ރައީސްގެ އިންޑިއާ ދަތުރުފުޅުން ދެ ޤައުމުގެ ގުޅުން އިތުރު ހަރުފަތަކަށް ގެންގޮސް އުންމީދީ މުސްތަޤުބަލެއް ފެނިގެންދޭ - ޤާސިމް

ރައީސް ޑރ. މުޙައްމަދު މުޢިއްޒު އިންޑިއާށް ކުރައްވަމުން ގެންދަވާ ދަތުރުފުޅުގެ ސަބަބުން ދެ ޤައުމުގެ ޒަމާންވީ ގުޅުން އިތުރު ހަރުފަތަކަށް ގެންގޮސް އުންމީދީ އަދި އުފާވެރި މުސްތަޤުބަލެއް ފެންނަން އެބަ އޮތް ކަމަށް ޖުމްހޫރީ ޕާޓީގެ ލީޑަރ ޤާސިމް އިބްރާހިމް ވިދާޅުވެއްޖެއެވެ.

ރައީސްގެ އިންޑިއާ ދަތުރަށް މަރުޙަބާ ދަންނަވަމުން އެކްސްގައި ކުރެއްވި ޕޯސްޓެއްގައި ޤާސިމް ވިދާޅުވީ އެގައުމުގެ ބޮޑުވަޒީރު، ނަރެންދުރަ މޯދީއާއި ބައްދަލުކުރެއްވުން ވެގެންދާނީ އިންޑިއާއާއި ރާއްޖެއާއި ދެމެދުގައި އޮތް ގުޅުން އިތުރަށް ބަދަހިކުރުމަށް ލިބޭ ވަރަށް މުހިންމު ފުރުޞަތަކަށް ކަމަށެވެ. 

ޤާސިމް ވިދާޅުވީ  ޖުމްހޫރީ ޕާޓީގެ ލީޑަރުގެ ހައިސިއްޔަތުން ދެޤައުމުގެ ދެމެދުގައި އޮތް ގުޅުން އިތުރަށް ހަރުދަނާ ކުރެއްވުމަށް ކުރެވެން ހުރި ހުރިހާ ކަމެއް ކުރެއްވުމަށް ރައީސްއަށް އިލްތިމާސްކުރައްވާފައެވެ.އެއާއެކު، އިންޑިއާ ކަނޑުގެ ސަރަހައްދުގެ ހަމަޖެހުމާއި ސަލާމަތާއި ރައްކާތެރިކަން ކަށަވަރުކޮށް، އިގްތިސާދީ ތަރައްގީގެ އައު އުސްމިންތަކެއް ހާސިލުކުރުމަށް އިންޑިއާއާއި ރާއްޖެއާއި ދެމެދު އޮތް ގުޅުމަކީ ވަރަށް ވެސް މުހިންމު ގުޅުމެއްކަން ފާހަގަ ކުރައްވާފައި ވެއެވެ. 

ރައީސްގެ މި ދަތުރުފުޅަށް ކުރީގެ ރައީސް މުޙައްމަދު ނަޝީދުވެސް އެކްސްގައި މަރުޙަބާ ދަންނަވާފައި ވެއެވެ. ނަޝީދު ވިދާޅުވީ، ރާއްޖެއާއި އިންޑިއާއާ ދެމެދު އެއްގޮތްކަންތައްތަކެއް އެބަހުރިކަމަށާއި ޚާއްސަގޮތެއްގައި އާދަކާދައާއި ތާރީޚީގޮތުންވެސް އެއްގޮތް ކަންތައްތަކެއް ހުރިކަން ފާހަގަކުރެއްވިއެވެ. އެއާއެކު ހީނަރުވެފައި އޮތް ދެ ޤައުމުގެ ގުޅުން ހަރުދަނާވަމުންދާތަން ފެނުމަކީ އުފާކުރައްވާކަމެއްކަން ފާހަގަކުރައްވާފައިވެއެވެ.