އިމިގްރޭޝަނުގެ ރަސްމީ މަސައްކަތު ގަޑިއަށް ބަދަލުގެނަސްފި

މޯލްޑިވްސް އިމިގްރޭޝަނުގެ ރަސްމީ މަސައްކަތު ގަޑިއަށް ބަދަލުގެނަސްފިއެވެ. 

އިމިގްރޭޝަނުން ސޯޝަލް މީޑިއާގައި ޙިއްސާކުރި ޕޯސްޓެއްގައި ބުނީ، މިއަދުން ފެށިގެން އެ އިދާރާގެ ރަސްމީ ގަޑިއަކީ ހެނދުނު 8 އިން މެންދުރުފަހު 2 އަށް ކަމަށެވެ. އަދި މިއީ ސިވިލް ސާރވިސްގެ ރަސްމީ މަސައްކަތު ގަޑިއާ އެއްގޮތަށް ބަދަލުކުރުމަށް ގެނަސްފައިވާ ބަދަލެއްކަމަށް ވަނީ ފާހަގަކޮށްފައެވެ.

ރަސްމީ ގަޑިއަށް ބަދަލު އައި ނަމަވެސް، ޚިދުމަތް ދިނުމަށް ހަމަޖެހިފައިވާ ގަޑިތަކަށް ބަދަލެއް ނާންނަކަމަށް އިމިގްރޭޝަނުން ހާމަކޮށްފައި ވެއެވެ. 

ސަމާލުކަމަށް!
މި އިދާރާގެ ރަސްމީ މަސައްކަތު ގަޑި ސިވިލް ސަރވިސްގެ ރަސްމީ މަސައްކަތު ގަޑި ކަމުގައިވާ ހެނދުނު 8:00 އިން މެންދުރުފަހު 2:00 އަށް މާދަމާ (08 އެޕްރީލް 2025) އިން ފެށިގެން ވަނީ ބަދަލުކުރެވިފައެވެ.

ނަމަވެސް، މި އިދާރާއިން ދެމުންގެންދާ އެންމެހައި ޚިދުމަތްތައް މިހާރުވެސް… pic.twitter.com/Uj7TFtDsJe

— Maldives Immigration (@ImmigrationMV) April 7, 2025

ދިވެހިރާއްޖޭގެ ތަންފީޒީ އިދާރާތަކުގެ ތެރެއިން، ސިވިލް ސާރވިސްގެ ބެލެނިވެރިކަމުގެ ދަށުން ހިންގަމުން އަންނަ ހަމައެކަނި ތަނަކީ އިމިގްރޭޝަނެވެ. ނަމަވެސް 2023 ވަނަ އަހަރުގެ ފަހުކޮޅުން ފެށިގެން އެ އިދާރާގެ ރަސްމީ ގަޑިއަކީ ހެނދުނު 8 އިން މެންދުރުފަހު 4 އަށެވެ. އަދި އޭގެ ކުރިން ކަނޑައަޅާފައި އޮތީ ހެނދުނު 8 އިން މެންދުރުފަހު 3 އަށެވެ.

އިމިގްރޭޝަނުން އާންމުކޮށް ދެމުން އަންނަ ހުރިހާ ޚިދުމަތެއްހެން މިހާރު ފޯރުކޮށްދެނީ އޮންލައިންކޮށެވެ. އެގޮތުން ދިވެހި ޕާސްޕޯޓަށް އެދި ހުށަހެޅުމާއި ބިދޭސީ މަސައްކަތްތެރިންނާ ގުޅުންހުރި ޚިދުމަތްތައް ހިމެނެއެވެ.