ރާއްޖެއަށް ކުރިމަތިވާ ދަތިކަމުގައި އެހީވާން އިންޑިއާއިން އޮންނަނީ އަބަދުވެސް ތައްޔާރަށް- ރައީސް

ރާއްޖެއަށް ކުރިމަތިވާ ދަތިކަމުގައި އެހީވާން އިންޑިއާ އޮންނަނީ އަބަދުވެސް ތައްޔާރަށް ކަމަށާއި، ކުރިމަތިވާ ގޮންޖެހުންތަކަށް ރަނގަޅު ބަދަލުތަކާއި ހައްލުތައް ހޯދިނުމަށް އެހީތެރިކަން ދެމުން ގެންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެެވެ.

ރައީސްގެ ދެކަނބަލުން އިންޑިއާއަށް ކުރެއްވި ދަތުރުފުޅު ފެއްޓެވުމުގެ ކުރިން އިނގިރޭސިވިލާތުގެ ދައުލަތުގެ މީޑިއާ، ބީބީސީއަށް ދެއްވި އިންޓަވިއުއެއްގައި ވިދާޅުވީ އިންޑިއާއަށް ރާއްޖޭގެ މާލީ ހާލަތު އޮތް ގޮތް ވަރަށް ރަނގަޅަށް އެނގޭ ކަމަށާއި، މާލީ ދަތިކަމުން އަރައިގަތުމަށް  އިންޑިއާގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އެބައޮތް ކަމުގައެވެ.

ރައީސް ވިދާޅުވީ އިޤްތިޞާދީ ދަތިކަމެއް މިހާރު ކުރިމަތިވެފައި އޮތް ނަމަވެސް ރާއްޖެ ބަނގުރޫޓުވާ ޙާލަތަކަށް ނުދާނެ ކަމަށެވެ. އަދި މި ހާލަތުން އަރައިގަތުމަށްޓަކައި އިންޑިއާގެ އެހީ ލިބޭނެކަމުގެ ޔަގީންކަން އޮތްކަން ފާހަގަކުރައްވައި ރައީސް ވިދާޅުވީ އައިއެމްއެފްގެ އެހީ ނަގަން ނުޖެހޭނެ ކަމަށެވެ.

ރައީސް އިތުރަށް ވިދާޅުވީ ދެ ގައުމުގެ މެދުގައި ހުރި ކަންބޮޑުވުންތަކާއި އިސްކަންދޭންވީ ކަންކަން ވެސް ވަރަށް ރަނގަޅަށް މިހާރު ދެނެގަނެވިފައިވާކަން ގަބޫލުކުރައްވާ ކަމަށެވެ. އެގޮތުން އެއްވެސް ކަހަލަ ޚިޔާލު ތަފާތުވުންތަކެއް ހުރި ނަމަ އެކަން ހައްލުކުރެވޭނީ ފާޅުކަން ބޮޑު ގޮތެއްގައި މަޝްވަރާކޮށް، ދެ ފަރާތުގެ ވިސްނުމުގެ ތެރެއިން ކަމަށް ރައީސް ވަނީ ވިދާޅުވެފައެވެ.

ރައީސް ވިދާޅުވީ އިންޑިއާއަކީ ރާއްޖޭގެ ތަރައްޤީގައި ވަރަށް މުހިންމު ބައިވެރިއެއް ކަމަށެވެ. މިހާރު ރައީސް އިންޑީއާއަށް ކުރައްވާ ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ކުރައްވާ ފަސް ދުވަހުގެ ދަތުރުފުޅެކެވެ. މިއީ އެމަނިކުފާނު އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.