ޓޫރިޒަމް ދާއިރާގެ ފަރާތްތަކުން އެމްއެމްއޭގެ ޕޯޓަލްގައި ރަޖިސްޓްރީކުރަން ހުޅުވާލައިފި

ބޭރު ފައިސާގެ ގަވައިދާ ގުޅިގެން ޓޫރިޒަމް ދާއިރާގެ ފަރާތްތަކުން އެމްއެމްއޭގެ ޕޯޓަލްގައި ރަޖިސްޓްރީކުރަން ހުޅުވާލައިފި އެވެ.

"މަނީ ޗޭންޖިންގެ އާ ވިޔަފާރިއާ ބެހޭ ގަވައިދު" ގައި ބުނެފައިވާ ގޮތުގައި ރާއްޖޭގައި ހިންގާ ބޭންކުތައް ފިޔަވައި އެއްވެސް ފަރާތަކުން ރާއްޖޭގައި ބޭރު ފައިސާ ގަތުމާއި ވިއްކުމުގެ ވިޔަފާރިކުރަން ވާނީ އެމްއެމްއޭގެ ޤާނޫނުގެ ދަށުން އެ ވިޔަފާރިކުރުމަށް ދޫކުރާ ޓިއާ 1 މަނީ ޗޭންޖިން ވިޔަފާރިކުރުމުގެ ލައިސަންސް ލިިބިގެން ކަމަށެވެ.

އެމްއެމްއޭ އިން އާންމުކުރި ފައިސާއާ ބެހޭ ޤަވާއިދުގައިވާ ގޮތުން، ޓޫރިޒަމަށް ވަންނަ ހުރިހާ އާމްދަނީއެއް ރާއްޖޭގެ ބޭންކަކަށް ޖަމާކުރަން ޖެހޭނެ އެވެ. ނަމަވެސް، އެ ފައިސާ ބަހައްޓަން އެއްވެސް މުއްދަތެއް ދީފައެއް ނުވެ އެވެ. އާ ޤަވައިދުގައި ޓޫރިޒަމްގެ ބޭނުންތަކަށް ޑޮލަރުގެ މުޢާމަލާތް ކުރުމުގެ ފުރިހަމަ ބާރު ވެސް ދީފައިވެ އެވެ.

އެ ޤަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި ޢަދަދެއް ބޭންކުތައް މެދުވެރިކޮށް މާރުކުރަން ޖެހޭނެ އެވެ. ރިސޯޓުތަކާއި ހޮޓާތަކާއި ޓޫރިސްޓުން އުޅަނދުތަކަށް ކޮންމެ މަހަކު އަންނަ ޓޫރިސްޓެއްގެ ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކުތަކުގައި މާރުކުރަން ޖެހޭނެ އެވެ. ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަށް 25 ޑޮލަރުގެ ރޭޓުން ކޮންމެ މަހަކު އަންނަ ޖުމްލަ ޓޫރިސްޓުންނަށް ޖެހޭ އަދަދު ވެސް ރާއްޖޭގެ ބޭންކަކަށް މާރުކުރަން ޖެހޭނެ އެވެ.

ސަރުކާރުން ގެނައި މި ބަދަލަކީ ރާއްޖޭގެ އިޤްތިިޞާދީ ޙާލަތު ރަނގަޅު ކުރުމުގެ ގޮތުން ގެނެސްފައިވާ ބަދަލުދަކެކެވެ.