ދެ ޤައުމުގެ ގުޅުން ރަނގަޅުވެ އިންޑިއާގެ "އީޒް މައި ޓްރިޕް" އިން ރާއްޖެއަށް ބުކިންގ ހަދަން ފަށައިފި

ދެ ޤައުމުގެ ގުޅުން ރަނގަޅުވެ އިންޑިއާގެ "އީޒް މައި ޓްރިޕް" އިން ރާއްޖެއަށް ބުކިންގ ހަދަން ފަށައިފިއެވެ.

އިންޑިއާގެ ބޮޑު ޓްރެވަލް އޭޖެންޓެެއް ކަމަށްވާ "އީޒް މައި ޓްރިޕް"  އިން ގިނަ ދުވަސްތަކެއްގެ މެދުކެނޑުމަކަށް ފަހު ރާއްޖެއަށް އަލުން ފްލައިޓް ބުކިން ހަދަން ފަށައިފި އެވެ.  "އީޒް މައި ޓްރިޕް" އިން ނެރުނު މީޑިއާ ސްޓޭޓްމަންޓް އެއްގައި ވަނީ ދެ ގައުމުގެ ދޭތެރޭގައި އޮތް ގުޅުން ރަނގަޅުވުމާއެކު އަނެއްކާވެސް ރާއްޖެއަށް ބުކިން ހަދަން ފަށާފައިވާކަމަށެވެ.

އިންޑިއާ އާއި ރާއްޖެއާ ދެމެދު އޮތް ގުޅުން ހީނަރުވެފައި ވަނީ އިންޑިއާގެ ބޮޑުވަޒީރު ނަރެންދުރަ މޯދީ ލަކްޝަދީޕަށް ކުރެއްވި ޒިޔާރަތެއްގައި ޕޯސްޓްކުރި ވީޑިއޯ އަކަށް އިންޑިއާގެ ބަައެއް ރައްޔިތުން ސޯޝަލް މީޑިއާގައި  ރާއްޖެއާއި ދެކޮޅަށް އެންޓި ކެމްޕޭން ކުރަން ފެށުމުންނެވެ. އެގޮތުން ޗައިނާގެ ޕަޕެޓު ގައުމެއް ކަމަށް ބުނެ ކޮށްފައިވާ ޕޯސްޓްތަކަށް ރާއްޖޭގެ ބައެއް ސިޔާސީ އެކްޓިވިސްޓުން ވެސް ވަނީ ރައްދު ދީފަ އެވެ.

މައްސަލަ ގޯސްވެ އިންޑިއާގެ ބައެއް އާންމުންނާއި މަޝްހޫރު ފިލްމީ ތަރިން ވަނީ ރާއްޖެ އަށް ޗުއްޓީ ހޭދަކުރަން ނައުމަށް ގޮވާލާ ކެމްޕޭނެއް ފަށާފައެވެ. އެދުވަސްވަރު "އީޒް މައި ޓްރިޕް" ގެ ސީއީއޯ ނިޝާން ޕިއްޓީ ވަނީ، އެ ވެބްސައިޓުން ރާއްޖެއަށް ބުކިން ހެދުން ހުއްޓާލާފައިވާކަން އެކްސް'ގައި އިޢުލާންކޮށް، މިއީ އޭނާގެ ޤައުމަށްޓަކާ ނިންމި ނިންމުމެއް ކަމަށެް ބުނެފައެވެ.

އީޒް މައި ޓްރިޕް އިން ބުކިންގތައް ހުއްޓާލާފައިވަނީ މިދިޔަ ޖެނުއަރީ މަހުގެ 8 ވަނަ ދުވަހުއެވެ. ނުވަމަސް ދުވަހުގެ މެދުކެނޑުމަކަށްފަހު އަލުން ބުކިންގތައް ފެށުމަކީ ދެޤައުމަށްވެސް ފައިދާ ވެގެންދާނެ ކަމެކެވެ.