ދިވެހި ރައްޔިތަކު ކޮންމެ ޤައުމެއްގައި ހުރިނަމަވެސް ފުރިހަމަ އެހީތެރިކަން ލިބޭގޮތަށް ސިޔާސަތުތައް ބައްޓަންކުރާނަން- ރައީސް

ދިވެހި ރައްޔިތަކު ކޮންމެ ޤައުމެއްގައި ހުރިނަމަވެސް އެރައްޔިތަކަށް ދިވެހި ދަޢުލަތުގެ ފުރިހަމަ އެހީތެރިކަން ލިބޭގޮތަށް ސިޔާސަތުތައް ބައްޓަންކުރައްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

އިންޑިއާއަށް ކުރައްވާ ފުރަމާނަ ދަތުރުފުޅުގެ ތެރެއިން އިންޑިއާގެ ނިއުދިއްލީގައި ދިރިއުޅޭ ދިވެހިންނާ ބައްދަލުކުރައްވާ ވާހަަކަ ދައްކަވަމުން ރައީސް ވިދާޅުވީ އެމަނިކުފާނު ރާއްޖެއިން ބޭރަށް ކުރައްވާ ދަތުރުފުޅުތަކުގައި އެޤައުމުތަކުގައި އުޅޭ ދިވެހިންނާ ބައްދަލުކުރުމަށް ޚާއްޞަ އިސްކަމެއް ދެއްވާކަމަށާއި، އެކަމަކީ ރައީސް ވަރަށް ބޮޑަށް ބޭނުންފުޅުވެލައްވާ ކަމެއް ކަމުގައެވެ. ހަމައެއާއެކު މި ބައްދަލުވުންތަކުގައި ދިވެހިންނަށް ދިމާވާ ދަތިތައް އޮޅުންފިލުވައި އެކަންކަމަށް ޙައްލުތަކެއް ގެނެސްދެއްވުމަށް އިސްކަން ދެއްވާނެކަމަށް ރައީސް ވިދާޅުވިއެވެ. 

ދިވެހިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ ރާއްޖެއާއި އިންޑިއާދެމެދު އޮންނަނީ ޒަމާންވީ ގާތް ގުޅުމެއްކަމަށާއި، މި ދަތުރުފުޅުގެ ސަބަބުން އެގުޅުން ވަރުގަދަވެގެންދާނެކަމަށެވެ. ޚާއްޞަކޮށް ދެޤައުމަށް ފައިދާހުރި ކަންކަން އިތުރަށް ފުރިހަމަވެގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ މިއަދު ފެށިގެން މިދިޔަ ދަތުރާއެކު ކުރިއަށް އޮތް ދެތިން ދުވަހުގެ ތެރޭގައި ދިވެހި ރައްޔިތުންނަށް ފައިދާހުރި ގިނަ ކަންތައްތަކެއް ދެގައުމުގެ ގުޅުމުގެ ތެރެއިން ފަހިވެގެންދާ ދުވަސްތަކެއް ކަމަށްވެގެންދާނެ ކަމަށެވެ. އަދި އެކަމުގެ ފޮނި ނަތީޖާވެސް ފެނިގެންދާނެ ކަމަށްވެސް ރައިސް ވިދާޅުވިއެވެ.