ސުކޫކު ކޫޕަން ޕޭމަންޓަށް 25 މިލިޔަން ޑޮލަރު ސަރުކާރުން ދައްކައިފި

ސުކޫކުގެ ކޫޕަން ޕޭމަންޓުގެ ގޮތުގައި 25 މިލިއަން ޑޮލަރު ދިވެހި ސަރުކާރުން މިއަދު ދައްކައިފިއެވެ.

ފިނޭންސް މިނިސްޓްރީން ނެރެފައިވާ ބަޔާނެއްގައި ވަނީ 2021 ވަނަ އަހަރު ވިއްކި 500 މިލިއަން ޑޮލަރުގެ ސުކޫކްއަށް ސެމީ ކޫޕަން ޕޭމަންޓްގެ ގޮތުގައި ދައްކަން ޖެހޭ 25 މިލިއަން ޑޮލަރު މިއަދު ދައްކާފައިވާ ކަމަށެވެ.

މި ބަޔާނުގައި ވަނީ ދަރަނީގެ ފައިސާ ދެއްކުމަކީ ސަރުކާރުގެ އެންމެއިސްކަންދީފައިވާ ކަންތައްތަކުގެ ތެރެއިން ކަމެއް ކަމުގައެވެ. މި ކޫޕަން ފައިސާ ވަގުތުން ދެއްކުމަކީ، ދަރަނި ދޫކުރި ފަރާތްތަކަށާއި އިންވެސްޓަރުންނަށް ދަރަނީގެ ޒިންމާ އަދާކުރުމުގައި ސަރުކާރުން ދެމިހުރި ކަމުގެ ހެއްކެއް ކަމުގައި ވެސް ފިނޭންސުން ބުނެފައިވެއެވެ.

މި ޞުކޫކުގެ މުއްދަތު ހަމަވާނީ 2026 ގައެވެ. މި ޞުކޫކަށް އަހަރަކު ދެފަހަރު ކޫޕަން ދައްކަންޖެހެއެވެ. އެއީ އޭޕްރިލް އަދި އޮކްޓޯބަރ މަހުގައެވެ. ސަރުކާރުން ކޫޕަން ޕޭމަންޓްގެ ފުރަތަމަ ޕޭމަންޓް މިއަހަރުގެ މާރިޗް މަހު ދައްކާފައިވާކަން ހާމަކޮށްފައި ވެއެވެ. 2024 ވަނަ އަހަރުގެ ދެވަނަ ކޫޕަންގެ މުއްދަތު މާދަމާގެ ނިޔަލަށް ހަމަވާއިރު، ސަރުކާރުން މިހާރުވަނީ އެންމެ ފަހުގެ ކޫޕަންގެ ފައިސާވެސް ދައްކާ ނިންމާފައިވެއެވެ.

މި ޕޭމަންޓް ސަރުކާރުން ދައްކާފައި މިވަނީ، ދިވެހި ސަރުކާރަށް މި ފައިސާ ދެއްކިދާނެތޯ ސުވާލު އުފައްދާފައިވާ ދަނޑިވަޅެއްގަައެވެ. ސުކޫކު ކޫޕަން ޕޭމަންޓަކީ ސުކޫކުގެ އަގުގެ ވަކި އިންސައްތައެއް އެ ސުކޫކު ދޫކުރި ފަރާތަށް ދެއްކުމެވެ.