އޭސީ އައުޓްޑޯރ ޔުނިޓެއްގައި ރޯވެ މާލޭގައި އަލިފާނުގެ ހާދިސާއެއް ހިނގައިފި

އޭސީ އައުޓްޑޯރ ޔުނިޓެއްގައި ރޯވެ، މާލޭގެ ގެއެއްގައި އަލިފާނުގެ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފްއިން ހާމަކޮށްފައިވާ ގޮތުގައި މި ހާދިސާ ހިނގާފައި ވަނީ ހެންވޭރު ސޯސަންމަންޒިލް ގޭގެ ފަސް ވަނަ ފަންގިފިލާގައެވެ. އަދި ހާދިސާގައި އަލިފާން ރޯވި އޭސީ އައުޓްޑޯރ ޔުނިޓު ބަހައްޓާފައި ހުރީ، އެ ގޭގައި ކުޑަ ބެލްކަނީއެއް ގޮތަށް ހަދާފައި ހުރި ތަނެއްގައެވެ. 

މި ހާދިސާގެ ރިޕޯޓު، އެމްއެންޑީއެފްގެ ފަޔާރ އެންޑް ރެސްކިއު ސާރވިސަސްއަށް ލިބިފައިވަނީ ފަތިހު 4:31 ހާއިރުކަމަށް އެ އިދާރާއިން ހާމަކޮށްފައިވެއެވެ. އަދި 14 މިނެޓުގެ ތެރޭގައި ރޯވެފައިވާ އަލިފާންގަނޑު ނިއްވާލެވުނުކަމަށް ފަޔާރ އެންޑް ރެސްކިއު ސާރވިސަސްއިން ވަނީ ހާމަކޮށްފައެވެ. 

ހެންވެއިރު ސޯސަން މަންޒިލްގޭގެ 5 ވަނަ ފަންގިފިލާގައި ހަރުކޮށްފައި ހުރި އޭސީ އައުޓްޑޯރއެއްގައި ރޯވި އަލިފާން، އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން ހަރަކާތްތެރިވެ ނިއްވާލައިފި.https://t.co/M9LXIB7982 pic.twitter.com/mOFPzLQChN

— Maldives National Defence Force (@MNDF_Official) April 8, 2025

އަދި މި ހާދިސާގައި އެއްވެސް މީހަކަށް އަނިޔާއެއް ވެފައި ނުވާކަމަށް ވެސް އެމްއެންޑީއެފްއިން ހާމަކޮށްފައިވެއެވެ.