދަނީ ، އެ މަޤްސަދަކީވެސް ދީނަށް ލޯބި ޖެއްސުން ، ދީޏުގެ މިކަހަލަ މުހިންމު މުނާސަބަތުތަކަށް ހާއްސަކޮށް ކުޑަކުދިން ޖުމްލަކޮށް އެންމެންގެ  ހިތުގަ ލޯބިޖައްސާ އިސްލާމް ދީނުގަ އޮންނަ ގޮތަށް އެކަންކަމުގަ އުޅުމުގެ ފުރުސަތު ފާޙަގަކުރަން ފުރުސަތު ދިނުމައްޓަކާ

ރައީސުލް ޖުމްހޫރިއްޔާ ޑޮކްޓަރ މުޙައްމަދު މުޢިއްޒު

ރަމަޟާން މަހާއި ޢީދުގެ ބަރަކާތްތެރިކަން ރައްޔިތުންނާ ހަމައަށް ގެނެސްދިނުމަށް ސަރުކާރުން ކުރެއްވި މަސައްކަތްތަކަކީ ހަމަ ޙަޤީޤަތުގައިވެސް ފަޚުރުވެރިވާންޖެހޭ ކަންތައްތަކެކެވެ. މި މަސައްކަތްތަކުގެ ސަބަބުން ރައްޔިތުންގެ ހިތްތަކުގައި އުފާވެރިކަމާއި ހިތްހަމަޖެހުން އާލާވެ، އިސްލާމީ އަޚުއްވަތްތެރިކަމުގެ ރޫޙު އާލާވެގެންދިޔައެވެ. މިފަދަ މަތިވެރި މަސައްކަތްތައް ކުރިމަގުގައިވެސް ފެނިގެންދާނެކަމުގެ އުންމީދު ރައްޔިތުންގެ ހިތްތަކުގައި އާލާވެފައިވެއެވެ. ﷲ ސުބުޙާނަހޫ ވަތަޢާލާ އަޅުގަނޑުމެންގެ ޤައުމަށާއި ލޮބުވެތި ރައްޔިތުންނަށް އަބަދުވެސް ކާމިޔާބާއި ފާގަތިކަން މިންވަރު ކުރައްވާށިއެވެ. އާމީން.