ބްރޯޑްކާސްޓްކުރުމުގެ މައިގަނޑު އަމާޒަކަށް ވާންވީ، ދިވެހި ޤައުމުގެ ޙައްޤުގައި ވަކާލާތު ކުރުން- ރައީސް

ދިވެހިރާއްޖޭގެ ބްރޯޑްކާސްޓްކުރުމުގެ ދާއިރާގެ މައިގަނޑު އަމާޒަކަށް ވާންވީ، ދިވެހި ޤައުމުގެ ޙައްޤުގައި ވަކާލާތު ކުރުންކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ބްރޯޑްކާސްޓިންގ ދުވަހުގެ މުނާސަބަތުގައި، 'އެކްސް' ގައި ޝާއިޢުކުރެއްވި މެސެޖެއްގައި ރައީސް ވިދާޅުވީ ބްރޯޑްކާސްޓްކުރުމަކީ އަމާނާތެއް ކަމާއި، މަސްއޫލިއްޔަތެއް ކަމަށެވެ.

ދިވެހިރާއްޖޭގެ ބްރޯޑްކާސްޓިންގ ދުވަހަކީ، ޤައުމު ބިނާކުރުމާއި، ޑިމޮކްރެސީ ހަރުދަނާކުރުމާއި ރައްޔިތުންގެ ހޭލުންތެރިކަން އިތުރުކޮށް މަޢުލޫމާތު މުއްސަނދިކުރުމުގައި ބްރޯޑްކާސްޓަރުން އަދާކުރާ މުހިއްމު ދައުރުގެ އަގު ވަޒަންކުރުމާއި، މި ސިނާޢަތުގެ ތަރައްޤީއަށް މަގުފަހިކުރުމަށް ފާހަގަކުރާ ދުވަހެކެވެ.

މި ދުވަސް ފާހަގަކުރަނީ ކޮންމެ އަހަރެއްގެ އޮކްޓޯބަރ މަހުގެ 4 ވަނަ ދުވަހުއެވެ. މި އަހަރުގެ ބްރޯޑްކާސްޓް ދުވަހުގެ ޝިޢާރަކީ "މާދަމާގެ ތަޞައްވުރު: ބްރޯޑްކާސްޓިންގެ މުސްތަޤްބަލު ބައްޓަންކުރުން" އެވެ.