ޞިއްޙީ ދާއިރާ ތަރައްޤީކޮށް، ޚާއްޞަ ޑޮކްޓަރުންނާއި ނަރުހުން ތަމްރީންކުރުމާއި ގުޅޭގޮތުން އިންޑިއާގެ ހެލްތު މިނިސްޓަރާ މަޝްވަރާ ކުރައްވައިފި

ސިއްޙީ ދާއިރާ ތަރައްޤީކޮށް، ޚާއްޞަ ޑޮކްޓަރުންނާއި ނަރުހުން ތަމްރީންކުރުމާއި ގުޅޭގޮތުން އިންޑިއާގެ ހެލްތު މިނިސްޓަރާ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މަޝްވަރާ ކުރައްވައިފިއެވެ.

އިންޑިއާގެ ޔޫނިއަން މިނިސްޓަރ އޮފް ހެލްތު އެންޑް ފެމިލީ ވެލްފެއަރ، މިނިސްޓަރ އޮފް ކެމިކަލްސް އެންޑް ފަރޓިލައިޒަރސް އަދި ބަރަތިޔާ ޖަނަތަ ޕާޓީ (ބީ.ޖޭ.ޕީ)ގެ ޤައުމީ ރައީސް، ޖޭ. ޕީ ނައްޑާ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އަރިހަށް އިޙްތިރާމުގެ ޒިޔާރަތެއް ކުރައްވާފައިވެއެވެ.

މި ޒިޔާރާތުގައި ދެބޭފުޅުން ބައްދަލުވެވަޑައިގެން މުހިންމު ވާހަކަތަކެއް ހިއްސާ ކުރައްވާފައިވެއެވެ. މި ބައްދަލުކުރެއްވުމުގައި ރައީސް ވަނީ، މި ފުރަމާނަ ދަތުރުފުޅުގައި ކުރިއަށްދާ ބިނާކުރަނިވި މަޝްވަރާތަކުގެ މައްޗަށް އަލިއަޅުއްވާލައްވާފައެވެ. އަދި މި ބައްދަލުވުމުގައި މިނިސްޓަރ ނައްޑާ ވަނީ، އިންޑިއާ އާއި ރާއްޖެއާ ދެމެދު ބަދަހިވަމުން އަންނަ ގުޅުން ފެނިވަޑައިގަތުމުން އުފާކުރައްވާކަމަށް ވިދާޅުވެފައެވެ.

މީގެ އިތުރުން ބޭފުޅުން ވަނީ ސިއްޙީ ފަރުވާގެ ފެންވަރު ރަނގަޅުކޮށް އެ ޚިދުމަތް ރަނގަޅު ކުރުމުގެ ގޮތުން އެކި ދާއިރާތަކުން ޚާއްޞަ ޑޮކްޓަރުންނާއި ނަރުހުން ތަމްރީންކުރުމާއި ގުޅޭ މަޝްވަރާތައް ކުރައްވާފައެވެ. އެއާއެކު ސިއްޙީ ދާއިރާގެ ބިނާރު ތަރައްޤީކުރުމާއި، ޑިޖިޓަލައިޒްކުރުމާ ގުޅޭ މަޝްވަރާތައްވެސް ކުރައްވާފައިވެއެވެ. 

ބީ.ޖޭ.ޕީގެ ޤައުމީ ރައީސްގެ ހައިސިއްޔަތުން ސިއްޙީ ވަޒީރު ނައްޑާ ވަނީ، މަތީ ފަންތީގައި ފަންނީ މަޢުލޫމާތު ބަދަލުކުރުމަށް، ދިވެހިރާއްޖޭގެ ސަރުކާރު ހިންގާ ޕާޓީއަށް ދަޢުވަތު އަރުވާފައެވެ.